Logo ta gra 'Kishtey stoo Yuan'

Artyn
Articles

Edward
Faragher

Skeealyn
Stories

Mestit
Various

Greieyn
Greieyn

Kianglaghyn
Links

Skeealyn
Stories

Skeealyn Saki
Saki's Stories

Skeealyn Wodehouse
Wodehouse's Stories

Skeealyn Lovecraft
Lovecraft's Stories

Skeealyn Ghunsany
Dunsany's Stories

Skeealyn

Ayns shoh, verrym skeealyn 'sy Ghaelg gyn boayl share aym y chummal.

Y chied skeeal, "Yn Goayr Glass", she shenn skeeal veih'n lioar "Manx Fairy Tales" eh, liorish Sophia Morrison, 1929, as yn skeeal er ny insh j'eeish ayns Mannin. Ta mee credjal dy vel y coip-chiart ceaut echey, agh mannagh vel shen kiart, cur fys aym my sailliu.

Y nah skeeal, "Mychione moddey", cheayll mee y skeeal veih ben my vraarey, as dooyrt ee dy haghyr eh da carrey eck. Shoh ny s'cooin lhiam jeh’n skeeal myr dooyrt ee eh rhym. Cha noddym gra my she firrinys t’ayn ny dyn, agh lhaih eh as jean dty vriwnys hene.

Ta'n treeoo skeeal, "Y Volcaan", screeut aym pene. Cha nel eh agh beggan aittys, agh s'treisht lhiam dy yiow shiu beggan taitnys jeh. Gura mie mooar ec Jamys O'Meara son coyrle as kiartaghyn.

Ta ny skeealyn (as skeealeenyn) elley my obbyr hene; orryms ta foill erbee er nyn son. Cha nel scansh ny keeal er lheh ec fer erbee jeu.

Here, I will put stories in Manx that don't have anywhere better to go.

The first story, "Yn Goayr Glass" ("The Grey Goat"), is an old story from the book "Manx Fairy Tales", by Sophia Morrison in 1929. It was told to her in the Isle of Man. I believe the copyright is expired, but if not, please let me know.

The second story, "Mychione moddey" ("Concerning a dog"), is a story I heard from my brother's wife, and she said it happened to a friend of hers. This is what I can remember of the story as I was told it. I can't tell you the truth of it, but read it and make up your own mind.

The third story, "Y Volcaan" ("The Volcano") I wrote myself. It's nothing but a bit of fun, but maybe it'll entertain you. Many thanks to Jamys O'Meara for advice and corrections.

The other stories and vignettes are all my own work, and any blame should be addressed to me. There's no particular point or importance to any of them.

Yn Goayr Glass

Cheayll mee myr shoh dy row goayr glass ayn.
As keayrt dy row va goayr glass ayn, v’ee goll un Jeheiney-Chaisht dys y traie dy hymsagh barnee. Ren ee faagail ny tree mannanyn beggey glassey as yn guilley-bock ec y thie. As dooyrt ee roosyn nagh row ad dy osley yn dorrys da pagh erbee dys harragh ee eehene thie reesht.
“As”, dooyrt ish, “tra higyms thie ver shiu enn dy dy re meehene t’ayn cha leah’s nee shiu fakin my chass sthie fo bun ny coolley, son bee snaie jiarg as snaie gorrym mysh my chass.”

Cha row yn goayr glass foddey er sooyl ass y thie tra haink yn kayt dys y dorrys, as dooyrt eh:
“Foshil shoh, foshil shoh, mish dty vummig, mish dty vummig, mish dty vummig.”
“Cur dty spaag veg stiagh fo bun ny coolley, as neem’s cur enn ort my t’ou uss my vummig,” dooyrt yn guilley-bock.
Hug yn kayt e spaag veg stiagh fo bun ny coolley, as dooyrt yn guilley-bock:
“Cha nel oo, cha nel oo my vummig; ta snaie jiarg as snaie gorrym mysh spaag veg my vummig hene.”
Cha leah as ren yn kayt clashtyn shen, hie eh roish.

Tammylt beg lurg shen, qoui haink dys y dorrys agh yn coo, as dooyrt eh:
“Foshil shoh, foshil shoh, mish dty vummig, mish dty vummig, mish dty vummig.”
“Cur dty spaag veg stiagh fo bun ny coolley, as neem’s cur enn ort my t’ou uss my vummig,” dooyrt yn guilley-bock.
Chelleeragh hug yn coo e spaag stiagh fo bun ny coolley, as dooyrt yn guilley-bock:
“Cha nel oo, cha nel oo my vummig; ta snaie jiarg as snaie gorrym mysh spaag veg my vummig hene.”
Cha leah as ren yn coo clashtyn shen, hie eh roish.

Agh cha row yn coo foddey er sooyl tra haink yn shynnagh dys y dorrys, as dooyrt eh:
“Foshil shoh, foshil shoh, mish dty vummig, mish dty vummig, mish dty vummig.”
“Cur dty spaag veg stiagh fo bun ny coolley, as neem’s cur enn ort my t’ou uss my vummig,” dooyrt yn guilley-bock.
Chelleeragh hug yn shynnagh e spaag veg stiagh fo bun ny coolley, as dooyrt yn guilley-bock:
“Cha nel oo, cha nel oo my vummig; ta snaie jiarg as snaie gorrym mysh spaag veg my vummig hene.”
Cha leah as ren yn shynnagh clashtyn shen, hie eh roish cha skibbylt as yinnagh e chraueyn cur kied da, as cha ren eh fuirraghtyn dys haink eh dys thie yn chabbil. Ren eh siyr mooar dy chleiy ayns y thorran, as cha ren eh fuirraghtyn dys hooar eh snaie jiarg as snaie gorrym. Chiangle eh ad mygeayrt e spaag as hie eh reesht dys thie ny goayr, as dooyrt eh:
“Foshil shoh, foshil shoh, mish dty vummig, mish dty vummig, mish dty vummig.”
“Cur dty spaag veg stiagh fo bun ny coolley, as neem’s cur enn ort my t’ou uss my vummig,” dooyrt yn guilley-bock.
Chelleeragh hug yn shynnagh e spaag veg stiagh fo bun ny coolley, as tra honnick yn guilley-bock yn snaie jarg as snaie gorrym urree, dooyrt eh:
“T’ou uss, tou uss my vummig,” as ren eh fosley yn dorrys da.
Cha leah as hooar yn shynnagh sthie gow eh greim er ny mannanyn, as hug eh lesh thie marish yn ayrn nagh noddagh eh gee jeu, as ren eh gra:
Oie vie noght
Laa mie mairagh
Foolliagh ny shibberagh
Jean eh jinnairagh

Er-y-gherrid haink yn goayr glass thie voish y traie, as cha row roee agh thie follym. Huitt ee er keayney dy-sharroo son thootchey beg, eisht, fegooish cumrailys erbee roie ee dy yeeaghyn ayns thieyn ny ainjysee eck son ny mannanyn. Haink ee dys thie yn chayt, as ghow ee jeeragh seose dys mullagh yn thie, myr t'eh yn cliaghtey jeh’n cheint cheddin dy yannoo.
“Quoi t’ayns shen er mullagh my waag veg screebey-scrabey, screebey-scrabey; nagh lhig dou broie my hoddagyn ny cloie my hollaghyn?” dooyrt yn kayt.
“She mish t’ayns shoh, y goayr glass, shirrey son ny tree mannanyn beggey glassey as yn guilley-bock.”
“Er y thalloo ta foyd as ayns yn aer t’er-dty-skyn, cha naik mee rieau dty vannanyn,” dooyrt yn kayt.

Hie ee roee dys thie yn choo, as myr ta’n cliaghtey lesh y cheint ghow ee jeeragh seose dys mullagh yn thie, myr t'eh yn cliaghtey jeh’n cheint cheddin dy yannoo.
“Quoi t’ayns shen er mullagh my waag veg screebey-scrabey, screebey-scrabey; nagh lhig dou broie my hoddagyn ny cloie my hollaghyn?” dooyrt yn coo.
“She mish t’ayns shoh, y goayr glass, shirrey son ny tree mannanyn beggey glassey as yn guilley-bock.”
“Er y thalloo ta foyd as ayns yn aer t’er-dty-skyn, cha naik mee rieau dty vannanyn,” dooyrt yn coo.

Hie ee roee dys thie yn çhynnagh, as myr ta’n cliaghtey lesh y cheint ghow ee jeeragh seose dys mullagh yn thie, myr t'eh yn cliaghtey jeh’n cheint cheddin dy yannoo.
“Quoi t’ayns shen er mullagh my waag veg screebey-scrabey, screebey-scrabey; nagh lhig dou broie my hoddagyn ny cloie my hollaghyn?” dooyrt yn kayt.
“She mish t’ayns shoh, y goayr glass, shirrey son ny tree mannanyn beggey glassey as yn guilley-bock.”
“Er y thalloo ta foyd as ayns yn aer t’er-dty-skyn, cha naik mee rieau dty vannanyn. Agh trood stiagh as gow aash, my neen, as veryms dhyt bolgum çheh. Er-lhiams dy vel oo skee as accryssagh lurg wheesh rouail choud jeeaghyn son dty vannanyn,” dooyrt yn shynnagh.
Myr shen va drogh-yerrey er yn ghoayr glass, hie ee stiagh ayns thie yn çhynnagh, as tra hooar eh ee stiagh, varr eh ee myr ren eh ny mannanyn, as ren eh gra:
Oie vie noght
Laa mie mairagh
Foolliagh ny shibberagh
Jean eh jinnairagh


Mychione moddey

Va lught-thie cummal ayns Lunnin, as thie mooar oc, as moddey oc chammah. B’vooar as towse lhieu yn moddey. Va caillin cummal faggys daue, as va caarjys mie eddyr y daa lught. Y lught-thie as moddey oc, tra v’ad goll ersooyl rish tammylt, v’ad cliaghtey yeearree er y chaillin shoh dy hannaghtyn ‘sy thie oc as goaill kiarail jeh’n voddey. Nish keayrt dy row, hie ad ersooyl rish lane vee, as va’n chaillin tannaghtyn ‘sy thie. Agh s’treih lhiam gra, laa ny ghaa erreish daue faagail, hooar y moddey baase. Wahll, cha row shen aashagh da’n chaillin, as ee ny lomarcan. B’vie lesh y lught-thie hene y corp y oanluckey, foddee; agh cha row ish son tashtey moddey marroo ‘sy thie car y vee, ny smooinee eh!

Ren ee çhellvaney fer lhee baagh, as dinsh ee y clane skeeal da; as dooyrt eh, dy jinnagh ee cur lhee y moddey da’n thie lheihys echey, yinnagh eh freayll eh derrey harragh y lught-thie erash. Shen yn eie share v’eck, as myr shen ren ad coardail rish shen. Cha row agh daa ghoilleeid eck bentyn rish. Hoshiaght, va thie lheihys y fer lhee baagh ymmodee meeillaghyn ersooyl as ish gyn gleashtan. Veagh eh urree goll er y raad yiarn fo-halloo as cur lhee corp y voddey. Chammah’s shen, cha nee moddey ught ny brockeyr v’ayn, agh alsaashagh lane aasit. Wahll, cha nod ee agh geabbey. Myr shen, hooar ee kishtey mooar, as hug ee y moddey stiagh, as hug ee tead as rybban mygeayrt y chishtey er aggle dy beagh eh brishey magh er y raad. Yindys taitnyssagh da sleih Lunnin, beagh shen.

