XX. Vo[n] closter leute leben

2889 Den pfaffen wil ich urloup geben
2890 Und grîfen an klôsterliute leben,
2891 Den nît und hôchfart aller meist
2892 Fremde machent den heiligen geist.
2893 Swenne klôsterliute, müniche und nunnen,
2894 Die der werlde sint entrunnen,
2895 Wider in die werlt trahtent
2896 Und irs ordens lützel ahtent,
2897 Die twinget ir gewizzen,
2898 Daz si gênt gebizzen
2899 In tiufellichen riuwen
2900 Als ob si senf kiuwen.
2901 In ist wê beidiu hie und dort,
2902 Wenne klôsterzuht und klôsterwort
2903 Hœrt man von in selten.
2904 Des muoz ofte engelten
2905 Manic wol gezogen klôsterman,
2906 Der sôgetân unzuht nie gewan.
2907 Wil er die wârheit sprechen,
2908 Zehant wöllen si sich rechen
2909 Mit hôchfart und nîtpickent ûf in:
2910 Diz ist ein tiufellicher sin,
2911 Swelch mensche haz gein dem treit
2912 Der im gan êwiger sêlikeit.
2913 Einen ieglichen orden lide wol hiute
2914 Ein frumman denne müelich liute:
2915 Die machent daz manigen frumen man
2916 Geistliches lebens riuwe gêt an.
2917 Ich wölte, swer sich wölte begeben,
2918 Daz er mit kummer sölte leben
2919 Vor siben jâr, als manic man
2920 Der vil selten ie gewan
2921 Gemach bî sînem gesinde,
2922 Denne daz er müeste swinde
2923 Den âbent und den morgen
2924 Mit kummer ein hûs besorgen:
2925 Swenne sich der begêbe hin nâch,
2926 Den diuhte alrêrst er hêt gemach,
2927 Swenne er niht sölte sorgen
2928 Und hin und her ûz borgen,
2929 Als er vil dicke hât vor getân
2930 Die wîle er was ein nôtic man.
2931 Swer von zarte in klôster vert,
2932 Dem ist sêlden vil beschert,
2933 Swenne er sich überwindet
2934 Und in im selber vindet
2935 Sich selber in gote, der dâ vor
2936 Hin und her fuor als ein rôr.
2937 Klœster, pfarre und bistuom
2938 Habent friunde, guot, êre und ruom
2939 Und mîdent doch die, von den si sint
2940 Gestiftet von êrste und alliu ir kint,
2941 Daz sint münche, pfaffen und nunnen:
2942 Den sint ir stifterin entrunnen,
2943 Die lange her vor manigen jâren
2944 Liep und zart irn vordern wâren:
2945 Die sint nu lützel ieman bekant.
2946 Nu merket wie si sîn genant:
2947 Diu êrste ist rehtiu Dêmuot,
2948 Diu ander willig Armuot,
2949 Diu dritte Barmherzikeit,
2950 Diu vierde rehtiu Einveltikeit,
2951 Ir muoter hiez Gedultikeit,
2952 Ir kelnerîn Durnehtikeit,
2953 Ir zuhtmeisterîn Bescheidenheit,
2954 Ir râtgebîn Gerehtikeit,
2955 Ir kamererin was Reinikeit,
2956 Kiusche was ir bestez kleit,
2957 Mâze ir underwîserîn,
2958 Ir schenke und ouch ir spîserîn.
2959 Tihten, schrîben, stille swîgen,
2960 Vasten, wachen, beten, nîgen,
2961 Zuht mit klôsterlicher scham,
2962 Vorhte in gotes liebe hât lam
2963 Ofte gemachet vil manige untugent,
2964 Diu pfaffen und münche twanc von jugent.
2965 [Ir sült wizzen daz müezikeit
2966 Aller sünden reizel treit].
2967 Gehôrsam was besliezerîn
2968 Der klœster hie vor und liez dar în
2969 Nieman durch senfte leben kumen:
2970 Nu habent ez manige unrehte vernumen
2971 Und wöllen in den klœstern baz
2972 Gezzen denne ir vater ie gâz.
2973 Die tuont anders denne künic Davît:
2974 Der slouf mit vorhten ze einer zît
2975 Vor künic Saul in ein grôz hol,
2976 Wenne des herze stuont niht wol
2977 Gein im; dô kam künic Saul hin nâch
2978 Ouch in daz hol durch sîn gemach
2979 Und weste niht daz er bî im was,
2980 Der ofte kûm vor im genas.
2981 Der künic Davîd slouf in ein hol
2982 Vor sînem vînde: seht alsô sol
2983 Ein sünder in ein klôster fliehen,
2984 Ê denne drî vînde in nâch in ziehen.
