XLV. Von den raubern vn[d] von der dieb geitikeit.

6727 Ûz der rede bin ich gevarn:
6728 Die wirfe ich wider in den barn
6729 Und grîfe die gîtikeit wider an,
6730 Als ich dâ vor gelobet hân.
6731 Swer niht enhât und haben muoz,
6732 Dem wirt vil selten sorgen buoz
6733 Und muoz lîden unwerden gruoz:
6734 Dâ von hât vil breiten fuoz
6735 Diu gîtikeit über alliu lant,
6736 Als uns allen ist bekant.
6737 Des ist vil rouber unde diebe,
6738 Die dem tiufel tuont vil liebe
6739 Swenne si sich ze im gesellent,
6740 Sô si daz antlütze hie verstellent
6741 Und unbarmberziclîchen
6742 Iren ebenkristen jêmerlîchen
6743 Üm sîn eigen guot hie vâhent.
6744 Roufent, würgent, slahent.
6745 Stimme und varwe sich an in wandelt,
6746 Swenne unmenschelich wirt gehandelt
6747 Von in ein mensche ân alle schulde.
6748 Dem tiufel habent si gesworn hulde:
6749 Die wöllen si stête gein im behalten
6750 Biz si mit im sînes rîches walten:
6751 Sô wirt irs dienstes in gelônet,
6752 Swie lange ir got ûf erden schônet.
6753 Swer diube und roubes sich begêt,
6754 Selten er âne vorhte stêt.
6755 Von roube, von brande und von reisen
6756 Wirt vil witwen unde weisen,
6757 Die nâch râche inz himelrîche
6758 Gein gote schrîent êwiclîche.

XLV Von der Raise.

6759 Von reisen hœre ich niht mêr sagen
6760 Denne dort hin triben, dâ her jagen,
6761 Hurten, klingen, schallen, singen,
6762 Loufen, springen, roufen, ringen.
6763 Drücken, dringen, zücken, twingen,
6764 An allen dingen schrecken bringen,
6765 Übel sprechen, hâhen, vâhen.