Er aght ennagh, hug ee lhee y kishtey da’n raad yiarn, as tessen Lunnin, gyn monney doilleeid, agh lesh ymmodee sleih jeeaghyn dy quaagh er y chishtey. Daag ee y traen, as nish honnick ee dy row lhag greeish mooar roee, as ren ee soghal dy trome. Agh haink deiney aeg, cooyrtoil huic, as blass caarjoil er, as ren eh çhebbal cooney lhee. Wahll, v’ee bwooisal dy liooar da. Hie ad seose y lhag greeish, coloayrt beggan, as tra v’ad çheet dys kione y lhag, denee eh cre ‘sy teihll va sthie y chishtey, as eshyn cho trome.

Hug y feysht shoh beggan nearey urree. Cha row ee son insh da dy nee moddey marroo v’ayn. Quoi ec va fys er ny yinnagh eh? Cha by vie lhee rouan; as myr shen, dooyrt ee y chied eie haink urree: she greie DJ e braarey v’eh.

As lesh shen, ersooyl leshyn gollrish y jouyll as cha vaik ee dooinney, ny kishtey, ny moddey marroo arragh reesht.


Y Volcaan

Va coraaghyn aaheeaney jeh boallaghyn yn çhamyr hollys, mygeayrt ny collooyn ardey. Va’n çhaghter er e glioonyn roish y troyn, cur fys da’n Ree Eliaar, va ny hoie ayns eaddagh costallagh as braew. Cha nee fys mie v’ayn.

“Soiagh creeagh elley! Cre haghyr? Cre haink orrin?” denee y Ree, dy jeeragh. Haink gruaie er, as blass trome er e choraa.

“Er broogh y Cheyll Liauyr, Ard-ooashley. Haghyr y patrole er possan caggee ec y chreeagh, roosteyryn s’cosoylagh, as huitt ad er caggey rish y cheilley. Va coayl mooar ain, agh ghow shin barriaght harroo ec y jerrey,” dreggyr ee.

Hoie y Ree er ash er e hroyn. “Mollaght! Shen y treeoo cheayrt 'sy çhiaghtin! Choyrlagh!” Haink fer da huggey çhelleeragh, as gooyn jiarg er. “My Ree,” as eshyn.

“Cur fys da ny çhiambleyn. Lhig da ny gongyn goaill arrane da ny merriu.”

“Er y chooyl, my Ree,” as ersooyl lesh.

Ren y Ree Eliaar Mie, Mainshter Luseita ny Sleityn, gosney dy trome as rubbal y faasaag echey. She faasaag braew, rank v’ayn, as ish cur hug da’n ennaghtyn ooashlys as creenaght as reeoilid v’echey. Hug eh snog seyree da’n çhaghter, as ersooyl lhee dy bwooisal son bee as oonlaghey. Roish queig minnidyn, va’n Choonseil er nyn jaglym mygeayrt y Ree.

“My Ree,” dooyrt Kionfenee Ran, “va Sallachar ny birrag ‘sy vio roish laghyn ny shennayraghyn ain! She oayll bugganeyn as beishteigyn feohdagh t’ayn, as drogh ‘ir ta cummal nyn mast’oc.”

“As y Venrein atçhimagh oc!” as y Ven-hiarn Naia. “T’ad gra dy re buitçh t’ayn, ta fys eu.”

“T’ee er nyannoo coardailyssyn rish spyrrydyn anchasherick!” dooyrt fer jeu, lieh-sanshit.

“T’ee ceau eairkyn youyl myr cowrey y choardailys!” er lesh fer elley.

“As cha geauin hene lheid y ghooyn, er chor erbee,” as y Ven-hiarn. “Neufeeudagh, veign gra. Smooinee er!” Smooinee ad er. Va scuirr beg as ny fir jeeaghyn dy sursmooinaghtagh. Fy yerrey v’eh er Naia cassaght y yannoo, as ghooisht ad, beggan fud y cheilley.

“Agglagh, agglagh,” as y Ree dy tappee.

“Ansherbee, t’ad goural sleih da’n volcaan oc,” dooyrt Yeljan. “Ta fys ec cagh er shen. Cha nel shen cairagh.”

“Lhisagh shin jannoo eh,” as Ran, dy creoi. “Ta ny caggaghyn shoh çheet dy ve neuchaaoil. Cha mie lesh ny fir ad.”

Cha row y Ree Eliaar cliaghtey rish geill da barelyn yn çheshaght chaggee y chur. Graih ny Jeeghyn, she caggey va bun as bree oc; kanys oddagh ad gaccan noi? Agh dinsh coraa beg da nagh by vie lesh my harragh corree er ymmodee thousaneyn dy ‘ir armit. B’oddey eh va’n Ree smooinaghtyn, as shen dy trome. Tra loayr y Choonseil, hug eh tostid orroo. Fy yerrey, hrog eh e chione.

“Fow çhaghteryn tappee dou, Gureint,” as eh. “Cur fys er ny deinneen, as ny trollagyn. Vermayd sheese y dorraghys fy yerrey.”

**********************

Er troyn lheead, euar, dorraghey, va’n ven ny soie. Veshieu, Venrein ny h-Eairkyn, Venainshter ny Çheerey Ghoo! Nagh mooar va’n chrooin eairkagh eck, nagh owanagh va e h-eddin glass vane! Va dagh kesmad ry-chlastyn er lic lhomey y çhamyr reeoil.

“Cre’n naight, Ulgheoi?” denee ish jeh. Hanee yn orc trean ny hassoo roee, cliwe foast ‘sy laue echey, as eshyn fuilltagh.

“Haghyr shin orroo ec Keyll y Clieau, Venainshter,” as yn orc. “Slane tree feed jeu, cabbil as ooilley. Patrole y chreeagh, dy shickyr.”

“As yn eiyrtys?” Dreill ee e coraa dy reajagh.

“Hoie ad orrin çhelleeragh,” dreggyr eh. “Daa cheayrt yn earroo jin. Va coayl deyr ain, agh ghow shin leagh ny merriu jeu roish my jagh shin er çhea. Bee jeiryn oc noght.”

Honnick y Venrein ny lhottyn echey, as y jeeigeyrys. “As Shollan?” Dy cliaghtagh, she yn captan hene hug coontaghyn jee.

“Marroo,” as eh, dy neuchooishagh. Yeeagh Veshieu er rish tammylt beg, gyn fockle, eisht chowree ish da eshyn dy gholl. Hyndaa yn orc as ersooyl lesh, gyn cowrey ny fomys, as lorg laagh faagit ny lurg. Gyn sooill erbee urree, ghow y Venrein y chrooin trome j’ee, as hug ish dy kiarailagh er boayrd ee. Va’n jesheen trome cur urree çhingyssyn-king, agh v’eh feer chowreydagh. Troaraght, ny red ennagh; cha by chooinee lhee eh rieau.

Hooill ee dy moal dys uinniag, y gooyn doo eck sleaydey harrish y laare. Hayrn ee ny s’faggys mygeayrt-y-moee eh as ren ee bibbernee. Cha row y gooyn feer çheh, er y fa nagh row monney jeh, foddee. She gooyn oikoil y Venrein v’ayn, v’ad er ny shickyraghey, as myr shen v’eh urree eshyn y cheau. Cha mie lhee eaddagh doo, agh va shen cowraghey dobberan son fuillaghtyn e pobble. Cha nod ad ginsh jee c’red va goaunid y ghooyn cowraghey, agh v’ad shickyr dy row eh red ennagh feer scanshoil, as dy beagh drogh-aigh er y çheer dy jinnagh ee caghlaa eh. Shoh errey reeoilid.

Cha lhisagh eh cur yindys urree. She ben chaggee va Shollan rieau, dunnal erskyn towse, as ta’n lheid currit da baase aeg, agh va Veshieu er jeet dy chredjal nagh noddagh y chaillin feddyn baase. V’ee er chur nearey er Ulgheoi, bunnys. V’ee er çhee cur erreeish da, agh chooinee ish dy traaoil nagh mie lesh orcyn ennaghtyn foshlit. Cre hon boirey er ny merriu? Bare daue gyllaghey doolane da’n teihll dy row adsyn foast er mayrn. Ansherbee, cha nel towlyn jeirey ec orcyn.

Yeeagh ee harrish y charrick rish tammylt, derrey honnick ee jaagh jiarg girree magh ass y çhiambyl. Va orcyn as sleih caggee ny carrickey ayns shoh, cur aile da’n thooish noo, as bwoalley drummaghyn, cur bwooise son baase ny caarjyn dunnal oc v’er ngoll roish bea noa nyn veniee. Erskyn y jaagh, honnick y Venrein cummey dorraghey getlagh trooid yn aer, as cheayll ee yllagh y dragan. Foddee dy row yn ard-freayltys gobbraghey dy mie, gyn scansh da ny v’ad gra. Cha row ad ry-akin ec y chashtal dy mennick rish bleeantyn. As va ny terriu ushtey bishaghey, nish dy row ny anee oc aachouyral.

Cronkal er y dorrys. Dy siyragh, ghow ee y chrooin eairkagh as cheau ee erash er e kione eh. Hoie ish er y troyn, ghlen ee j’ee jeir ny ghaa, as yeshee ish eaddagh y ghooyn. V’eh er y Venrein jeeaghyn dy reeoil.

“Tar stiagh!” as ee, ny Benrein reesht. Haink stiagh Thoad, ny reih choyrlagh eck, as saggyrt ayns gooyn doo. Cha row eh ny hraa mie son loayrt, smooinee Veshieu j’ee hene, agh ta currym ry-yannoo cre erbee haghrys, da mraane rein erskyn ooilley.

“Mychione oural y vee, my Venrein,” ghow Thoad toshiaght...

**********************

“Gheiney ooasle, gyn mian erbee ve mee-choortoil, ta’n clane skeeal clashtyn neuchosoylagh,”dooyrt y trollag. Cha naashagh da credjal y skeeal. Gyn geill da’n chooid elley, cha row volcaanyn ayns çheeraghyn ny trollagyn. V’ad er cheau ymmodee laghyn shickyraghey eh dy row y lheid ayn. Va blass ouryssagh foast ayns e hoill ny keayrtyn, myr v’eh lieh-yerkal dy row ad jannoo spotçh jeh.

Snog Naia. “Myr dooyrt mee, Chwyllan ooasle,” as y Ven-hiarn, gyn agh faaue mennuigh. “T’ad cur fer ny ben da dagh mee. Ta saggyrtyn as y Venrein ceau ad stiagh ‘syn aile. Er lhieu, gyn shen y yannoo, bee y volcaan stroie adsyn ooilley.”

Ren eh craa. “Nagh graynoil shen! Ven-hiarn veen, n’abbyr-jee fockle ny smoo er, my sailliu. Ta shiu cur neeal orrym chammah.”

“Myr shen, t’eh erriu cooney dooin y chur?” denee Ran. Cha by vie lesh foalsid ny trollagyn, agh v’eh er y Chionfenee goaill rish dy nee sidooryn mie er bashtal v’ayn. Ny yei, er lesh, my vees peiagh erskyn hoght trie ‘syn yrjid as folt gorrym coodaghey eh, cha lhisagh eshyn loayrt myr friplas.