2985 Sîn fleisch, diu werlt, des tiufels rât
2986 Der manige sêle verleitet hât:
2987 Er sol niht sliefen in ein klôsterhol,
2988 Daz er des lîbes pflege wol
2989 Und die sêle lâze under wegen.
2990 Des lîbes siht man manigen pflegen
2991 Baz denne der sêle, daz riuwet mich:
2992 Der selben einer bin ouch ich.
2993 Kein dinc ûf erden nêher schirt,
2994 Denne swâ der mensche fleischlich wirt
2995 Der geistlich was und sölte sîn.
2996 Ô sünden val, ô helle pîn,
2997 Daz der mensche ie wart geborn,
2998 Der gerne wil werden verlorn!
2999 Swer sich der werlde wölle steln
3000 Und guot oder übel mit zühten heln,
3001 Der neme sich geistliches lebens an
3002 Ê denne diu wârheit vür den wân
3003 Ze rehter wîse werde bekant:
3004 Sô durchvert er manic lant.
3005 Swelch münich ûz sînem klôster loufet
3006 Und in der werlde sich besoufet
3007 Und niht durch got vert wider în,
3008 Der möhte lieber in der werlde sîn.
3009 Wil er mit werltlichen lêren
3010 Einveltiger münche muot verkêren
3011 Und sagt in anders denne er sol,
3012 Ze dem sprichet unser herre wol:
3013 "Von wanne kumstu, Satân?"
3014 "Die werlt ich ümmegangen hân,
3015 Herre, und durchvarn: ich bin kumen
3016 Vil mêre ze schaden denne ze frumen.
3017 Wenne ich ofte zestœre dîn lop
3018 Und vinde jungen noch alten Job."
3019 Dise rede muoz ich lân belîben.
3020 Wer wil, wer mac, wer kan geschrîben
3021 Wie vil unbildes der selbe Satân
3022 Bî gotes kinden hât getân
3023 Und leider alle tage tuot?
3024 Wol si, die vor im sîn behuot!
3025 Muotwille, unkiusche und eigenschaft
3026 Swachent klôster ordens kraft:
3027 Swer diu driu vermîden kan,
3028 Der ist ein rehter klôsterman.
3029 Kiusche, gehôrsam und armuot
3030 Sint allen klôsterliuten guot,
3031 Wenne alliu klœster sint gemacht
3032 Durch reinez leben und süeze andâht:
3033 Swelch münich der zweier niht enhât,
3034 Der ist niht visch biz an den grât.
3035 Uns schrîbet sant Gregorius
3036 Ûf Job in sînem buoche alsus:
3037 "In aller der heiligen schrift lêre
3038 Gert unser herre von uns niht mêre,
3039 Denne daz wir in von herzen grunde
3040 Liep haben und ze aller stunde
3041 Unsern ebenkristen durch in minnen
3042 Als uns selber, ûzen und innen."
3043 Swelch münich der wâren minne enbirt,
3044 Âne nuz er sîn hâr abe schirt.