6766 Stechen, brechen, gâhen, slahen,
6767 Schiezen, niezen, diezen, brehten,
6768 Ziehen, fliehen, stürmen, vehten,
6769 Unfuor trîben. slinden, frezzen,
6770 Zuht und êren und gotes vergezzen:
6771 Sôgetân schal hât manic urbur
6772 Gemachet vil smal, wenne reise unfuor
6773 Hât verderbet manigen man.
6774 Niht wol man daz bewaren kan,
6775 Swâ volkes grôziu menige sî,
6776 Dâ sî ouch schade und schande bî:
6777 Wenne maniger mit den herren vert,
6778 Dem selten iht êren ist beschert
6779 Denne daz er kûme sich ernert
6780 Und sîn leben in jâmer zert :
6781 Dem wêr vil bezzer daz er wêr
6782 In einem walde ein clôsener,
6783 Denne daz er treit einen schepeler
6784 Und ist des tiufels marterer,
6785 Der noch hât manigen cappellân,
6786 Die mit wîten ermeln an
6787 Röcke tragent und gênt in kappen,
6788 Als von rehte des tiufels knappen.
6789 Der selben ist lützel im entrunnen,
6790 Wenne si vallent in den brunnen
6791 Der êwigen unsêlikeit
6792 Durch hôchfart und durch gîtikeit:
6793 In wirt diu helle ûf erden sûr
6794 Ê denne si werden nâchgebûr
6795 Jens swarzen, der mit sinen genôzen
6796 Von himel wart herab gestôzen.
6797 Süln die niht zwirunt unsêlic sîn,
6798 Der fleisch ûf erden hie hât pîn
6799 Und doch der sêle müezen angest haben,
6800 Swenne si des nahtes müezen draben
6801 Durch engez tal und vinstern walt
6802 In des tiufels dienste, des gewalt
6803 Ze der zît aller grœste ist?
6804 Lâ dich erbarmen, herre krist,
6805 Daz der mensche ie wart geborn,
6806 Der hie und dort hât dînen zorn!
6807 Swem triuwe, zuht und bescheidenheit
6808 Leident und wâriu einveltikeit
6809 Und die sich gar verschemet haben,
6810 Die süln mit bœsen herren draben.
6811 Swes man mit ihte enberen mac
6812 Ze hofe, dem kêrt man gerne den nac.
6813 Manic dinc man wîlent über sach
6814 Durch got, durch êre und durch gemach,
6815 Des man nu niht wil übersehen -
6816 Des hœre ich manigen diener jehen -:
6817 Diz kumt von grimmer gîtikeit,
6818 Diu aller schanden banier treit.
6819 Swer gern habe ungerüewic leben,
6820 Der sol nâch grôzen êren streben,
6821 Swer aber gern sî mit gemache,
6822 Der diene gote under einem obedache
6823 Und lebe im sanfte an einer stat.
6824 Daz mere vil bitters wazzers hât :
6825 Dirre werlde untriuwe bediutet daz mer:
6826 Der wirt niht minner denne leider mêr,
6827 Swâ grôz urliuge und kreftic her
6828 Ze lange setzent sich ze wer.
6829 Die juden branten wîlent gern
6830 Böcke, rinder unde stern,
6831 Daz süezer smac und rouch ûf gienge
6832 Gein himel, den got ze lobe enpfienge :
6833 Tymiân, mirren und wîrouch
6834 Brenne wir kristen, daz ir rouch
6835 Und unser gebete gein himel ûf ziehe,
6836 Daz si der tiufel und sîn here fliehe:
6837 Nu brennet man schiuren und ruozigiu dach
6838 Und manic armer liute gemach,
6839 Die frostic, hungeric unde blôz
6840 Beteln gênt, der leit vil grôz
6841 Ist üm ir kleiniu kindelîn,
6842 Diu arm und ellende müezen sîn:
6843 Sôgetânen rouch sol der enpfâhen,
6844 Ze dem man siht dise brenner gâhen.
6845 Got herre, lâ dir geklaget sîn,
6846 Daz arme liute sô manige pîn
6847 Lîden müezen üm ir guot,
6848 Und daz der mensche in schaden tuot
6849 Dem nie kein leit von in geschach!
6850 Swer lîdet unbillich ungemach,
6851 Dem ist vil wirs denne der ez hât
6852 Verdient mit sîner missetât.
6853 Niht geschiht ân sache ûf erden:
6854 Daz wir siech oder arm werden,
6855 Daz kumt ofte von unsern schulden:
6856 Des sül wir ez deste gerner dulden.
6857 Unbildes hân wir vil gesehen,
6858 Doch ist sîn mêre hie vor geschehen
6859 Ê unser herre wêre geborn:
6860 Wenne er rach ofte sînen zorn
6861 Ân alle barmherzikeit,
6862 Als dô her Samgar wîlent streit
6863 Und sehs hundert man ersluoc
6864 Mit einem seche. Wie vertruoc
6865 Sampsôn daz man im hete getân,
6866 Der mit ein ander tûsent man
6867 Sluoc mit eines esels kinbracken
6868 Und ûf der erden si liez stracken?
6869 Diu kraft lac niur an siben hâren,
6870 Diu mitten ûf sînem wirbel wâren!
6871 Waz krefte hete im dô got gegeben,
6872 Dô manic hundert mensche ir leben
6873 Verlurn die ein sal erdructe,
6874 Dô er zwuo siule zesamen ructe?
6875 Unser herre liez wîlent grôzen mort
6876 Ofte geschehen üm ein wort.
6877 Kranken frouwen gab er den sin,
6878 Daz starke fürsten ouch von in
6879 Getursticlîche wurden erslagen:
6880 Diz hœre wir noch von Judith sagen,
6881 Die herzogen Olofernen sluoc
6882 Und mit ir heim sîn houbet truoc.
6883 Waz tete Jahel hern Sysarê,
6884 Dem rihter, dô im durst tete wê
6885 Und üm einen wazzers trunc si bat?
6886 Dem gap si milch, und an der stat
6887 Dô er getranc, legte er sich nider
6888 Und slief. Zehant gienc si hin wider
6889 Und sluoc einen nagel im durch sîn houbt.
6890 Von einem wîbe wart er betoubt:
6891 Der gar freidic und übel was
6892 Und maniger grôzen dinge genas,
6893 Der lac als ein buobe dâ tôt:
6894 Ein trunc brâhte in ze dirre nôt.
6895 Reise kan maniger unsêlden walten:
6896 Swaz arme liute haben behalten
6897 In welden, in velsen, in talen, in gruoben,
6898 Daz siht man leider freidige buoben
6899 Sô gar ûz strîchen und durch varn
6900 Daz wênic ieman sich kan bewarn,
6901 Wenne die selben ofte nement
6902 Manic dinc des sich die frumen schement.
6903 Spil, diube, luoder und gîtikeit
6904 Bringent si ze dirre freidikeit,
6905 Und daz die herren si sehen gern.
6906 Die sprechent si mügen ir niht enbern.
6907 Manic ahpêr herre hât buoben muot:
6908 Alein er habe friunde und guot,
6909 Doch ist sîn herze niht als ez sölte,
6910 Ob er nâch tugenden trahten wölte.
6911 Swenne ein lanttwinger an siht
6912 Sîn bürge, sîn lant, sô dunkt in niht
6913 Daz ieman ûf erden sî sîn gelîch,
6914 Er enwölte niht sîn ze himelrîch
6915 Daz er der armen glôrien enbêr:
6916 Waz ob der niht ein quâtsac wêr
6917 Und lenger denne wir sölte leben?
6918 Wie sêre begönde er denne streben !
6919 Wem sölte gein im niht grûwe,
6920 Der griulich als diu hûwe
6921 Die winbrâen über ziuhet
6922 Und alle tage sich riuhet
6923 Als ein hunt der bîzen wil?
6924 Rehtiu kurzwîle und fröuden spil
6925 Gênt sîn herze vil wênic în.
6926 Swenne er gêt wetzende als ein swîn
6927 Und dar zuo limmende als ein ber
6928 Vor tratzer hôchfart hin und her,
6929 Sô dunket in selber er sî ein got.
6930 Wer hêt ûz dem niht sînen spot,
6931 Der ein mensche ist und erger vil
6932 Denne ein mensche wesen wil
6933 Und erger denne der tiufel ist,
6934 Wenne er betwungen ze aller frist
6935 Armer liute dienst wol nemen?
6936 Der freidikeit möhte er sich schemen,
6937 Wenne der tiufel twinget uns niht
6938 Daz wir im dienen denne als er siht
6939 An uns: dar zuo gibt er uns rât
6940 Und locket uns in die missetât:
6941 Er twinget uns niht wider unsern willen
6942 Als dise, die nieman kan gestillen
6943 Ûf erden denne der tôt aleine.