Ghow y trollag toshiaght oraid y chur. Loayr eh cho foddey as oddagh eh, derrey va cadley tuittym er kuse jeusyn v’ayns shen, as cha b’aashagh daue toiggal ny v’eh gra, agh v’eh jeeaghy dy beagh ny trollagyn caggey lioroo.

“Fy yerrey!” as Ran da hene. Hyndaa eh da dooineen va ny shassoo faggys da. Cha nod eh fakin eddin erbee lurg y far-eddin yiarn v’eck, as b’ghoillee eh fakin my va’n deineen jeeaghyn er ny dyn. “As bee shiu hene maroo, Ven Seyr?”

Yeeagh y far-eddin er. “Bee buill ghorraghey, keyley, tashey dy chummal ayndoo?” as ish. “Bee meaineraght ayn?” Cha row eh jerkal shen.

“Ah, dy firrinagh, Ven Seyr,” as eh, “cha noddym gra dy bee...”

Haink rish cliwe, ass yn aer hene, foddee. S’foyral eh y marennym haink da.

“S’mie dy liooar shen.”

**********************

Va’n pobble er nyn jaglym mygeayrt y Volcaan mooar roish irree ny greiney, as eaddagh jesh orroo, as ennaghtyn feaill ayn. Çheu-hiar jeh’n Volcaan va kiarkyl as colloogyhn marmyr mygeayrt echey, as aile gorrym lostey er kione dagh fer. Huitt y soilshey orroosyn va nyn shassoo ‘sy chiarkyl: feed saggyrt jannoo canteyraght ghowin, as yn ard-saggyrt nyn mast’oc, as eddyr ocsyn ooilley, caillin aeg as gooyn argid ecksh.

Ass y chiarkyl collooagh hie seose greeishyn, cruillag stoamagh vane, as ish obbyr cheirdee share ny çheerey. Hie y possan saggyrtagh seose, as y chaillin aeg maroo, eddyr daa haggyrt, as canteyraght y phobble aaheeaney mygeayrt oc. Fer as fer, scuirr ad as hyndaa ad çheusthie, derrey nagh row agh yn ard-saggyrt ny hooyl foast, as y chaillin aeg eddyr y daa haggyrt ny lurg. Haink ad dys ardan, croghey harrish beeal y Volcaan hene, as blastyn çheh cammaghey yn aer hene.

“Oh Volcaan Mooar,” ghow yn ard-saggyrt toshiaght, as eshyn oayllagh rish y clane oardagh nish. Loayr eh ny focklyn kiart, ga dy row eh smooinaghtyn da hene er key riojit, ny jough feayr. Er y laue elley, mannagh beagh ad ooilley er nyn goadey lesh obbeeys fendeilagh lajer, veagh ad doo-lostit hannah. Bare da gyn ve meewooisal. Cheayll eh eh hene loayrt focklyn s’jerree yn oardagh, as hug eh cowrey. Dy moal, dy faase, hooill y chaillin coair feegan yn ardan. Eisht scuirr ee, as huitt ee er glioonyn as laueyn lesh yllagh meehreishteilagh. Haink tostid er y phobble, as lhig neose armyn yn ard-saggyrt. Cha row shen kiart. Dy h-imneagh, hug eh cowrey da’n jees ny lurg. Roie ad er oaie çhelleeragh, ghow ad greimmaghyn urree, as cheau y daa haggyrt y chaillin aeg stiagh ‘sy Volcaan.

Lurg tammylt beg, haink tharmanaghey y Volcaan, as va fys ec sleih Hallachar dy row yn oural er ny hoiaghey jeu. Eisht ghow toshiaght y kelloorey dy feer. Çheh as ollishagh, hie yn ard-saggyrt dy chur coontey da’n Venrein.

“Graih veen, Phaan, cre’n chooish shen?” denee ish. Cha mie lhee boirey foshlit er chor erbee, as car yn oural hene! “Lane neareydagh! Mannagh nod y chaillin shooyl dy mie, lhisagh oo er chur er ny saggyrtyn ymmyrkey ee y slane raad.”

“Thousane leshtal, my Venrein,” dooyrt eh, dy trome. “Meehaghyrtagh ass towse. Agh b’yeean ee, ny yei. Cha row fys aym dy row y çhingys cho trome urree. Lhig shiu hene jee goaill ayrn...”

“As nee ben-lheeys t’ayn, Phaan?” as ish, dy birragh. “Oh, n’abbyr un ‘ockle ny smoo. Va kied eck, mie dy liooar, agh y nah cheayrt, jean shickyr my oddys ad shooyl ny dyn roish yn oural hene. Ersooyl lhiat nish! Ta feme mooar ayd er oonlaghey, jean credjal dty Venrein.”

“Çhelleeragh, Veshieu,” dreggyr Paan, as ersooyl lesh.

**********************

Cha row ennym mie ec Sallachar ayns Luseita traa erbee, agh lurg naight y chaggey veagh ayn, haink ny skeealyn dy ve ny smoo as smoo breagagh. Rere cliaghtey skeealyn olkey mychione sleih foddey jeh, hie ad er mooadaghey rish dagh fockle.

“She buitçh y Venrein hene, fys ayd,” v’ad gra. “T’ee jannoo ardnieu jee hene as getlagh mygeayrt y çheer fud ny h-oie, as gee babbanyn ass thieyn.”

“Boghtynid!” veagh fer elley freggyrt. “She druai orcagh t’ayn, as obbeeys lhiggey da jeeaghyn gollrish ben aeg.”

“T’ad caggey rish y cheilley car y traa ayns shen,” as peiagh elley. “As ta ree noa ec Veshieu dagh oie, as t’ee cur thousane eunyssyn da, agh ayns y voghrey, t’ee ceau eh stiagh ‘sy Volcaan son dy ‘reayll ee hene aeg as aalin.” Veagh scuirr beg erreish da shen, tra smooineeagh ny deiney er y venrein olk aeg aalin, derrey veagh ben ennagh cur orroo, dy fondagh, cooinaghtyn dy row mraane ec y chooid smoo jeu. Ny yei shen, she skeealyn braew v’ayn, as quoi nagh bee aaloayrt ad?

“Kiart myr dooyrt shiu, ard-ooashley,” dooyrt Gureint dy tushtagh. “Ta’n pobble loghtey Sallachar as gaggyrt dy jeanmayd stroie yn olkys shoh.”

“As ny trollagyn, as ny deinneen?” denee Ben-hiarn Naia, dy h-ouryssagh. “Jean ad shassoo marin?” Bare j’ee fys fondagh na brynnerys.

Hooar ee mongey boggysagh jeh’n Chionfenee. “Dy feer, Ven-hiarn, nee,” as eh. “Ta sheshaght chaggee ain oddagh scranshal Sallachar dys joan.” Nagh b’haittin eh geddyn barriaght er y chaillagh vollaghtagh, smooinee eh dy meeghiastyllagh.

Snog y Ree dy foayroil. “Bare dou scryssey magh yn çheer dwoaieagh shoh,” ren eh fockley magh. “Ta currym orrin olkys y vooghey, gyn scansh da’n leagh.” Aghterbee, ver eh jerrey er ny caggaghyn creeagh brasnee shen as ny fir chaggee gaccan dy row eh gaueagh goll ro aggys da’n chreeagh. Cre feeu fir chaggee nagh jinnagh ny va currit orroo gyn accan?

“Jean çhaglym ny fir ry-cheilley, Ran,” dooyrt eh, lesh e choraa s’reeoiley. “Bee ny trollagyn as deinneen ayns shoh moghrey nuyr.”

**********************

Roie sheshaght chaggee ard-vooar harrish y chreeagh, fir chaggee Luseita as trollagyn gorrym as deinneen tramylt co-hooyl ry-cheilley. Huitt ad er cashtalyn Sallachar myr faarkaghyn, as cha row veg faagit agh tholtanyn. Er oaie lhieu trooid y Cheyll Liauyr, traaue raad oc hene, as cha nod patroleyn ny h-orcyn ny doonyn ny deiney lhiettal ad. Mastey cruink ny Twoaie, ghooisht draganyn magh ass ny h-idd oc as dobbree ad traartys er y çheshaght chaggee. Ny yeih, cha dod ad gimman ersooyl ny leejoonyn; haink fir obbeeys as ballistaghyn dy lhiggey neose ny draganyn ass yn aer, as hie ny h-idd oc er stroie, as ny h-oohyn oc er brishey. Adsyn v’er mayrn, ren ad çhea dys buill ghorraghey as follit son dy cheiltyn. Ayns Plaase Luseita hie shimmey jough er iu as arrane barriaght er goaill.

“Slaynt, my chaarjyn!” as y Ree dy gennal. “Cha nod ny dreihyn shassoo nyn oi. Beemayd ayns Cashtal Veshieu roish shiaghtin. Cha der ad fer elley erbee da’n Volcaan, as beemayd ooilley sauçhey jeh’n olkys.” V’eh credjal e ‘ocklyn hene, ny keayrtyn.

Ghow Cwyllan bolgum jeh’n jough as ren eh mongey. Ta shen taishbyney ynsaghey as hene-reiltys diplomee ny trollagyn dy braew. Mannagh beagh eh er cheau bleeantyn jannoo studeyrys er cliaghtaghyn deiney as fondaghey ny h-ellyn echey, veagh eh er skeayrey y stoo amvlass harrish y Ree.

Haink y Ven-hiarn Naia noal. “Naight vie, my Ree,” dooyrt ee dy cooyrtoil.

“Dy feer!” as Gureint. “My Ree, woaill yn eie orrym dy lhisagh shin eiyrt er y çheshaght chaggee ec jerrey y chaggey. B’vie lhieu fakin y Ree hene greinnaghey ad, as oddagh shin, oh, cur boynyn as lheid y red.”

Smooinee y Ree rish tammylt beg. Cha row eh jeeaghyn feer vaynrey. Cha nee obbyr Reeghyn eh goll faggys da caggaghyn. Cre hon fir chaggee agh son jannoo shen foddey jehsyn?

“As erskyn shen, lhisagh shiu ve ayns shen tra vees ad er ngoaill Veshieu,” dinsh Naia da. Va kiart eck: v’eshyn er chlashtyn ny skeealyn chammah. Haink blass smooinaghtyn er e sooillyn lesh shen, as tostid beg, derrey chredd eh as dooyrt eh “Eie mie er bashtal! Lhig dooin ooilley goll. Ta currym orrin jannoo reddyn dy kiart, fys eu.”

Cha vaik peiagh erbee fer jeh’n phossan sleetçhal ersooyl. Hooill eh derrey haink eh dys uinniag, as eisht dooyrt eh shiartanse dy ‘ocklyn niartal. Çhelleeragh, v’eh ny hassoo çheumooie jeh carrick Veshieu. Stiagh lesh.

“As shen eh, Venrein Ooasle,” as eh, beggan ny lurg shen. Cha row y Venrein jeeaghyn feer taitnyssagh lesh y naight. Dy cadjin, cha mie lesh sleih feddyn magh dy vel ad nyn noidyn mieys, eederyn-babbabyn as olk ‘syn ‘eill, gyn scansh da ve nyn vir orcagh ayns cummaghyn chaillinyn. As cha row y rheynn elley brynnagh dy jeeragh, noadyr.

