XII. Daz ist wi gebaures leut zu[o] edli[n]gen sich gefrewnde[n] vo[n] arme[n] edeln knappen vn[d] vo[n] ack[er] trappe[n].

1565 Ich hân wol zwirunt doch vernumen,
1566 Daz ein edel knappe ist kumen
1567 Ze einer gebiurin unde sprach,
1568 Swenne er si aller verrest sach:
1569 "Got grüeze dich, muome, wie gehabstu dich?"
1570 "Wol, lieber herre!" "Bekennestu mich?"
1571 "Nein, lieber herre!" "Nu bin ich ez doch,
1572 Dîn ôheim! sage mir, lebt noch
1573 Mîn muome Hedwîc, dîn swester?"
1574 "Jâ herre, ich sach si gester!"
1575 "Wie gehabt sich dîn sun Ruopreht?"
1576 "Zwâr, herre, der ist ein frumer kneht
1577 Und ist hiur elter denne vert!
1578 Seht, herre, er treit sîn êrstez swert
1579 Und hât einen hôhen huot
1580 Und zwên hantschuohe, daz ist guot.
1581 Er singet den meiden allen vor
1582 Ze tanze, und möhten in enbor
1583 Alle mîn nâchgebûre tragen,
1584 Si têtenz". "Nu wil ich dir sagen:
1585 Ich weiz eine junge maget:
1586 Ist daz im diu wol behaget,
1587 Die sül wir im ze wîbe geben!"
1588 "Got helfe mir, herre, daz ir sült leben!"
1589 "So bestate ich in vil deste baz:"
1590 "Mit iuwerm urloub spriche ich daz:
1591 Ir tuot als iu wol ist geslaht!"
1592 "Nu fürhte ich daz ez werde naht
1593 Und muoz balde rîten von dir.
1594 Liebiu muome, nu gip mir
1595 Mînem pferde ein fuoter und mir ein huon!"
1596 "Zwâr, herre, daz wil ich gerne tuon!
1597 Wölte got, herre, hête ich des iht
1598 Des ir geruochet!" "Und lâ des niht
1599 Du nemest dînen wirt ze dir
1600 Und kumest eines tages heim ze mir,
1601 Und lâz uns trahten üm die maget,
1602 Von der ich dir nu hân gesaget!"
1603 "Herre, daz sül wir gerne tuon!"