6944 Ir herze sint sô gar unreine.
6945 Swer sôgetânen prêln die wârheit sagt
6946 Getursticlich und unverzagt,
6947 Dem wöllen si sîn leben nemen.
6948 Sô si sich selber müezen schemen
6949 Daz diu rede ist ungelogen,
6950 So beginnent si mit worten brogen
6951 Von rouben, brennen und von slâhen,
6952 Von verrâten und von vâhen:
6953 Des muoz vil manic guot man swîgen
6954 Und irm gruoze tiefe nîgen
6955 Mêre durch vorhte denne durch güete.
6956 Er gedenket aber doch in sînem gemüete:
6957 "Wê wie ein mördisch diep du bist
6958 Und wie manic valscher list
6959 In dînem herzen lît behalten!
6960 Sô dîn der tiufel müeze walten!
6961 Wes gêstu ruckûzen hin und her
6962 Als ûf einem simze ein kirchtûber ?
6963 Nu ist dîn herze gar tugende lêr
6964 Und dunkest dich doch gar ahpêr!''
6965 Mir biutet sînen dienst manic man,
6966 Und brêhte der selbe mîn pfert hin dan
6967 Und ouch mich selber eine raste,
6968 Ich wêre baz bî dem Nagengas t e.
6969 Got müeze beschirmen mich vor in!
6970 Irs dienstes hât selten ieman gewin,
6971 Die lachende mit den liuten ezzent
6972 Und triuwen und êren schier vergezzent.
6973 Si dienent als ir gewonheit ist:
6974 Swer si zuo went ze langer frist,
6975 Der nimt mêre schaden denne frumen,
6976 Als ich die wârheit hân vernumen.
6977 Getriuwer herren meine ich niht,
6978 Ir ist aber lützel als man giht.
6979 Swer roubet, mordet oder brennet,
6980 Vil selten leider der bekennet
6981 Waz er sî und waz er werde:
6982 Sîn trôst lît mêre an sînem pferde
6983 Denne an einem grôzen schrîne vol
6984 Heilictuoms. Ir wizzet wol,
6985 Daz sôgetân liute halp wilde sint
6986 Und ziehent ander wildiu kint.
6987 Diu tuont ouch als man vor in tuot .
6988 Ir etslichez würde vil lîhte guot,
6989 Wêr ez bî liuten in der jugent
6990 Die zuht ez lêrten unde tugent:
6991 Doch swer ein obez trüege gein Berne,
6992 Ez smacte nâch sînem stamme gerne;
6993 Hât aber ein wölfelîn wolfes site,
6994 Dâ wont niht grôzes wunders mite.
6995 Ungetriuwer rouber leben
6996 Hât got den sînen niht gegeben :
6997 Man siht si selten alsus streben,
6998 Si gênt und stênt und sitzent eben
6999 Und trahtent selten als jene,
7000 Wie dirre den würge, der disen dene
7001 In schimpfe, in ernst, ân alle zuht.
7002 Man bekennet den boum bi sîner fruht.
7003 Die tiufel sint fride und ruowe gram,
7004 Sô tuont ir diener reht alsam,
7005 Die selten ieman gerüewic siht.
7006 Si lachent, swenne ieman wê geschiht.
7007 Des sint si wol des tiufels kint,
7008 Die freidic als die tiufel sint.
7009 War wil der in der helle tücken,
7010 Der den huot hie vür muoz rücken
7011 Daz die liute in niht erkennen
7012 Und sînen namen ouch niht nennen?
7013 Swelhe sich alsô bergen müezen,
7014 Die mügen wol schâch mit schanden büezen:
7015 Alein wir si nâch êren grüezen,
7016 Doch lît ir lop uns under den füezen.
7017 Getriuwe liute meine ich niht.
7018 Wenne ofte leider daz geschiht,
7019 Daz sich bergen muoz ein man
7020 Der nieman schaden hât getân,
7021 Daz er iht werde von den gevangen
7022 Die er ofte hât güetlich enpfangen,
7023 Oder daz ein anderre in iht verrâte
7024 Der bî im wont fruo und spâte.
7025 Stolzierer, trinker und nahtgengel,
7026 Des tiufels diener und sîn engel,
7027 Werdent ofte galgenswengel :
7028 Swenne in swert, spiez und bengel
7029 Vor gerihte müezen enpfallen,
7030 War kumt denne ir neckisch kallen?
7031 Swer bœslich ûf ein lougen tuot,
7032 Der gewan nie frumes mannes muot :
7033 Und wêr er künic Davîdes kint,
7034 Er wêr an mannes tugende blint
7035 Und wêr luoder und diebe genôz.
7036 Swer ouch twinget einen klôz
7037 Zwischen armer liute tür,
7038 Daz si verbrinnen und niht her vür
7039 Mügen kumen, der ist geselle
7040 Diebe und morder in der helle,
7041 Ist daz er alsô erstirbet
7042 Und niht gotes hulde erwirbet.
7043 Der bœse tuot nimmer frumeclîchen
7044 Noch der frume lesterlîchen:
7045 Twinget man in daz er übel tuot,
7046 Dennoch entschuldiget in sîn muot.
7047 Swer sich offenbar gerichet
7048 An sînem vinde und denne sprichet
7049 "Wizzet, daz hân ich getân",
7050 Den heize wir einen frumen man:
7051 Swer aber dieplich sich gerichet
7052 Und denne offenlichen sprichet,
7053 Er wölle gern dâ vür gerihten,
7054 Den sül wir gelîchen bœsewihten,
7055 Swen man aber hœrte sprechen
7056 "Ich möhte mich wol an iu gerechen,
7057 Daz wil ich rehte lân durch gott",
7058 Der wêre maniger liute spot
7059 Und hête sich doch vil baz gerochen
7060 Denne ob er drîzic hêt erstochen.
7061 Swer sîn râche got ergît,
7062 Der wirt gerochen an der zît,
7063 Sô ez im aller beste füeget:
7064 Wol im, den dâ mit benüeget!

XLVII Ein mer vo[n] dieben vn[d] von bo[e]sen wichten.