Erreish da’n çheegyr goll ersooyl, hoie ish ny lomarcan rish tammylt liauyr, as smooinee ee. Cha row naight vie ry-chlashtyn raad erbee, as va fys eck nagh nod eer e carrick hene shassoo noi’n çheshaght ard-vooar. Agh foddee dy row aght ayn.

**********************

Er feie ny çheerey, hie fir chaggee Hallachar er çhea. Tra huitt sidooryn Luseita as e caarjyn er baljyn as cashtalyn, cha dooar ad agh folmid, trustry, as cowraghyn hregeil tappee. V’ad beggan fud y cheilley, as lurg laa ny ghaa, daase ad dy ve lag-chreeagh. B’haittin lhieu cur noidyn fo haart gyn doilleeid; troagyr meeillaghyn eddyr baljyn follym gyn veg dy chaggey as spooilley ec y jerrey, cha row shen cho mie lhieu.

Ny yei, hooill ad er oaie trooid anee as keyllyn derrey haink ad dys carrick Veshieu hene. Honnick ad y Venrein ny soie er cooyl dragan bane, as feed thousane orc nyn shassoo maree, as deiney doo-coamrit er cabbil, as ny cabbil gennal aile. As haink aggle orroo. Agh dyllee y Kionfenee Ran adsyn dy hoieaghey er y çheshaght ‘eoh, as ren ad shen.

“Marvaanee faasey!” as y Venrein, as y coraa eck aaheeaney harrish y vagher caggee, as tendreil daunsey er ny h-eairkyn eck. Ren eaddeeyn meeiney goaney brannalt 'sy gheay as taishbyney corp stoamey glass-vane ny buitçh reeoil. Yeer sooillyn ny deiney caggee urree, as tannaghtyn; er y fa dy nee yn ard-noid v'ayn, jirmayd. “As vel eh feue my harvaantyn y varroo? Cha bee fer jiu faagit dy loayrt skeeal y chaggey shoh!” As ren y dragan getlagh foddey er-nyn-skyn, as huitt eh orroo ayns aile as jaagh. Lhig shimmey side as orraghey as pishag noi, as ren y dragan buirrooghey, as çhyndaa ‘syn aer, as woaill y ghaa er y thalloo gollrish clagh chenney, as haink bleaystey jeh aile as obbeeys. Tra va’n jaagh as smooirlagh er nyn nglenney magh, cha row red erbee faagit jeu. As roie ny h-orcyn as marksleih er çheu roish y çhilley.

Eisht ren ny fir chaggee kelloorey (ga dy row kuse jeu beggan trimshagh nagh row ad er n’eddyn magh my va ny skeealyn firrinagh), as goaill arraneyn barriaghtagh, as shooyl stiagh ‘syn ard-valley. Cha row peiagh erbee ry-akin; v’ad er skellal rhymboo gollrish scadooyn. Foddee nagh row ad agh scadooyn, er nyn stroie liorish soilshey çheet faare oc? Va blass bwooisal er shen.

Tra v’ad shickyr dy row eh lane sauçhey, haink Ree Luseita nyn lurg, as toshee ny trollagyn, as kionfeneeyn ny deinneen. Ec toshiaght y nah vee, laa yn oural, hass ad ayns y chiarkyl marmyr, mastey ny fir chaggee, as honnick ad ooilley ny greeishyn mooarey goll er tayrn neose, as cooid y chashtal goll er lostey.

Va bleaystey y Volcaan ry-akin rish ymmodee meeillaghyn, as reayrt mie ec Veshieu er y chronk ard raad va’n phobble fuirraghtyn. Bee eh orroo ard-valley noa y feddyn, gyn ourys, agh foddee dy beagh eh ny share gyn shen y yannoo faggys da volcaan. Eer my v’eh ymmydoil ny keayrtyn. Cha by vie lhee yn shenn chashtal fannee rieau.

“She conrieught vie v’ayn, gyn ourys,” dooyrt y Venrien Veshieu rish ny fir-obbee eck, as adsyn ooilley jeeaghyn er fooillagh yn ard-valley. “Dod mee credjal dy nee scaane v’ayn. Er cooish slane neuventyn rish shen, veih jiu magh, bee’m ceau gansee daahoil mwannal ard, lesh troosyn liauyrey, as gys y jouyll lesh y drogh-aigh. As edd greiney, er lhiam. Cre shen dooyrt uss, ghooinney?”

“Veg, Venrein!”

“Smooinee mee shen,” as ish.


Y Balley Follym

Laa dy row, va guilley ayn, as Perick yn ennym er, as v'eh markiagh y daawheeyl echey trooid y valley. Nish va Perick er n'eiyal ro anmagh y laa shoh, as nish hooar eh lhiettrimys 'sy raad thie. Va cuighlinyn traaght ayns linnaghyn er y 'traid, as cleigh harree, as y raad hene, v'ee cleiyit as giarrit liorish ny JCByn bwee mooarey va daunsey ayns shen. Myr shen, ghow Perick toshiaght shirrey raad thie elley, as ren eh markiagh trooid straidyn nagh row eh er n'akin rieau roie. Haink eh fy yerrey dys goal 'sy raad; er y laue yesh jeh, lheanee y straid cho cadjin as red erbee, as gleashtanyn as coir trustyr aynjee; agh er y laue hoshtal, by ghaaigit ee as fo joan, gyn gleashtan erbee ry-akin, as va lossreeyn goaill toshiaght gaase trooid ny gaaigyn. Ny yei shen, va'n raad ayn, as ee sheeynt shiar, dys y thie echey. As çhyndaa eh y daawheeyl echey as ren eh markiagh ersooyl shiar harrish y raad vrisht.

Nish giare ny yei, lhaggee thieyn skeoigh y valley, as va Perick ny lomarcan. Va boallaghyn sheeyney seose er çheuyn y raad, shenn voallaghyn breekey jiarg, as scaaghyn phosteyryn orroo, as faiyr gaase mastey ny gaaigyn. Raad by injil ny boallaghyn, honnick eh ny troggalyn nyn gooyl: straihyn jeh thieyn, as buird er dorrys as uinniag, as shimmey brat shenn ghraffiti orroo; thieyn stoyrey mooarey follym, as blass eash sleityn orroo, as surranse as niart; troggalyn offish, as uinniagyn mynvrisht oc, as ad gyn sollys erbee. Lurg tammylt, honnick eh cretooryn garraghey 'sy traidyn, teiy nyn raad mygeayrt y voghlaneys as skeetal roish rish ny voallaghyn. She roddanyn v'ayn, fir vooarey, as fammanyn gollrish ard-nieughyn oc; as foillanyn pabyr-vaney scraaghey 'sy chiuney. Va reddyn elley ayn myrgeddin: va beisteigyn-grobbagh ceau drilleeyn 'sy dressyn, as tin-tarkyn keillit blakey er Perick lesh ny sooillyn folliaghtagh oc; as ren liauyree cheyley skyrrey ersooyl tra hayrn eh er-gerrey daue, as nyn oltyn gollrish ushtey. Eisht honnick Perick fiorag ny soie 'sy raad, as ee freayll arrey ersyn, as tra haink eh rish y çheu eck, lheim ee da.

"Goll y raad cheddin?" denee yn 'iorag; as er y fa dy row eh, lheim yn 'iorag er boayrd y daawheeyl as ren ad markiagh roo. Nish hie Perick raad trooid cruinniaghey thieyn stoyrey, as ooilley mygeayrt-y-mysh she breekyn v'ayn, er croo keynnagh, as scadooyn ard; as eisht nagh nee tost v'ayn. Cheayll eh polt-polt-polt myr drum foddey jeh, as yn 'iorag cabberey da.

"Mark son dty vea!" dooyrt yn 'iorag; as varkee Perick. Foast hayrn y polt-polt-polt er oaie, ny s'faggys as ny s'ardjey lesh dagh cassey jeant echey. Yeeagh eh er e chooyl as honnick eh red ennagh eiyrt er, roie dy staghyllagh, agh dy tappee neesht. Ny yei e share as ooilley, cha nod Perick dy shaghney. Haink y cretoor ny lurg, as cheayll eh tharmanaghey voallaghyn as smoashal uinniagyn lesh y cretoor traaue dy choair dy jeeragh.

"Toshtal!" dooyrt yn 'iorag, as hyndaa Perick toshtal. Nish foddee eh fakin y cretoor tra yeeagh eh erash: carn breekyn foawragh ayns cummey dooinney, lurgaghyn gollrish biljyn as armyn gollrish pillyryn-lettragh. Va aae ghroghad roish, as roie eh da cho tappee as nod eh, as y veisht vreekyn kiart er e 'amman. Sheese y lhargagh hie eh as stiagh 'sy thiollane, as hie eh ny hrooid gollrish bullad trooid gunn, agh by vooar y veisht as by veg yn aae. Woaill ish y droghad ec bieauid ny geayee, cho niartal as traen tappee; as hie e kione ny hrooid dy mie, agh daag eshyn e chorp ny yei. Eisht yllee y veisht dy tarmaneagh, as vrish ee ayns peeshyn, as cha row agh dash breekyn brisht ayn. Myr shen, vannee Perick yn aigh echey, as hug eh booise da'n 'iorag son sauail e vea; as chroymm ish. Scarr ad ec jerrey raad Pherick, as ersooyl lhee gyn fockle ny smoo.

Nish cha nee traa liauyr v'ayn derrey deiy Perick ro anmagh reesht, as hooar eh y raad thie meecheimagh foast. Eisht hyndaa eh rish y 'traid, as haink eh reesht 'sy ghoal: er y laue yesh, straid cadjin; er y laue hoshtal, raad vrisht, follym. Smooinee eh er y breekyn-beisht, as v'eh foym goll my yesh; agh by anmagh eh, as cha row traa dy yummal echey, as myr shen hie eh my hoshtal reesht.

S'leah dy liooar haghyr eh er yn 'iorag, as ish fuirraghtyn 'sy raad, as scuirr eh son failt jee y chur. Lheim yn 'iorag er voayrd, as ersooyl lhieu hiar rish y raad.

"Cre'n boayl shoh, fiorag?" denee Perick.

"She'n balley follym t'ayn, er ny yarrood as faagail ny yei, as y vooinjer neuvaghtal cummal aynjee," dooyrt yn 'iorag. "S'mea y cheynnagh, as ta idd roddanyn as beisteigyn-grobbagh 'sy voallaghyn, as ta reddyn elley sleetçhal ayns ny corneilyn."

As varkee ad trooid y Valley Follym, ayns tostid y fastyr, as foillanyn scraaghey er-nyn-skyn. Haink ad dys straid fo ymmodee carnaneyn pabyr, jeh dagh ooilley sorçh. Va pabyryn-naight ayn, as lettyryn, as meeryn as mynghiarraghyn, ayns carnaneyn fud-y-cheilley cho foddey as honnick ad. Cheayll ad sonsheraght y phabyr er y gheay, as shen gaase ny s'ardjey. Eisht va'n sheean cooyl oc, as haink fys er Perick nagh nee sheean y gheay v'ayn.

