[ Prima Distinctio]

Von der hôchfart

III Hie hebet sich an d[er] hofferte dorn Sw[er] dar vf vellet d[er] ist verlorn.

269 Der birn ein teil viel in den dorn.
270 Manic sêle leider ist verlorn
271 Von dem dorne, wenne er hât
272 Die wurzeln aller missetât:
273 Zorn, haz und gîtikeit,
274 Unkiusche, frâz, dar zuo lazheit
275 Gein allen guoten dingen
276 Kan diu hôchfart bringen.
277 Daz Lucifer ein tiufel wart,
278 Daz kam von sîner hôchfart.
279 War kam sîn hôhiu wirdikeit,
280 Die got het an in geleit?
281 Diu viel in den hellegrunt:
282 Des hât der selbe hellehunt
283 Vil manige sêle an sich gezogen,
284 Die werltlich hôchfart hât betrogen.
285 Ketzerîe, rüemen, tratzen,
286 Spotten, schrîen, roufen, kratzen,
287 Schallen, brehten, reien, springen,
288 Stürmen, vehten, loufen, ringen,
289 Rouben, brennen, morden, stechen,
290 Dröuwen, smêhen, übel sprechen,
291 Stôzen, twingen, vâhen, slahen,
292 Rennen, sprengen, würgen, hâhen,
293 Vürnêmischiu hertikeit,
294 Stolzieren und bœsiu glîchsenheit,
295 Loter wîse und loter kleit,
296 An trinken, an spîse unmêzikeit,
297 Zoubern, goukeln, liegen, triegen,
298 Fluochen, schelten, sweren, kriegen:
299 Diz ist der hôchferte ingesinde,
300 Bî dem ich selten iht guotes vinde.
301 Sît smêhen, tratzen hôchfart ist,
302 Sô lât iu sagen in kurzer frist,
303 Wîe manic unwerdez smêhen
304 Wir hœren unde sehen
305 Von maniger frouwen stolzheit,
306 Der herze enbor dîu hôchfart treit,
307 Und lât iuch bescheiden
308 Zem êrsten von den meiden.
[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 07.07.2004