3045 Wenne swer die wâren minne hât,
3046 Des herze ist ân missetât.
3047 Pfaffen und münche sölten sîn
3048 Gehülfic ein ander als diu swîn:
3049 Swer einen beswêrte, des sölten sich
3050 Die andern an nemen: nu dunket mich
3051 Sî einer des andern schaden frô,
3052 Jener fröuwe sich sîns ouch, kumt ez alsô:
3053 Des hât sôgetân bruoderschaft
3054 An stêter triuwe kleine kraft.
3055 Do der alte slange mit sînen genôzen
3056 Von himel wart herab gestôzen,
3057 Sînes lîbes wesen teilte er in driu :
3058 Nu merket alle, wem gab er diu?
3059 Den leien daz houbt ze teile wart:
3060 Daz houbt bezeichent die hôchfart;
3061 Den pfaffen wart daz mittel teil:
3062 Daz machet si frêzic unde geil;
3063 Sîn zagel, mit dem er nâch im zôch
3064 Vil der sterne, mac uns wol noch
3065 Nît und grôzen haz bediuten,
3066 Den man vindet bî klôsterliuten:
3067 Der wort, der werc, der reinez leben
3068 Glast als die sterne uns sölten geben,
3069 Den hât zorn, nît und arcwân
3070 Vil manic herzeleit getân:
3071 Des ist ir schîn vil sêre erblichen,
3072 Den nît und arcwân hât erstrichen.
3073 Arcwân in maniger kappen lûzet,
3074 Arcwân vil übeler gedanke mûzet,
3075 Arcwân unêrt vil manic reinez wîp,
3076 Arcwân verderbet sêle und lîp,
3077 Arcwân unschuldige liute schendet,
3078 Arcwân henket, trenket, blendet,
3079 Arcwân sünde und laster hordet,
3080 Arcwân roubet, brennet, mordet;
3081 Arcwân manigen münich vertrîbet
3082 Daz er in gote niht beklîbet,
3083 Den gotes dienest niht verdrüzze,
3084 Swer nîdes pfîle ûf in niht schüzze.
3085 Wenne ez hât ofte manic man
3086 Gein einem andern arcwân
3087 Und ist gein im gar ungedultic
3088 Und weiz doch niht ob er ist schuldic .
3089 Sôgetâns arcwâns hât er vil,
3090 Der metter rede gehorchen wil.
3091 Eyâ lieben klôsterliute,
3092 Die convent brüeder heizent hiute,
3093 Lobt got daz er iu hât gegeben
3094 Von sînen genâden ein reinez leben
3095 Und merket wie manige liute ûf erden
3096 Gestalt von grimmen sorgen werden!
3097 Wie der muoz wâgen sêle und lîp,
3098 Daz er sîn kint und sîn wîp
3099 Vor hunger und vor froste erner!
3100 Wie dirre nâch koufschatze über mer
3101 Sîn leben wâget, wie der guot hordet
3102 Mit diube, mit vürkoufe jenre mordet!
3103 Dirre wont bœsen herren bî,
3104 Des wirt er selten sorgen frî.
3105 Er fürhtet daz er sînen dienst verliese,
3106 Ob er einen andern herren kiese.
3107 Einer swert, der ander liuget.
3108 Biz er den liuten abe ertriuget
3109 Ir guot ân bürgen und ân pfant.
3110 Ê er vergülte, er rûmte ê daz lant
3111 Und wirt anderswâ gevangen,
3112 Geblendet, erstochen oder erhangen.
3113 [Die landes herren sölten sîn,
3114 Die lîdent ouch ofte manige pîn].
3115 Wizzet daz manige arme edel liute
3116 Mit grôzem kummer lebent hiute:
3117 Die roubent, pfendent und nement
3118 Sô lange biz daz si sich verschement
3119 Und schande vür êre sich nement an.
3120 Maniger heizet ein edel man,
3121 Des sêle vol bezzer wêre
3122 Er wêre ein wittragêre.
3123 Dar an sült ir gedenken
3124 Und sült iuwer herze senken
3125 Mit dêmuot zuo iu selber nider
3126 Und gein got ûf rihten wider!
3127 Und wizzet, swâ geistliche liute
3128 Fleischlich sint und freislich hiute,
3129 Daz die vil baz wêrn hie ûzen
3130 Denne daz wolfe in kappen lûzen:
3131 Wenne swer ûf bœse kündikeit
3132 Allez sîn getrehte leit,
3133 Der wirt selten heilic man
3134 Und hêt er siben kappen an.
3135 Dienet dem herren, der lônen kan
3136 Und sînen dienern guotes gan,
3137 Gein dem iuch nieman kan verliegen
3138 Und den kein metter kan betriegen!
3139 Sît iuwern prêlâten undertênic