"Mark son dty vea!" dooyrt yn 'iorag, as varkee Perick. Foast haink y sannish-sannish-sannish nyn lurg, ny s'faggys as ny s'ardjey lesh dagh çhyndaa jeant echey. Yeeagh eh erash, as honnick eh red ennagh çheet ny lurg, as eh snaue roish dy gastey as dy graynoil. Gyn scansh da eabbey Pherick, ny lurg haink eh, as yoltee eh ny straidyn gollrish argid bio. Woaill cree Pherick dy creoi, as v'eh tayrn ennal dy trome.

"Toshtal!" dooyrt yn 'iorag, as toshtal lhieu. Sheese greeishyn haink eh lesh bwoalley as builley, as dobbyr da tuittym jeh'n daawheeyl. Nish yeeagh eh erash, as honnick eh'n chretoor dy baghtal: she cront mooar bane baggyrtagh v'ayn, as cummey beishteig er, as gob gollrish thiollane raad yiarn. Dobbree eh ny coshallyn cho tappee as nod eh, rish broogh yn ammyr, as ushtey sliee orroo. Snaue y veishteig foast ny lurg, as ratçh ad rish yn ammyr, scollag as scaaillagh, as y cassan sheer-cheyllaghey. Ren geaylin Pherick screebey er y voalley, as ren eh strepey son cormid, derrey haink skeoll mooar ny lurg, as dennee eh ushtey spreih er. Va'n cassan er çheet dy ve ro cheyl, as y veishteig vooar vane er duittym stiagh 'syn ammyr, raad d'aase ee liorish ushtey, as chammee ee, as haink ee veih-my-cheilley dys thousane thousane meer pabyr slane fliugh. Myr shen, vannee Perick yn aigh echey, as hug eh booise da'n 'iorag son sauail e vea; as chroymm ish. Scarr ad ec jerrey raad Pherick, as ersooyl lhee gyn fockle ny smoo.

Agh laa giare ny yei lurg shen, by ard yn ghrian as by ghiare scadooyn vunlaa. Va kirbyl fuirraghtyn 'sy thie, as Perick foddey jeh er çheu elley jeh'n valley. Y trass cheayrt haink eh 'sy raad echey, as y trass cheayrt by veecheimagh eh. Myr shen, hug eh mollaght er yn aigh echey, as smooinee eh dy liauyr as dy trome as dy dowin derrey ren eh y briwnys; agh y trass cheayrt hyndaa eh my hoshtal reesht.

S'leah dy liooar haghyr eh er yn 'iorag, as ish fuirraghtyn 'sy raad, as hayrn eh er ny glackanyn. Ren ee brebbal e famman, as lheim ee er voayrd, as ersooyl lhieu hiar rish y raad. Fo'n sollys çheh, bwee, by ghlassey as nod ad ny feial, as dagh gaaigey baghtal as doo er ny breekyn. Ren ny beisteigyn-grobbagh çherr mastey ny scaanaghyn, as cheayll Perick kesmadyn y vooinjer neuvaghtal siyraghey ersooyl rish eh çheet orroo. Skeet cummaghyn fynneydagh rish ny boallaghyn gyn kiarail erbee da, as fo'n sollys soilsheanagh she seihll elley v'ayn, ny scadooyn ecksh ro ghowin dy ve firrinagh, as ny daahghyn ro lane.

Hie y raad trooid ardaneyn raad va biljyn nyn soie, skeoighit foddey-er-dy-henney, nish gaase ayns cummaghyn feie; as coyryn trustyr lhome-lane deayrtey ny shenn chummal oc harrish ny cassanyn. Va stainnaghyn ayn fo smooirane ruy, as boteilyn mynvrisht, as plastagh follym, as craueyn. Eisht, jeeragh roish, honnick Perick troggal mooar, as eshyn falleayssaghey as lonnraghey, as y ghrian aahoilshaghey da er thousane uinniag, as rolteen brisht jeh dagh fer jeu.

Scuirr Perick ec y voal injil mygeayrt y troggal, as ghrapp eh y boal son dy yeeaghyn er ny share. Honnick eh magher feayn terrvacadam, raad va craueyn ghleashtanyn foast nyn soie, mergaghey, as y daah oc speeinit ersooyl foddey er-dy-henney; as foddey jeh va sleih ry-akin, shooyl mygeayrt y troggal.

"Cre'n voayl shoh, fiorag?" denee Perick.

"Shoh yn ard-lhiaght, as ny beishtyn cummal ayns shoh," as yn 'iorag. "Ta tree beishtyn freayll arrey er y valley follym, as cur magh ny cretooryn oc er y çhelg son adsyn ta çheet stiagh aynjee. By lhieusyn y foawr breekagh, as by lhieusyn y veisteig phabyr; as eaisht! ta mee clashtyn y treeoo fer."

As deaisht Perick, as cheayll eh sheean 'syn aer chiune. Va cling-clabber-claggeraght ry-chlastyn, çheet dy ve ny s'ardjey, ny s'faggys; as lesh çhyndaa, honnick eh kay çheet sheese y raad nyn guaiyl.

"Mark son dty vea!" dyllee yn 'iorag, as varkee Perick. Kiart roue va'n troggal ny hoie, gyn goal erbee, gyn briwnys, as kiart ersyn roie ad. Foast dardjee y cling-clabber-claggeraght, tra v'ad slewal eddyr ny gleashtanyn marroo, as roie dys y hroggal yl-vrisht. She kay vuirrooghagh v'ayn nish, gullal gollrish dorrin, kay jeant jeh smooirlee as scarrickyn. Eisht va dorrys çhyndaaee foue, as lheim ad sheese as heiy ad ny hrooid, dy moal agh dy corrym. As y veisht, cha nod ee fosley'n dorrys, agh roie ee dy jeeragh noi. Nagh tharmaneagh y feiyr tra v'ee mynvrishey! Stainnaghyn as boteilyn as paggaidyn as craueyn, smoash ad noi y dorrys as ersooyl lhieu, as ec y jerrey, cha row agh boanlagh cadjin ny lhie ayns shen. As vannee Perick yn aigh vie echey, as bare lesh goll; agh coraa ny lurg, hug eh er moostey, as hyndaa eh.

"Fastyr mie, y ghooinney," as y choraa, as ish feagh as meen. V'ad nyn shassoo ayns far-hamyr mooar as lhean, as va boayrd ayn, as cretoor er e chooyl. Va cummey quaagh er y pheiagh, lane dy h-uillinyn as scadooyn, as by dooillee fakin eh. Son shen, va Perick wooisal dy liooar. "Cre'n aght noddym cooney diu y chur?"

"Ta poinsheil ain," as yn 'iorag, "ec un er y chlag," as snog y peiagh.

"Immee-jee 'syn troggeyder," as eshyn, as chowree eh dys muinney y hroggal. Myr shen, hoill stiagh ad ayns cartage corradoyryn, as dagh fer jeu kiart gollrish ny fir elley. Va pabyr boalley roostey ooilley mygeayrt oc, as dagh shey trie va jalloo ayns clowan scaant, as dagh feed trie va dorrys. Agh by fioghit as ersooyl ny h-earrooyn oc, as er cooyl ny dorryssyn va sheeanyn quaaghey as agglagh ry-chlastyn, as cha ren Perick bentyn roo er chor erbee.

Eisht lheeanee ny corradoyryn dys halley anvaaragh. Foddey er-nyn-skyn va'n sar-vullagh ny lhie, as straihyn liauyrey dy 'troo-hoilshagey marroo er, agh cha daink sollys erbee agh trooid ny h-uinniagyn mynvrisht, as v'adsyn boallaghyn y çhamyr. Va'n halley lane dy cooid hie tholtanagh. Er ny buird va jeshaghtyn nyn lhie: çhellveeishanyn as eddin follym oc, as craueyn co-earrooderyn, as radioyn marroo rish foddey. Nish tra haink Perick stiagh 'sy halley, ren eh meekey ayns yindys, er y fa dy row çhionnal sleih ayn, thousaneyn jeu. V'ad nyn soie as nyn shassoo er fud y halley, as cullee dorraghey oc, agh cha row sheean erbee ry-chlashtyn.

"Cre shen?" denee eh jeh hene, as hooill eh daue son dy loayrt roo. Agh as eshyn shen y yannoo, honnick eh dy row eh marranagh. Cha nee sleih v'ayn, agh cretooryn ayns cummey sleih. As va ny cullee oc jeant jeh poagaghyn coyrey, as ny lheinaghyn jeh pabyr, as va ny laueyn oc nyn laueanyn ceaut ersooyl; as cha row king erbee oc. As myr shen, ga dy ren ny cretooryn çhyndaa son dy yeeaghyn er Perick, cha nod eh loayrt roo; as hooill eh roishyn.

Ec y jerrey, haink ad dys dorrys yiarn va cowraghey yn troggeyder. Stiagh laue, as v'ad çheet neose, as neose, as neose, car minnidyn liauyr as ard-liauyr. Eisht doshil y dorrys, as hie ad magh, stiagh ayns entreilys keyl roish dorrys mooar, fuyghagh.

"Er cooyl y dorrys shoh ta ny beishtyn cummal," dooyrt yn 'iorag, va ny soie er geaylin Pherick nish. "Stiagh lhien, as bee cooyrtoil, as er dty hwoaie son caa! As bee shin thie bio reesht, foddee."

Myr shen, ren Perick lheanaghey e gheayltyn, as crankal er y dorrys, as yllee magh coraa sthie: "Çheet stiagh!" Eisht leaystee y dorrys dy lheean as dy moal erash stiagh 'sy çhamyr, as honnick eh ny v'aynjee. She halley ard-vooar v'ayn, as collooyn nyn shassoo ard er-e-skyn, as va'n far-vullagh fo keyll dy hoilshaghyn; agh va dagh fer jeu brisht. Va'n brat laare jiarg meein as duinid fo e chassyn, as va cochaslysyn airh-oirrit mygeayrt ny boallaghyn. Ayns ynnyd un voal va uinniagyn gyn earroo, dagh fer ny smoo na Perick, as dagh fer mynvrisht; as va sollys airhey çheh souree lhieeney stiagh nyn drooid. Nish ayns mean y halley va boayrd mooar cruinn jeant jeh mahoganee s'dorree, as va tree sleih nyn soie mygeayrt echey as ad loayrt, gyn cur geill erbee dasyn. Eisht ghow Perick creeaght, as hooill eh nyn guaiyl.

Nish b'eer whaagh ny eaddagh oc: cheau dagh fer cullee, fer jeu doo, fer jeu bane as fer jeu airhey. Va breidyn jeh geiyn yskyn mygeayrt oc skell as meekey lesh thousane daah, as mygeayrt nyn ging va crooinyn jeh scroggyl cassit, as va far-eddinyn orroo. Va cummey deiney orroo, agh ghleaysh ad gollrish geinnagh as darree ad gollrish dhianeyn, as aaheeney ny coraaghyn oc orroo hene. Va dash dy vreekyn roish y fer doo, as dash dy phabyr roish y fer bane, as juist dy 'ooillagh roish y fer airhey. Myr shen, va fys er Perick dy nee adsyn by vie lhieu marroo eh, as reill eh arrey noi caa.

"Quoi s'lhoys da cur stiagh orrin?" yllee y veisht ghoo-choamrit, as woaill ee y voayrd lesh doarn trome, as ren ee grouigey er trooid yn 'ar-eddin eck.

"She mish Perick," dreggyr eh, as hug eh leshtal daue.