7065 Wîlent was diube sünde und schande
7066 Und swâ man einen diep erkande,
7067 Der was unwert und ungenême
7068 Und frumen liuten widerzême.
7069 Nu ist ez worden ein kluokeit,
7070 Behendikeit und gefuokeit,
7071 Swer sîn diube kan verheln
7072 Und vürbaz ûf ein lougen steln;
7073 Und der gein dem gelachen kan,
7074 Dem er den schaden hât getân;
7075 Und den klaget mit valschem munde,
7076 Des guot er ze der selben stunde
7077 Vil schentlich hât dâ heime verborgen;
7078 Und disen lêt in grôzen sorgen,
7079 Der im nie kein leit getet.
7080 Wê, wie mit grôzen êren er gêt
7081 Ûzen, rouber oder diep,
7082 Des sêle dem tiufel ist innen liep!
7083 Zweierleie diebe stelent,
7084 Die schande under êren mantel helent:
7085 Daz sint frumer liute kint
7086 Und pfaffen, die gewîhet sint:
7087 Dise trœstent sich der wîhe.
7088 Truz und traz, daz ieman zîhe
7089 Eins ritters und eins burgers sun,
7090 Daz si lesterlichen tuon!
7091 Dar zuo wêrn si und ir gewant
7092 In der stat ze wol bekant,
7093 Swenne si dort als die pfâwen gênt,
7094 Die nahtes den dieben bî gestênt.
7095 Wizzet daz vil manic schande
7096 Wirt bedact in schœnem gewande,
7097 Und daz in armer wête sint
7098 Ofte heiligiu gotes kint.
7099 Man êrt manigen durch sîn guot
7100 Der selten tugentlîchen tuot,
7101 Sô gêt maniger in bœser wête
7102 Der bœslich doch ungerne tête:
7103 Alein er arm si des guotes,
7104 Doch ist er tugentrîch des muotes.
7105 Schalkes herze hât manigen wanc,
7106 Dâ von sprach her Frîdanc .
7107 "Slüffe ein schalc in zobels balc,
7108 Dennoch wêr er drinne ein schalc."
7109 Diube ist ein lesterlicher site,
7110 Dem vil untugende volgent mite.
7111 Swelch mensche ist ein erwegen diep,
7112 Dem ist nieman ûf erden liep;
7113 Vater, muoter, eigen kint
7114 Dem diebe gelîch gewegen sint;
7115 Swenne er wil steln und stelen mac,
7116 Sô kêrt er triuwen und êren den nac;
7117 Heiligiu zît und heiligiu stat
7118 Irrent selten diebes pfat.
7119 Selten wirt sîn heil gemêrt,
7120 Swer heilige stat und zît niht êrt:
7121 Er fürhtet die werlt mêr denne got,
7122 Friundes triuwe ist in im tôt.
7123 Sîne friunde er selten wol betrahtet,
7124 Swer êwiger sêlikeit niht ahtet.
7125 Übel und guot er gelîche wiget,
7126 Swer sôgetâner dinge pfliget.
7127 Des kumt vil manig unsêlikeit
7128 Von diube und manic herzenleit.
7129 Ich hân gelesen daz bie vor
7130 Ein man, der was genant Achor,
7131 Einen pfellerînen mantel stal
7132 Und ander dinc, daz er ouch hal
7133 Ê denne diu diube würde funden.
7134 Dar nâch in vil kurzen stunden
7135 Verlurn sehs und drîzic man
7136 Ir leben, als ich gelesen hân,
7137 Üm die selben missetât,
7138 Dô Jerichô diu rîche stat
7139 Von gotes gewalte wart zebrochen
7140 Und unser herre het gesprochen,
7141 Daz nieman sölte des roubes nemen.
7142 Des muoste Achor aleine sich schemen,
7143 Dô er der diube gihtic wart.
7144 Des fuorte man in ein übel vart
7145 Ze velde, dâ man ûf in aleine
7146 Warf einen hûfen grôzer steine.
7147 Sîn gesinde, sîn wîp, kint und vihe
7148 Hiez man ouch ze velde ziehe,
7149 Und allez daz er hete verstoln
7150 Daz wart gebrant in vrischen koln.
7151 Swer noch diube gienge nâch
7152 Und si rêche als dâ geschach,
7153 Sô müeste vil maniger lân sîn steln,
7154 Dem sîn friunde helfent heln.
7155 Ein diep des dennoch niht vergiht,
7156 Daz man hœret, weiz und siht:
7157 Sölte er denne des verjehen,
7158 Daz nieman hœrt noch hât gesehen?
7159 Mit lôze wart Achors diube funden:
7160 Spülgte man des joch ze den stunden
7161 Und rihtet man als man ze rehte sölte
7162 Manic ahpêr diep des niht wölte.

XLVIII Ein mere vo[n] einem dieb der snait seinem weibe di o[e]rn ab.