3140 Und niht mit tratze widerspênic,
3141 Ob si üm vnzuht iuch wöllen büezen!
3142 Wenne si gote antwürten müezen
3143 Vür iuch und müezen iuch hie besorgen
3144 Mit flîze den âbent und den morgen.
3145 Sant Paulus an einer stat
3146 Uns allen alsô geschriben hât:
3147 "Swer rehtem gewalte sich widersetzet,
3148 Gotes ordenunge er letzet,
3149 Wenne reht gewalt von gote gêt,
3150 Dem nieman billich wider stêt."
3151 Münche, pfaffen und nunnen
3152 Habent lobes und êren genuoc gewunnen,
3153 Ob si behalten in gotes minne
3154 Swaz ir regel hât ûzen und inne.
3155 Swen ein sweizic kappe rœstet,
3156 Daz sich der sîner friunde trœstet
3157 Mêre denne sînes lebens heilikeit,
3158 Daz ist ein armiu freidikeit.
3159 Sint werltliche liute fleisch und bein,
3160 So sint geistliche weder holz noch stein:
3161 Des ziehent die vînde si ouch nider,
3162 Si setzent sich denne vaste wider.
3163 Swâ geistlich leben freislich wirt,
3164 Dâ fröuwet sich der helle wirt:
3165 Swâ freislich leben geistlich würde,
3166 Dâ swünde maniger sorgen bürde.
3167 Swelch münich sich sîner friunde rüemet
3168 Und sich selber mit lobe ûf tüemet,
3169 Der füerte billicher ein panzier an
3170 Denne daz er wêre ein münich nâch wân:
3171 Der merke wie got habe getân
3172 Sant Pêter und wie manic edel man
3173 Unter den zwelfboten wêr,
3174 Sô wirt sîn orden im niht swêr:
3175 Wenne der zwelfboten fünf sint
3176 Unsers herren muomen kint
3177 Und ist sant Pêter alsô wol
3178 Als in, des man gelouben sol.
3179 Swelch münich wider sînen orden strebet,
3180 Gar unsanft im der selber lebet.
3181 Swâ von ein man sîn êre hât,
3182 Schemt er sich des, daz ist missetât:
3183 Swelch münich sich schemt sîner kappen,
3184 Der rite gern mit reisigen knappen;
3185 Swelch pfaffe sich schemt sîner blatten,
3186 Des spil beginnet der tiufel matten.
3187 Swer sînes ordens wil geniezen,
3188 Den sol sînes ordens niht verdriezen.
3189 Swer wil haben geistlichez leben,
3190 Der sol niht valscher rête geben:
3191 Er wird anders in der helle
3192 Jûdas und Cayphas geselle.
3193 Swelch mensche hât swinden, valschen muot,
3194 Daz wirt niht guot, swie man im tuot:
3195 Tête man im hundert kappen an,
3196 Doch wêre sîn herze tugende wan:
3197 Er ist in klœstern als Jûdas
3198 Bî Cristo und sînen jungern was.
3199 Swer zühtic wêre, rein und guot,
3200 Der hête rehten müniches muot:
3201 Als heten wîlent edel liute.
3202 Swelhe sich noch trœstent hiute
3203 Irre friunde mêre denne gotes minne,
3204 Die wêrn baz hie ûze denne dort inne:
3205 Wenne ir wirt leider vil verlorn
3206 Und vallent in der helle dorn.
3207 Dâ von wizzet, vil lieben kint,
3208 Daz vierleie müniche sint,
3209 Als sant Benedictus uns schrîbet,
3210 Der niur ein schar bî gote belîbet:
3211 Von den ich nu niht sagen wil,
3212 Wenne der rede würde ze vil.
3213 Die uns guot bilde sölten geben,
3214 Der velschent genuoc ir selbes leben:
3215 Als der verrêter Jûdas,
3216 Der bî gote selber was
3217 Mit dem lîbe,und mit dem muote
3218 Trahtet nâch unrehtem guote,
3219 Wenne sîn herze was triuwen lêre.
3220 Swie er was Cristes kamerêre,
3221 Doch hete er diebes seckelîn
3222 Und legte den zehenden pfenninc în.
3223 Dâ von wuohs sîns herzen pêne,
3224 Dô Marîa Magdalêne
3225 Ein salben ûf Cristes houbet gôz,
3226 Daz er sô lützel des genôz.
3227 Diu was drier hundert pfenning wert:
3228 Wêr diu verkouft als er begert,
3229 Sô wêrn im drîzic pfenning worden:
3230 Üm die verkoufte er und liez morden
3231 Sînen schepfer, mit dem er âz.
3232 Diube und verrâten tuot niht baz.
3233 Swer sich erwiget daz er stilt,