"Cre'n aght haink uss dys shoh?" yllee y veisht vane-choamrit, as ren ee buirrooghey.

"Haink mee trooid y Valley Follym," as Perick.

As y treeoo veisht, airhey-choamrit, yeeagh ee er rish traa liauyr. Eisht dooyrt ee "Soie sheese!"; as hoie eh.

Eisht loayr ny beishtyn rish tammylt mie er yindyssyn y reeriaght. Loayr eh mychione y lught dy hirveishyn hug biallys da'n mian sloo oc, as ny beishteigyn agglagh dod ad symney jeh uillinyn follit y valley, as y jerrey harragh er quoi erbee yinnagh trespass 'sy valley follym. Dinsh ad eshyn da lesh coraaghyn jeeaney as ad feeacklaghey dy dewil, as ren Perick bibbernee, agh cha row aght scapail echey foast.

Eisht ghow ad toshiaght arganey er ny lhisagh ad jannoo da. Va'n cretoor doo-choamrit son raipey eh ayns peeshyn son bee ny shirveishyn oc, as va'n cretoor bane-choamrit son cur eh fo glass ayns pillyr lettyragh rish keead. Agh y fer airhey, v'eh jeeaghyn dy ve y fer smoo scanshoil, as dooyrt eshyn dy lhisagh ad jannoo beishteig da.

"Nagh vel eh er stroie ny tree shirveishyn ain? B'chair eh eshyn ayns yn ynnyd jeu y chur," as eh, as snog ny fir elley. V'eh jeeaghyn dy row briwnys jeant oc, as va Perick er creau ny smoo as ny smoo, er son nagh row caa erbee dy scapail ry-akin. Agh reill yn 'iorag ny tost er e gheaylin, as hug ee bassag gherjoilagh da.

Eisht haink paays mooar er ny beishteigyn tra loayr ad, as hyndaa ad dys Perick.

"Eaisht rhym, ghuilley," as y chied, "cur lhiat caffee dooin!"

"Duinid as dorraghey!" as y nah.

"Millish as mea!" as y treeoo.

Va boayrd liauyr ny hoie faggys daue, cho liauyr as barroose, as v'eh lane dy choirraghyn beggey as cappanyn, poanraghyn caffee as pashyn caffee, speinyn as shugyr as skaalyn. Gyn eie elley er ny lhisagh eh jannoo, hie Perick da as ren eh caffee daue ooilley tra smooinee eh er y chooish. Ren eh caffee dorraghey as millish as mea, as hug eh eshyn stiagh ayns tree cappanyn mooarey jeh obbyr chray. Hug eh cappan da dagh beishteig. V'adsyn cho trome fo resoonaght, ghow ad y caffee as slug ad eh gyn eer blass eh, as yllee ad son cappan elley.

"Nish, Pherick," as yn 'iorag, "shoh dty chaa!"

Eisht ren eh ny smoo caffee daue, cho doo as dooid, as çheh gaalagh; agh ayns ynnyd jeh shugyr, cheau eh stiagh ayn dash mooar dy hollan. Eisht deayrt eh magh y caffee saillt ayns tree cappanyn elley, as hug eh un chappan roish dagh beishteig. Hrog ad ny cappanyn cooidjagh, as dyrjee ad nyn ging, as slug ad y caffee sheese.

Nagh atçhimagh y keayney v'ayn! Ghow ad greimmey er ny scoarnee oc, as ren bodjallyn mooar dy ghaal lhieeney magh ass nyn meill. Vrooillee ad ayns joaney; as ny scadooyn oc, snaue adsyn ersooyl tessen y laare as skell ad roish ayns ny boallaghyn. Cha row agh ny breidjyn faagit jeu, as ny crooinyn dy scroggyl cassit, as ny tree far-eddinyn.

Eisht ghow Perick ny breidjyn as crooinyn as far-eddinyn, as dymmyrk eh adsyn trooid y troggal, as yn 'iorag er e gheaylin foast. Honnick ooilley ny cretooryn ad, as hoig ad dy row ny beishteigyn marroo; as woaill ad bassyn, as yllee ad son boggey. Hrog ad y guilley as dymmyrk ad eshyn 'syn aer, trooid ny corradoyryn liauyr, neuheiltagh; as shaghey ny dorryssyn gullagh; as magh ass ayns sollys ny greiney. Eisht hoie ad eh sheese, as skell ad roish ayns dy chooilley raad, derrey nagh row agh Perick as yn 'iorag ry-akin.

Eisht ghow Perick y daawheeyl echey as ersooyl lesh, trooid ny straidyn lhoobagh as brisht, raad daase faiyr trooid y terrvacadam; as shaghey ny boallaghyn ardey as boghlanagh, gyn boirey ny imnea erbee, derrey haink eh dys creeagh y valley follym; as scuirr eh ayns shen.

As son y treeoo cheayrt hug eh booise da'n 'iorag; as chroymm ish, as lheim ee jeh'n daawheeyl, as scarr ad ayns shen.

Haink Perick thie dy traa son kirbyl. As y nah laa, tra varkee eh y daawheeyl, va'n raad thie karrit, as ny jeshaghtyn ersooyl, as y raad glen; as hie eh er y raad shen as e chree eddrym , as cha smooinee eh er y valley follym reesht arragh.


Tostid

She laa çheh v’ayn. Huitt soilshey jiarg ny greiney er dooinney ny hoie er clagh vooar ec beeal y chouan. Gyn scansh da çhiass y laa, hannee eh as blakey voish heese y chouan. Snaue y raad trooid claghyn mooarey as mullee chloaie gorrym. By host eh ‘sy chouan, as dreayn çhionnagyn ny glasseraght fo geay veeley; shen y sheean ynrican.

S’cosoylagh dy hannee eh rish tammylt liauyr roish my daink ny tree fir. By yesh as thollee ad, as hooill ad dy tappee rish y raad. Cheau y dooinney e hooill orroo, as hug eh enney orroo myr fir jeusyn v’er nyannoo craid er ‘sy valley riyr. Sidooryn ass y phreeu-valley ‘syn eaddagh caggee oc. Rosh ad eh as meeinaghey dy yeeaghyn er.

“Skee hannah, ghooinney?” as fer jeu, lesh oash chonnaasagh. “Cha daink uss agh queig meeilaghyn foast!”

Cha darree y dooinney e daa hooill voish y chouan.

“Cha nel mee skee,” dreggyr eh. “Ta mee geaishtaghey.”

Vong y fer. “As c’red t’ou clashtyn, my ghooinney veen?”

“Veg,” as eh. Ghear ad.

“Ommidjys!” dreggyr y fer. “Cha nodmayd tannaghtyn ayns shoh lesh y donnan boght!”

“Cha roshee uss y nah valley noght mannagh nee oo siyr!” as fer elley. “My lhiggys ad dhyt çheet stiagh er chor erbee!”

“Traa dy liooar ayms, ghooinney,” as eh. “Roshyms eh dy sauçhey.”

Myr shen, hooill ad voish as lheie stiagh ‘sy chlouan lhoobagh. Hannee y dooinney foast, as e chione listit er y çheu. Lurg tammylt, cheayll eh screeaghyn agglagh - as eisht tostid reesht. Hannee eh dy surransagh. Fy yerrey, snaue thassane ghennal yialgheeryn ass yn aer. Dy aashagh, hrog eh bundeil er e gheaylin as shooyl voish. Va sheean y vea-feie ry-chlashtyn er ard choud’s hooill eh stiagh ‘sy chouan. Mysh daa cheead kesmad sthie, honnick eh lorg streppey, as er y çheu hostal, sluggeyder eairkanagh ny lhie mastey thammagyn argid. By roauyr eh as saie jeh’n lhongey braew, as saveeney dy trome. Cha row gaue erbee ‘sy chouan nish, as hooill y dooinney ny hrooid as ersooyl gyn boirey erbee.


Ceau shillee harrish shennaghys

S'lheeah as skee ee grian arree foddey er-my-skyn. S'aighoil dou nagh vel geay erbee ry-ennaghtyn. Myr t'eh, ta mee souyr dy liooar my lhie er yn 'aiyr aeg. Ta ein getlagh nyn mreck 'sy speyr as gyllagh er y cheilley. Cha nel agh ny coraaghyn joarree oc ry-chlashtyn. Fo saveenys, ta mee clashtyn kiaull quaagh ayndaue. Ta sou-eie snaue orrym dy noddin ad y hoiggal dy jinnin eaishtagh roo foddey dy liooar, as eisht... c'red?

Ta poagey pabyr follym cranshal ayns my laue. V'eh jarroodit aym. Ta mee cur eh bun ry-skyn as craa ny kinneigyn jeh er son ny h-ein. Cha nel ushag erbee faggys dou dys ee ad nish, agh ta traa dy liooar oc. Ta'n poagey jannoo uddan crammanagh creoi 'sy phoggaid aym. Cha nel mee son cadley kiart nish, as ta drillin ushtey tayrn mee sheese y largagh, derrey ta geinnagh garroo jeesternee fo-chosh, myr caigney ymmodee fioragyn. S'kiune eh yn ushtey, gyn agh ennal goan geayee ny stroogey.

My hoie er clagh, ta mee goaill lane doarn shillee 'sy laue toshtal aym. She leacyn beg t'ayn, rea as meein fo baare my veir; cha s'aym y cummey oc, as mish blakey er y logh. Ta mee reih fer gyn smooinaght as ceau eh er ard as foddey. Breck vane er brat ghorrym y speyr, gollrish breckyn doo ny h-ein, as ish tilgey sheese as stiagh 'syn ushtey, ny h-ushag awiney cloaie, as faagail fainnaghyn ta skeaylley magh rish tammylt, as lheie ersooyl. Ta mee ceau fir elley ny yei, as ta ny fainnaghyn aawoalley veih y cheilley, as meshtey dys musthaa neuveayn. Deiney er ny cruinney, er lhiam. Ta'n ushtey kiune reesht dy leah. Ta mee çhaglym shillee elley. 'Syn ushtey feayr, ta shillee tuittym nyn dost mastey tholtanyn glassey ny caayr vaiht.


Neunhee er y chlag

T'eh neunhee er y chlag. Ta fliaghey frappal er ny h-uinniagyn as mullagh, as cur magh sheean shissernee. Dy ghooinin my ghaa hooill as fosley my chleaysh, oddin credjal dy vel fainney ailey beg lostey mygeayrt y thie.

Vel?

Ta skeab chreoi ny geayee screebey harrish ny breekyn cadjoor rish sannish garroo. Ren mee brishey ny cluig riyr erreish dou lhaih screeuyn s'jerree Vorag. Quoi ec va fys dy row whilleen dy chluig 'sy thie? Raip mee ny meir assjeu, as giarrey my laue yesh liorish. By ghooillee eh y fer mooar 'sy chuillee, as eshyn prash as fuygh darragh lajer. Agh ta poagey greieyn aym, as ren yn oard cooilleeiney'n obbyr. S'treih eh fakin lheid yn ellyn brisht, agh cha nel eh my reih hene nish. Va clag 'syn oghe chling myrgeddin, as 'sy çhooylagh. Ta tostid quaagh ayn nish 'sy thie. Cha s'aym cre'n traa t'ayn.