1604 Er nimt sîn fuoter und sîn huon
1605 Und rîtet heim gein Hungertal,
1606 Dâ guotes und êren diu pfrüende ist smal
1607 Und unrâtes ein vollez hûs,
1608 In dem ofte manic mûs
1609 Getanzet und gereiet hât,
1610 So si anderswâ was worden sat.
1611 Dar nâch über siben naht
1612 Kumt sîn muome dar und hât brâht
1613 Vier kêse, zwei hüener und zwên teicscherren.
1614 Waz möhte dem knappen mêr gewerren
1615 Denne daz im guot gerête was tiure?
1616 Er nimt vil gern sôgetâne stiure:
1617 Üm die darf er den hals niht wâgen
1618 Und kan dem guote doch alsus lâgen.
1619 Der meier und sîn sun gênt ouch în:
1620 Si möhten dâheime lieber sîn.
1621 Si werdent gesetzet an daz affen ort,
1622 Die kost si geltent hie und dort.
1623 Nâch der meide wirt gesant.
1624 Diu kumt und hât erbeten gewant,
1625 In dem si lützel kan gebâren,
1626 Wenne bî allen iren jâren
1627 Kam an irn lîp sô guotes niht.
1628 Sô si denne Ruopreht an siht,
1629 Wes er gedenke, daz lâ wir sîn.
1630 Nach tische der meide friunde gênt în.
1631 Nu wirt Ruopreht berâten
1632 Von in oder gar verrâten.
1633 Der wirt spricht: "Ôheim Ruopreht,
1634 Dîner vürderunge hân ich guot reht:
1635 Daz ist diu maget von der ich dir
1636 Hân gesagt; nu geloube mir:
1637 Ir ungemach wêr mir alsô swêr
1638 Als ob si mîn tohter wêr!
1639 Mîner swester bruoder ir vater ist,
1640 Dem du niht gesippe bist
1641 Von dîner muoter alsô mir.
1642 Si heizet Geppe. Ouch sage ich dir
1643 Daz du vil friunde gewinnest von ir.
1644 Unsanft ich ir hie heime enbir:
1645 Mîn hûs was wol mit ir bewart,
1646 Si was irm vater und mir vil zart.
1647 Man hât uns vil üm si gebeten
1648 Und ein ganz jâr zuo getreten,
1649 Dâ was si dir von gote behalten:
1650 Der lâze iuch beide mit sêlden alten!
1651 Gê her und nim si ze rehter ê!"
1652 Wê dir, Ruopreht, wê dir, wê!
1653 Man drücket ein hant in die hant:
1654 Wêre künftigiu unsêlde dir bekant,
1655 Du strebtest als ein ohse wider,
1656 Als ein boc und als ein wider!
1657 Seht alsus wirt disiu ê gemacht,
1658 Als ez der knappe het ê erdâht.
1659 Nu werdent halp edel knehte
1660 Von Geppen und von Ruoprehte
1661 Geborn, die tuont vil rehte
1662 Nâch gickelvêhem geslehte.
1663 Waz ob Geppe treit ein kint,
1664 Sô si zesamen kumen sint,
1665 Daz über drî mânen wirt geborn?
1666 Wer sol daz ziehen âne zorn?
1667 Daz sol Ruopreht ze rehte,
1668 Wenne ez ist Benzen geslehte.
1669 Er ist sêlic, dem des geslehtes iht wirt,
1670 Daz sîn kint sô schier gebirt!
1671 Dirre gouch ziuhet jungiu göuchlîn,
1672 Von dem kumt meister Schöuchlîn,
1673 Hackentiufel und Röuchlîn,
1674 Knobelouch und her Löuchlîn,
1675 Fleckenkelch und Swellegrübel,
1676 Slickenpfîl und Helleschübel,
1677 Nimmervol und Schiuhenpfluoc,
1678 Zerrezsloz und Wolfesbuoc,
1679 Lêrenstal und Leibeniht
1680 Und manic ander bœsewiht,
1681 Gebûrnvînt und Galgenswengel,
1682 Lasterbalc und Rüdenbengel,
1683 Güsehals und Füllensac,
1684 Abelœser und Schiuhentac,
1685 Rossemort und Felschenwint,
1686 Âbrust, Slinthart und sîniu kint,
1687 Diepolt, Füllîn und Stenkezvaz,
1688 Rampolt, Stîgûf und Fröudenhaz,
1689 Krotenstuz und Slangenzagel,
1690 Schüttenwürfel und Pfaffenhagel,
1691 Landesmort und Buobenstrigel,
1692 Durchdenbusch und Zückedenrigel,
1693 Roubentisch und Setzepfant,
1694 Slîfenspiez und Rûmezlant,
1695 Brantrifier und Ludeber
1696 Vickelscherre und Wolenber,
1697 Vegenbiutel und Lêrenschrîn,
1698 Hebenstrît und Ûzundîn,
1699 Rampus, Mitezze und Nagengast,
1700 Zuckezswert und Galgenast,
1701 Widerspân und Stichenwirt:
1702 Diz ist daz volc daz zwirunt wirt
1703 Von armen liuten enpfangen,
1704 Ez kume geriten oder gegangen.
1705 "Dem tiufel von êrste und dar nâch got":
1706 Daz êrste ist ernst, daz ander spot.
1707 Sô kumt mîn herre her Schellehorn:
1708 Swer sprêche er wêre ein zwitorn,
1709 Der hêt lîp und guot verlorn,
1710 Wenne er rêche an im sînen zorn.
1711 Des vellet ir vil in des tiufels dorn,
1712 Swie vaste in klingen hie die sporn. -

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 07.05.2004