3234 Ander untriuwe in niht bevilt.
3235 Dem tiufel was daz ouch vil liep,
3236 Daz Jûdas was von êrste ein diep
3237 Und dar nâch ein verrêter wart.
3238 Des sprichet sant Bernhart:
3239 "Ich enweiz niht bezzer liute ûf erden,
3240 Denne die man in klœstern frum siht werden,
3241 Und weiz niht erger denne die drinne
3242 Nement ab an gotes minne".
3243 Ich enwêne niht daz kein orden sî,
3244 Ern habe einen, zwên oder drî
3245 Die klôster leben schelten:
3246 Des ensüln die niht engelten,
3247 Die gern ir reht behalten
3248 Und klôster zühte walten.
3249 Got machte ze himel den êrsten orden:
3250 Des ist ein teil ze tiufeln worden;
3251 Dar nâch in dem paradîse
3252 Machte er einen: der beleip niht wîse;
3253 Den dritten machte er ûf erden.
3254 Der enmohte bi im sô veste niht werden
3255 Ez enviel der ein, der in verriet,
3256 Als ich iu dâ vor beschiet.
3257 Kappen und swestermentellîn
3258 Bedeckent manic wentellîn:
3259 Under gotes banier manic schande
3260 Vert mit geleite von lande ze lande.
3261 Manic mensche gebârt als ez sî guot,
3262 Daz doch hât vil swinden muot,
3263 Den ez ûf manic untugent neiget
3264 Die ez niht offenbâr erzeiget:
3265 Diz dunket guot und ist niht guot,
3266 Wenne ez diu dinc verholn tuot
3267 Der ez sich immer müeste schemen,
3268 Ob frume liute si vernêmen.
3269 Swer denne durch êre und senftez leben
3270 Pfaffe ist oder sich hât ergeben,
3271 Dem bittert honic und süezet gift
3272 Und volget wênic der heiligen schrift.
3273 Swer süezer liebe gein gote wil walten,
3274 Der mac wol lîp und sêle behalten
3275 In ieglichem orden: und ouch verliesen ,
3276 Wil er vür tugent untugent kiesen.
3277 Manic sêle verliuset gotes hulde
3278 Leider von des lîbes schulde,
3279 Wenne ist ein mensche der sêle flîzic,
3280 Sô vinde wir zweinzic oder drîzic
3281 Die der sêle gar lützel ahtent
3282 Und niur des lîbes nôt betrahtent.
3283 Leit ist mir und von herzen zorn,
3284 Daz manic hantveste wirt verlorn
3285 Und verdirbet in maniger stift
3286 Von den leider, die ir schrift
3287 Und ir kraft niht wol verstênt
3288 Und doch des almuosens sich begênt,
3289 Daz mit den briefen ist bewêrt.
3290 Von herzen grunde mich beswêrt,
3291 Swâ gar unversunnen liute
3292 Sôgetâner ampte pflegent hiute,
3293 An den ir weder êre noch frumen
3294 Gewinnent alle ir nâchkumen.
3295 Ein grôz unbilde tuon ich iu kunt,
3296 Daz einem klôster tûsent pfunt
3297 Und der zuo mêre tet schaden ein man
3298 Mit diube, den ich gesehen hân,
3299 In dem er was von kinde erzogen:
3300 Kappen habent liute vil betrogen.
3301 Ein mermelîn siule helt einen kôr
3302 Vol lenger ûf denne tûsent rôr:
3303 Alsô heltet ein wîser amptman
3304 Ein klôster ûf, swer den vinden kan.
3305 Nieman kan sicher ûf erden belîbe,
3306 Die wîle diu sêle ist in dem lîbe :
3307 Des valle wir von manigen sachen
3308 In brunnen, in dorn, in sünden lachen.
3309 Des ist nôt daz uns bekêre
3310 Pfaffen und klôster liute lêre,
3311 Die got ze spiegeln hât gegeben
3312 Der werlde mit lêre und ouch mit leben;
3313 Und ob ir einer missetuot,
3314 Daz sol niht swachen uns den muot,
3315 Volgen wir der guoten lêre nâch.
3316 Wenne meister Kato wilent sprach:
3317 "Alein wir uns ein ander schelten,
3318 Doch lebt âne wandel ieman selten":
3319 Wenne manic mensche sich bekêrt,
3320 Daz got baz zem êrsten êrt
3321 Einen mânen stille und offenbâr
3322 Denne dar nâch über zehen jâr.
3323 Ich hân wol zwirunt daz gesehen -
3324 Und mac vil lîhte ouch noch geschehen -

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 07.07.2004