Ta sheean ny straiddyn plooghit dy mie fo carnane geinnee rish y dorrys. By obbyr jeeigeyragh eh ymmyrkey cruick er cruick stiagh, agh t'eh fondagh nish. As joan yiarn skeaylt ny mast'echey, cha nel raad ny hrooid da peiagh ny red erbee. Chredjeeagh fer cadjin dy row ny h-uinniagyn ny sassey, agh cha nel adsyn smooinaghyn 'syn aght shen, as aght erbee, bee ny ribbaghyn hug mee orroo so-akin dy baghtal ec kuse jeu. Ushtey as red ny ghaa elley, agh t'eh faagail cowrey dy liooar er glonney.

Nish as reesht, ta mee blakey mygeayrt y çhamyr. Cha noddym ve ro-ouryssagh ny laghyn t'ayn. Cha nel arraghey erbee, as cha nel cooid erbee da keiltyn ad voym. Cha nel agh y boayrd beg rish my laue, as y chaayr shoh. Ta soilshey cainle meein aahoilshaghey veih feddan y shenn ghunnane. Cha s'aym my s'feeu eh, agh bare lhiam dy vel eh aym ny yei shen. Ta'n meilley leoie ny shickyrey my vees caa ayms dy yannoo ymmyd jeh. Nagh gannidagh eh, mish fo ghlass 'sy çhenn thie as troggal coadyn nyn oi? Cha nee fer caggee t'ayn er chor erbee, agh shoh y cabdil s'jerree. Cha noddym jannoo agh my chooid share.

As paays orrym, ta mee goll dy gheddyn cappan dy ushtey. Ta cass ny skynn seiy stiagh ayns my volg keayrt ny ghaa, as t'eh orrym scughey ee. Dy jarroo, ta mee tayrn ee magh as cur eab er saih ny ghaa myr cliaghtey. Neulauee dy liooar, agh cha nel mee cliaghtit rish caggey. S'treisht lhiam dy bee y skynn hene dy liooar. T'ee trome quaagh 'sy laue, as erash 'sy chryss aym, t'ee gennaghtyn feayr trooid my eaddagh. Cha bee ad jerkal lheid y ghreie, aght erbee; dooyrt y ven dou nagh row e lheid ayn nish, agh ta reddyn ayn harrish yn oayllys ain ayns buill 'oddey as feie, ga dy by vooar e leagh.

Cha nel mee son tannaghtyn ayns shen. Ta'n çhamyr ayms ny sauçhey. Giu yn ushtey dy tappee, agh gyn lhiggey da bine erbee bentyn rish my laueyn; shen donnys. Ta mee faagail ny lampyn lectragh lostey, myr cleayn daue foddee, as dooney'n dorrys my yei. Shenn screeuyn scughey fo my chass 'sy halley, cur orrym tuittym, bunnys! Cha dug mee geill erbee daue rish meeghyn, er lhimmey jeh teiy ad ass y raad dys troggal y carnane geinnee. Cha row eh sauçhey screeu erash, er lhimmey jeh freggyrt Morag veen, as nish t'ish caillt aym myrgeddin. Ny smooinnee er nish! Ta mee cur reaghys orroo, troggal boalley pabyr rish y woalley cloaie. Billaghyn as fograghyn scughey, kaartyn postey as screeuyn laue joarree; s'cummey lhiam ad ooilley.

Sheeyney erash 'sy chaayr, ta mee jeeaghyn er y tar-vullagh. Ta ny treinaghyn falleaysagh, as ta çhentyn aawoalley jeh'n snaie prashey ta sheeyney eddyr oc. Beggan neuellynagh, foddee, agh ta cummey'n Çheeaght baghtal dy liooar. Vrish mee my chooyl, faggys, lesh cur ad stiagh lesh oard as mish my hassoo er caayr, agh t'eh jeant nish. Cha s'aym dy feer cre'n fa reih mee yn Çheeaght, agh by vooar lhiam rieau ish. Er lhiam dy vel ee ny smoo erreeishagh na'n chooid elley jeu.

My t'ad çheet, ta mee cho aarloo as noddym ve. Ta'n skeeal liauyr dy liooar nish, as erreish da'n voghrey agglagh arree by lhieuish eh laue yn eaghtyr. Wahll, cha nel shin 'sy Rank nish, as ta mee oayllagh rish dagh oarlagh y thie shoh. Vrish ad my obbraghyn ayns Paarys, agh ren mee dy liooar. Er aght ennagh, bee jerrey er y skeeal yn laa higgys ad, as ta mee foddey yeearree er. Cha noddym surranse er son dy bragh gyn agh tannaghtyn orroo. My higgys eh lhiam ny dyn, bee jerrey er, as cha bee eh my churryms foast. Bee'm seyr. Eisht! Cheayll mee caigney ennagh fo coraa ny geayee? Ta mee jeeaghyn er y chlag doaley. T'eh neunhee er y chlag reesht.

Jig ad jiu?


Kayreeaght

Ayns thalloo Bweechas foddey ‘sy çheear, ta ard sleitagh as bodjallagh ayn, as y beggan beg ta ainjyssagh rish, t’ad cur Kayreeaght urree. Ayns shid ta sleityn garroo ny lheeantyn tayrn seose ad hene as geyraghey as reaghey ad hene derrey oddagh oo credjal dy vel sooillyn Yee orroo dys reih Slieau Sleitee nyn mast’oc. Ta binn ghooey skeaylley erskyn ny bodjallyn dys thiolley scaa ny speyrey as lhiggey da soilshey ny rollageyn deayrtey neose, as ta eaynnee lheeahey nyn soie nyn dost lesh lhieeney reayrtys deiney myr creeagh y teihill. Ta sniaghtey as fliaghey ny bodjallyn snaue as sheeley neose as covestey myr strooghyn bioey ta daunsey raaidyn gennal trooid ny claghyn, derrey t’ad çheet ry-cheilley myr awinyn buillvollee ta giarrey raad dowin trooid y chlagh creoi. She thalloo glionyn kayagh t’ayn, as bhowyn Ghorree, as cassanyn caslagh ard da’n sleih ta cummal aynjee.

Shimmey logh riojit t’ayns y Chayreeaght ‘leitagh, as shimmey peel argid mastey biljyn foawragh. Ta beihyn çhionnal rish ny h-ushtaghyn, as unjinyn croghey lesh fraueyn yiarney er lhargee yeyre ny sleityn. Mastey faiyr gorrym ny crink ta myn-vlaaghyn nearildagh druighteenagh lonraghey gollrish diamanyn fo soilshey glen ny greiney, as ta ein goan as yindyssagh troggal idd ayns scaanaghyn follit, as getlan dy seyr er geayaghyn beayn ny glionyn.

Ta slieau ayns shid t’ad cur Meir ny Voawir er, as ta’n logh Cree Choran deayrtey harrish oirr ny Meir as tuittym lieh-veeiley dys ny claghyn foddey heese. Ta taarnagh nyn mwoalley girree dys niau, as ta kay nyn mwoalley girree dys ny bodjallyn derrey nagh nod oo ad y eddyraghey, as ta’n awin roie sheese ny snaiean bane mastey thousane ‘sy thalloo shid, as rouyraghey as lhiastaghey, lesh sluggey awinyn elley, derrey t’eh feddyn baase jeeigeyrit ‘sy cheayn sheer-‘arkiagh. Ta’n awin shid thooilley trooid y ghlion t’ad cur Glion y Cheead urree. Ta eaynnee y daa heu tuittym çhelleeragh myr boallaghyn ruy, as shimmey billey as lus rank ta croghey er y chlagh bog, as myr shen ta curtan glass skeaylley harrish as mooireerey fo’n gheay. Ta’n awin er ngiarrey dy dowin agglagh stiagh ‘sy chlagh geinnee derrey nagh vel e harmaanaghey ry-chlashtyn jeh oirr ny glionney, as ta’n ghaa woalley tuittym ass shilley foddey heese. As t’ad gra, dy duittagh oo, dy noddagh oo coontey dys keead roish my roshagh oo yn awin bane foddey heese; as shen bun yn ennym. Cha ren rieau agh un ‘er shen as tannaghtyn bio dys insh y skeeal, agh shen skeeal elley da laa elley.

Woaill soilshey greinney souree er y ghlion, trooid baarney ayns ny bodjallyn. By heh as kiune eh, as cha scugh eer jeeas ‘aiyr fo geay veeney er shaghryn. Ren kellagh-rennee litçheragh scoylgernee nish as reesht, as dettyl urley sursmooinaghtagh ayns caslagh mooar foddey erskyn thallooin. Va’n soilshey buigh aaniartaghey daah ny lossreeyn, as lonree ad er ruy menoyr ny cloaie. Oddagh oo sheiltyn dy row y clane ny scaap prashey foawragh b’lesh ny foawir hug ennym da’n clieau heose, as smaragaidjyn buillvollee ayn myr jesheenaghey. Jirree arrane yeearreeagh follianyn airhey ass ny biljyn, as leayst foillycanyn oney eddyr ny crouwyn myr dy row Jee er brishey goll-twoaie as skeaylley y joan er y chruinney myr eunys da sooillyn deiney.

Rish oirr yiass ny h-eaynee va ben ny shassoo ny tost, daa laue ‘sy phoagaghyn eck. Cheau edd lheead scaa er e h-eddin, as lhiettal y ghrian vraew veih ny doalley. By heidey jiarg eh y lheiney v’urree, as eshyn yl-frinjeagh, as ghaunse ny snaieyn liauyrey lesh dagh arraghey myr faiyr fo gheay arree. Nish as reesht, ghow ee fer jeu as eshyn y chassey mygeayrt e mair gyn smooinaght, as eisht lhiggey vee eh. Foddey foee, roie ny boallaghyn ruy-rank dys yn awin bane ta follit ec y chay. By vean-eashagh ish y ven, as thollee dy liooar rere e mooinjer ‘lieau. Va joan turrys liauyr er e braagyn, agh cha ren ee soie, ny jee-ghlackey y cryss gheaylin ghreie v’eck. Vlak ee sheese dy smooinaghtagh, as ny keayrtyn, myr caghlaa, foddee, yeeagh ee harrish yn ‘eaynid cour yn oirr elley. Ghob daa phost foiee ass y thalloo, kiart ry-akin, myr dy row fer ennagh er ngoaill toshiaght troggal cleagh keayrt ennagh.

Fy-yerrey, haink eh gy-kione dy dettyl yn urley er-e-skyn, as snaue e scaan harrish y veggan thalloo v’eddyr ish as veg; as ghooisht ee myr nane va doostey ass ashlish, as jeeaghyn seose rish thurrick er yn urley, roish my yonse ee veih soilsheanaght do-hurranse ny greiney.

“Mollaght er,” dooyrt ee, myr nane v’er nyannoo briwnys, as çhyndaa ersooyl dys goaill toshiaght er y turrys liauyr çheh dys e thie foddey j’ee. Hooill ee ersooyl dy moal, gyn crommey dys troggal ny v’ee er chur lhee neose er y raad joanagh. Aawoaill soilshey meehastagh ny greiney veih y chlaare noa-ghaahit. Dy noddagh yn urley er lhaih, as dy row y mian eir, oddagh eh er vakin ny focklyn baghtal doo “Gaue! Droghad faase!” er yn ‘uygh gial.