7163 Ein unbilde ich vernumen hân,
7164 Daz sagte ein geistlich frumer man,
7165 Ez wêre geschehen in Franken land.en
7166 Bî den die in dâ wol erkauden:
7167 Ez was ein schedelicher diep,
7168 Der selten ieman tete kein liep.
7169 Der het ein wîp, diu was sô reine
7170 Daz si mit im kein gemeine
7171 An sîner diube haben wolte,
7172 Der lônte er anders denne er solte,
7173 Wenne er diu ôren ir abe sneit
7174 Dâr üm daz ir sîn diube was leit.
7175 Nu fuogte sich daz er wart gevangen
7176 Und ê denne er würde erhangen
7177 Dô sprach er, daz si balde viengen
7178 Sîn wip und si ê denne in erhiengen,
7179 Wenne si vil erger wêre denne er.
7180 Man lief nâch ir und brâhte si her.
7181 Diu arme frouwe weinte und swuor,
7182 Daz ie und ie irs wirtes unfuor
7183 Von herzen leit ir wêre gewesen.
7184 Dô man si wolte lân genesen,
7185 Dô sprach der diep: "Beseht ir tôrn
7186 Von êrste, ob si noch habe zwei ôrn!
7187 Hât si diu, sô sît gedultic,
7188 Sô ist si mîner diube unschuldic.
7189 Sint aber diu ôren ir abgesniten,
7190 Sô hâhet si vor, des wil ich biten!"
7191 Dô si der ôren niht ensâhen,
7192 Zehant hiez si der rihter hâhen.
7193 Dô sprach der diep: "Als wêrlich got
7194 In himel lebt, sô ist si tôt
7195 An alle schnlde, wenne ir was leit
7196 Mîn diube, dâr üm ich ir abe sneit
7197 Diu ôren daz si niht wölte mit mir
7198 Ezzen und trinken. Nu seht ir.
7199 Wie si daz leben hât verlorn!"
7200 Leit was in allen und vol zorn
7201 Ûf den diep: der wart erhangen.
7202 Dô kâmen der frouwen friunde gegangen
7203 Mit grôzem jâmer und nâmen si abe.
7204 Diu wart vil schôn bestatet ze grabe.
7205 Got herre, waz herzen hât der man
7206 Der übels sînem ebenkristen gan,
7207 Swenne er den tôt muoz sehen an
7208 Dem er ouch niht entrinnen kan,
7209 Als dirre morder hât getân
7210 Von dem ich diz geschriben hân!
7211 Untugent was ie tugenden gram,
7212 Diu selbe der frouwen ir leben nam.
7213 Wizzet swer sîn herze leit
7214 Ûf unmenschliche freidikeit,
7215 Ûf hôchfart und ûf gîtikeit
7216 Und ouch ûf bœse kündikeit,
7217 Daz dem von herzen grunde ist leit
7218 Zuht, triuwe und wâriu reinikeit.
7219 Sîn giftig zunge ist ûzen honic,
7220 Sîn fröuden walt ist innen ronic,
7221 Sîns lachens schîn ist wolkenbrustic,
7222 Sîn friuntlich rât ist gar unkustic:
7223 Nieman sîn leben loben sol,
7224 Des herze sô maniger untugent ist vol.
7225 Der kristen ist erger denne ein heiden
7226 Und ist von Judas niht gescheiden,
7227 Der mit mir izzet oder trinket
7228 Und sînen gesellen dar nâch winket
7229 Und sprichet: "Gêt her unde sehet:
7230 Ein dinc hân ich uns erspehet,
7231 Wie wir disen man gewinnen
7232 Daz er nimmer uns kan entrinnen!
7233 Wêr aber daz er uns entrünne,
7234 Sînes guotes ich dennoch wol gewünne
7235 Sô vil, daz wir dester baz
7236 Fiieren: dô ich mit im âz.
7237 Dô marcte ich allez daz er hête!"
7238 Ô verfluochten valschen rête!