Kayreeaght: Screeu mee y skeeal shoh er lioar sketçh veg as mish tannaghtyn ayns Ollooscoill Glyndwr er son yn Eisteddfod 2011. Cha row veg ry-yannoo ny lurg mysh 5sa (wahll, cha by vie lhiam goll dys cuirrey kiaull sheeanagh lane dy yoarree) as cheau mee ram traa liorish lhaih as sketçhal. Oie dy row, er lhiam dy lhisin red ennagh y screeu, as erreish da wagaanagh beg, heel yn eie shoh stiagh ayns my inçhyn. Screeu mee eh gyn fockleyr ny red erbee agh pabyr as penn, as cha ren mee agh glenney ny focklyn erreish dou roshtyn thie. S'treisht lhiam dy by vaghtal eh ny t'er daghyrt; v'eh orrym shassoo noi miolaght ny smoo fys y chur stiagh, agh er lhiam dy yinnagh shen er mrishey macainys y skeeal. Ta beggan dy liooar ny keayrtyn.


As Troggal

She laa fliugh arree v’ayn, as mish shooyl foddey as shirrey tostid aigney. Trooid ny straiddyn creoiey as mish, as ny thieyn mygeayrt-y-moom jeeaghyn neufondagh quaagh, myr dy jinnagh ad lheie ersooyl dy mennin roo. Ren mee seose y chronk da’n çhenn agglish as jeeaghyn sheese harrish y valley. Heeyn magh thieyn myr fliughaneyn er ngobbey ass y thalloo, as ny shenn fir tholtanagh buinney clein glistragh noa. Vrish tooryn crackan glonney ass y vagher fliughaneagh as ceau scaa dullyr harroo. Tra haink leaum, hayrn mee erash fo folt glass skeaylt darragh as jeeaghyn sheese er clashtyn rish sannish ny fliaghee.

Haink caillin dy hassoo marym as hannee shin nyn dost rish tammylt lesh jeeaghyn magh er y ‘trah. Cha ghow mee monney tastey jee; va mee baiht ayns smooinaghtyn.

“Va keyll ayns shen eash erash,” as ee dy neuchooishagh. “Ymmodee darree wuillvollee myr y charrey ain shoh. Oayll da mucyn oaldey as feeaihee, as by ghoan da’n ghrian sleetçhal ny trooid as bentyn rish y thalloo.”

Cheayll mee jerrey yn raa, as by hreih lhiam eh. Va mee currit da wandrail ayns keylljyn as cruink lomarcan, as smooinee mee dy douyr er y cheyll chaillt. “Shen agglagh,” as mish. Ren ee creedlagh.

“Lhiegg ad ny biljyn fer as fer, as troggal balley, as fy-yerrey nagh vel agh brooillagh faagit. Shen myr t’eh.” Hyndaa ee as cowraghey lhargagh y chronk nyn yei. “Smooinee er y chronk shoh roish my hrog ad y thie lheeys. Lheeanee ghlass aalin yinnagh mooireerey fo’n gheay myr tonnyn ny keayin.”

Smooinee mee er dy douyr, as jeeaghyn er y ruillick Chatoleagh, raad va leacyn lonraghey dy fliugh myr shliggyn crammag. Ny fir sodjey, dod mee credjal dy nee crottylyn ardnieu foawragh v’ayn ny lhie ny chadley derrey laghyn çheh souree.

“Va awin ayns shoh bleeantyn er dy henney, fys ayd,” as ee dy meein. “Roie ee sheese y chronk as trooid y cheyll ‘sy toshiaght, as jannoo loghan ec bun ny glionney. Dy row ee ayn foast, er lhiam veih’n ynnyd shoh dy vaikagh shin ny bineyn fliaghee kickil ushtaghyn ny loghan. By aalin eh.”

“Cre haghyr jee, myr shen?” as mish, sheiltyn awin wooar deayrtey harrish eaynin as sheese y chronk myr raad sheidey, as soghal. “Cha vaik mee rieau lorg erbee jee.”

Ren ee creedlagh reesht. “Va feme er sleih ennagh er ushtey, s’cosoylagh. Begin daue er aastiurey strooan ny ghaa, as sleih elley jannoo dubbey mwyljey raad ennagh. As ‘sy jerrey v’ad laccal reamys troggee as lhieen ad oll tash ny loghan as troggal thie ny ghaa. Shen myr t’eh.” Hayrn sheese ee e h-edd geayney olley as filley snaue dy ‘olt dhone erash ayn.

“Ta shin er goayl wheesh dy vuill aalin liorish troggal ooilley ny thieyn shoh,” as mish dy trimshagh. “Agh shen immeeaght dhyt. C’red ta ry-yannoo n’oi? Ta reddyn caghlaa, as cha nodmayd ad y chur erash my by vie lhien ny dyn.”

“Warree veen, surranse; nagh vel mee er surranse? Cha nel eash ny ghaa rouyr dy lhiggey diu cloie er y chruinney aym. Lhig da ny thieyn graney lheeah skeltey er y thalloo.”

Cheau ee sooill orrym as mongey ayns aght craidey feie hug orrym craa; as smooinee mee çhelleeragh er souyrid mullagh noi’n emshir, as çhiollagh er aile, as dorrys ta dooney magh oaldaght ny shenn chruinney roie-deiney. Eisht fy-yerrey hyndaa ee voym as jeeaghyn sheese er y valley myr eirinagh ta towse yn ‘ouyr. Haink ny focklyn s’jerree dou myr sannish.

“Lhieggym ad as troggal keyll.”


Er faarkaghyn nagh heill ee rieau nyn lheid

Hannee y Captan rish radling ny purt, gee ooyl dy moal, as clashtyn rish yllagh ny follian. Leayst y lhong bwoailt dy smooinaghtagh: Arrane ny Geayee. V'ad ass Loghlynn jea, dinsh eh dy gennal, as son yn Eearvooir noght. Agh da'n inneen veg ruy roie n'oi, as hug leshtal, as hebb oarnag villish, loayr eh er faarkaghyn elley foast, as er nane-yeig er y chlag.

By fastyr geuree ee tra daag Arrane ny Geayee cour Nerin as y sheear. She arrane kiune v'ayn y fastyr shen, as by litçheragh ad ny tonnyn. Snaue yn Arrane nyn drooid, gollrish thunnag vraew oayllaashagh.

Hannee y Captan ny hassoo tost, as blakey magh trooid uinniagyn daahit ec bleeantyn dy gheay hailjey as ushtey feie, er y vooir chonghorraghey.

“Jannoo traa mie, Chaptan.”

“Braew, braew.”

Cha cheau eh shilley erbee er y phabyr buigh roish, lane linnaghys as shennaghys.

Beggan er veggan, hyndaa glass glonney dys doo scaanagh, as seiy y lhong trooid oie ayns cummey ushtey. Va'n speyr roue bentyn rish y cheayn as ren ad co-lheie, do nagh row ny rollageyn hene ry-scarrey voish y ghlistral er yn ushtey. Haink trimmid cadlee er y skimmee, as fer as fer, ghooin ny sooillyn oc. Huitt ad dy meein ayns ny soieagyn oc; as rish yn aavainshtyr leaystey er e chassyn, skeayll magh y Captan laue mooar fondagh, as stiurey eh da'n laare dy sauçhey.

Ny lomarcan, lhig eh da'n wheeyl stiurey ee hene, bunnys. Ren eh filley e laueyn mygeayrt cappan stainnagh, as tannaghtyn ny hassoo, soo stiagh çhiassid taitnyssagh y jough as jeeaghyn magh er oie as ushtey mestit. Jirree skeabey meein ny tonnyn da, myr sonsheraght ainjyssagh vayrey rish y lhiabbee. Voogh eh ny londeyryn, son nagh beagh gaue da baatey erbee nish, as mongey lesh ennaghtyn y shenn charrey shiaulley cho kiune. Lheie ad 'syn oie gyn heean, as voish y chiouyl huitt neose bineyn sailjey, nyn jeirnyn scarree, dys y cheayn foddey foue.

As yeeagh inneen ruy lieh ny cadley fo ny curtanyn, as fakin floag dorraghey roish yn eayst ard 'ailtagh.


Car ny h-Oie

Snaue driaght ailey fritlagagh trooid y cheyll, sooillyn lostee leaystey noon as noal 'sy chonghorraghys. Va'n thalloo tash fo chosh kyndagh rish tree laghyn fliugh, as chrott eh er yn eaddagh ain. Cha daink agh meir ghoaney ny h-eayst trooid duillagys souree. Hooill shin dy moal agh dy jeean, as scrutaghey yn thalloo mygeayrt-y-mooin. Nish as reesht, haink yllagh ass scoarnyn skee, gyn freggyrt. Ren shin troagyraght roin, brishey slattagyn as broo renniee. Lheim rannagyn ass y raad, as vrish ushagyn magh ass ny crouwyn tra heiy shin nyn drooid, as accan orrin dy fergagh. Cha dug shin geill daue.

Rish oor er oor, ronsee shin mastey biljyn kiuney ny keylley, er son dooinney aeg as lurgey brisht echey, foddee. Cha dooar shin veg agh reddyn feie. She oie chraidagh v’ayn, chroo far-hannishyn kiart ayns eaishtaght as hug orrin rouail dy kinjagh lorgey orroo. Haink moghrey er y driaght boght, shiaght sleih broghe as feed, er troggloo, bunnys. Snaue shin erash da’n thie mooar as insh da’n venainshter nagh row y mac ry-gheddyn er chor erbee. S’taittin lhiam gra nagh cheayll mee ny dreggyr ee eisht, as mish my lieh-chadley liorish oie er choshey gyn aash. S’cosoyolagh eh nagh row eh cair da possan cheau yn oie er-e-son. Cha gooin lhiam shooyl dy croobagh dys y lhiabbee rish irree magh ny greiney as tuittym ayn, agh begin dou er nyannoo shen.

Va’n balley er-aile er coontey’n vac er shaghryn. Cha dooyrt mee veg, as cha ren mee boirey monney er-e-hon. Rish ymmyrkey thie bart connee rish keeiragh ny hoie, va mee er vakin y chaillin waagh fuirree er çheu ny loghey heear, as bundeil er yn assyl eck. Va mee er moaldey as mongey urree; as ny s’anmey, raad ta imman yiass y thie mooar roshtyn y bayr, va mee er vakin cummey ainjyssagh dorraghey sleetçhal cooyl billey, as er vockley magh er ard bannaght er creeghyn as graih ayndaue. As eisht va mee er ngoll thie jeant booise, as er chur sheese y brat aym as er nee, as er vuirraghtyn er y symney neuhaghnagh. Shimmey sannish foddey cheayll my chleayshyn yn oie shid ‘sy çhiar, as shimmey lorg neuvaghtal honnick mee, as shimmey oor derrey hyndaa driaght aile cour y logh rish dromm ny hoie as cur neuhastey da cowraghyn crubbey shenn assyl ennagh.

As rish Oie ny Bleeaney Noa, haink kishtey fuyghee gyn cowrey voish balley foddey ennagh, lane rosagyn çhirmit as moggaid vane nyn mast’oc; as urreeish va laue ennagh er ngrainney bannaght er creeghyn as graih ayndaue.

(c) 2007-12 John Shimmin. Dagh kiart tashtit; cha nel mee credjal dy vel erbee aym, agh er aggle ny haggle.

Help