7239 Waz ir herzeleides ahtet
7240 Dem, der swinde nâch guote trahtet!
7241 Swaz man dem übeln guotes tuot,
7242 Daz ist verlorn, wenne sîn muot
7243 Ist ûf übel sô gar gesenket,
7244 Daz er guottête niht gedenket.
7245 Hôchfart, zorn, nît und haz
7246 Gebent manigen rehten dingen ein daz
7247 Und wizzen doch wol daz si liegent,
7248 Swenne si von grôzer untugent kriegent.
7249 Manic lügen wirt ofte getân
7250 Verholn ûf manigen frumen man,
7251 Die man ân zwifel gar verbêre
7252 Und ob er gegenwertic wêre:
7253 Des habe der metter zunge undanc!
7254 Ez sprach der werde Frîdanc:
7255 "Het ich einen îsenhuot
7256 Der mir wêr vür lügen guot,
7257 Und einen schilt vür schelten,
7258 Den wölte ich tiure gelten ;
7259 Und einen turn vür trûren,
7260 Den wölte ich hôhe mûren;
7261 Und ein hûs vür ungemach,
7262 Dem liez ich selten fûlen daz dach;
7263 Und vür arger liute unkust
7264 Ein widerschiezende armbrust,
7265 Daz könde mir nieman vergelten,
7266 Ez sölte ouch von mir kumen selten".
7267 Swer gîtikeit und erge hât,
7268 Daz ist wurzel aller missetât.
7269 Diu kristenheit gar wol enbêr
7270 Valscher rihter, diebe, rouber,
7271 Sô würde guot rât daz nimmer wêr
7272 Verrâter, trügener und meineider:
7273 Der enbêre man aller wol.
7274 Nu ist diu werlt ir sô vol,
7275 Daz manic herre si muoz haben.
7276 Daz dise tiufel gein jenen draben ;
7277 Manic herre ir doch vil gern enbêr,
7278 Wêren ander liute im niht gevêr.
7279 Got hât evangelier,
7280 Priester und episteler,
7281 Sô hat diu werlt platner,
7282 Halsperger und schuopeler:
7283 Die sint alle gotes knehte.
7284 Ob si leben nâch dem rehte
7285 Als stôle und swert in wirt gegeben,
7286 Sô strâfe si nieman üm ir leben.
7287 Vor jenen treit man gotes vanen,
7288 Vor disen banier, die si manen
7289 Daz si striten üm daz reht.
7290 Swer gote dient, der ist sîn kneht.

XLIX. Vo[n] raubern vn[d] vo[n] Ludrern vn[d] von stelern.

7291 Swer roubet, luodert unde stilt,Bauernfolter, Jb, f. 62r
7292 Gesuochet, borget unde spilt
7293 Und niht willen hât ze gelten,
7294 Der sol ze himel kumen selten.
7295 Ist er gein gote niht erblindet,
7296 In dem sîn minne gar verswindet
7297 Daz er sînen ebenkristen schindet
7298 Von sîner habe und in denne bindet
7299 An einen boum und in den munt
7300 Einen klôz im twinget? Und wêrz ein hunt,
7301 Ez möhte einen wilden heiden erbarmen,
7302 Sô man die unschuldigen armen
7303 Vindet sô jêmerlich gevangen,
7304 In den egedehsen, kroten und slangen
7305 Habent ir nest und den daz bluot
7306 Ze den nageln ûz gêt: swelch mensche daz tuot
7307 Ûf den sölte man daz kriuze vil mêr
7308 Predigen denne dort über mer
7309 An tatan, valwen und an heiden,
7310 Der geloube von uns ist gescheiden!
7311 Wöllen dise kristen bî uns sîn
7312 Und wöllen als unmenschliche pîn
7313 Legen an unsern ebenkristen,
7314 Wer sölte ir leben denne fristen?
7315 Swer in sinem zorne sich gerichet
7316 Und einen ersleht oder erstichet,
7317 Der mac erwerben ê gotes hulde
7318 Denne dise, die ân alle schulde
7319 Die liute roubent gîticlich
7320 Und si denne mordent jêmerlich.
7321 Si fürhtent die werlt mêr denne got:
7322 Des lît manic unschuldic mensche tôt
7323 Von in in strâzen, in welden, in velden,
7324 Des schrîen si fürhtent und sîn melden.
7325 Swer roubens und stelens sich erwigt,
7326 Mordens er leider ofte pfligt.
7327 Diebe, luoderer und schâchrouber
7328 Sint mit dem willen vor morder
7329 Swenne einer gedenket, ê denne ich
7330 Üm dise tât lieze melden mich,
7331 Ich nême dem melder ê den lip
7332 Vor, ez wêre man oder wîp.
7333 Alsô briuwet ein sünde ein ander sünde,
7334 Als ich von künic Davîd iu künde.
7335 Dô der wart ein êbrecher
7336 Vil schier wart er ouch ein morder,
7337 Dô er erslahen hiez Uriam,
7338 Dem er vor sîn wirtîn nam.
7339 Rouber, diebe und waltmorder
7340 Habent einen orden, der vil swêr
7341 Allen klôster liuten wêre:
7342 Des hœrt ein bîspel vür ein mêre:

XLIX Ein mere vo[n] aine[m] veizte[n] (von späterer hand aus weizze[n] corrig.) hu[n]de.

7343 Zeimâl lief ein grôzer hunt,
7344 Als meister Esôpus uns tuot kunt,
7345 Ûz einem dorfe in einen walt.
7346 Sîn lip was veizet und wol gestalt.
7347 Ein mager wolf in dô ersach,
7348 Der lief zuo im dar und sprach:
7349 "Sage mir, vil trût geselle,
7350 Wie sint dîn brâten und dîn belle
7351 Sô veizet und ouch dîn balc sô vol?
7352 Wölte got, wêr mir alsô wol!
7353 Hilf mir daz ich bî dir belibe,
7354 Wenne ez schînt an dinem lîbe
7355 Der heilige volle"! Dô sprach der hunt:
7356 "Mîn leben tuon ich dir nu kunt:
7357 Einen rîchen man gehœre ich an,
7358 Der lêt mich selten werden wan,
7359 Ouch treit mir sîn gesinde zuo
7360 Allen vollen spât und fruo.
7361 Wiltu mit mir dâ heime nu sîn,
7362 Man pfligt dîn als wol als mîn".
7363 Under des der hunt diz sprach,
7364 Der wolf im an die kelen sach,
7365 Er sprach:"Nu sage mir, ê wir draben,
7366 Wie ist diu kel dir sô beschaben?"
7367 Er sprach:"Des bescheide ich dich:
7368 Ein halsbant twinget des tages mich.
7369 Aber des nahtes bin ich frî
7370 Und wone mîns herren hofe bî
7371 Und bewar daz im kein schade geschiht."
7372 Der wolf sprach:"Mit dir wil ich niht!
7373 Sölte ich den tac gevangen sîn,
7374 Waz sölte mir denne daz leben mîn?
7375 Ich wölte ê immer alsô beschaben
7376 Ze holze und ouch ze velde draben
7377 Und wölte mînen frîen willen haben,
7378 Ê denne ich lebende wêr begraben
7379 Durch mîn armen lîpnar!"
7380 Nu nemt der armen rouber war
7381 Und maniger andern tummen liute
7382 In der werlde, die noch hiute
7383 Lobent klôster liute leben
7384 Und wöllen doch sich selber niht begeben:
7385 Die habent des magern wolfes muot.
7386 Swer aber sich in ein klôster tuot
7387 Dâ er gewisse pfrüende hât,
7388 Der vêhet sich an des hundes stat,
7389 Der gern in dem halsîsen lac
7390 Gevangen manigen liehten tac.

XLIX Vo[n] schiltknechte[n] vnd von armen pu[o]ben.

7391 Alle orden sint alsô gemacht:
7392 Swenne si ir ambt habent volbrâht,
7393 Daz si denne gênt an ir gemach.
7394 Und ruowe pflegent ein wîle dar nâch.
7395 Daz himelrîch kumt vil senfter an
7396 Manigen guoten klôsterman
7397 Denne diu helle gar freidige liute,
7398 Der man vil leider vindet hiute.
7399 Nu ist ein orden, dem selten iht
7400 Guotes ûf erden hie geschiht,
7401 Mit dem grôziu arbeit hât ir pfliht
7402 Und frumet doch der sêle niht:
7403 Daz ist schiltknehte orden:
7404 Den siht man rouben, morden,
7405 Luodern, vehten unde streben,
7406 Ân allez gemach mit engsten leben,
7407 Wenne man in zem êrsten hetzet
7408 An die vînde und dar nâch setzet
7409 Ob dem tische hin an daz ende:
7410 Der füeze, bein, arm und hende
7411 Und sîn sêle wâget in den strîten,
7412 Der muoz kaffen und muoz bîten
7413 Wenne im ein stücke brôtes werde
7414 Und ein muos von kuchen unwerde.
7415 Diz ungemach wêr im barte swêre,
7416 Ob er in einem klôster wêre.
7417 Diz lîdet er hie er weiz durch waz,
7418 Und hât der werlde und gotes haz.
7419 Ich gedenke wol daz ich zeimâl saz
7420 Ob eins herren tische und âz,
7421 Dô kâmen sîner knehte drî geriten
7422 Mit leder und îsen nâch irem siten.
7423 Dô sprach der herre: "Wa ist iuwer iht mêre ?
7424 Si sprâchen: "Herre, man hât uns sêre
7425 Gejaget, ez sint ouch unser ehte
7426 Beliben ûf der wal"! "Daz lît vil rehte!
7427 Wer hiez iuch strîten ân min wort?''
7428 Sprach der herre. Seht, dirre mort
7429 Wart anders niht von im geklaget
7430 Denne daz er sprach, si wêrn verzaget,
7431 Si wêrn anders wol hin kumen.
7432 Diz ist ein orden ân allen frumen:
7433 Kein sêle messe wart in nie gefrumet.
7434 Swer in den selben orden kumet,
7435 Der mac wol von nœten sagen!
7436 Ich hôrte einen pfister zeimâl klagen
7437 Sînen esel mêre denne dise ehte,
7438 Die lihte manige kalte nehte
7439 Wâren gelegen an der huote
7440 Ûf îrem herten isenhuote.
7441 Hôchfart, muotwille und gîtikeit
7442 Tuont tummen liuten manic leit:
7443 Des hœre wir manigen sich ûf tüemen
7444 Von hôhen friunden und sich rüemen
7445 Mêre denne er ze rehte sölte,
7446 Ob er die wârheit reden wölte.
7447 Wenne manige verrer sint gemâge
7448 Denne Strâzburc, Ackers und Prage ,
7449 Die dennoch ûf ir friunde dröuwent
7450 Und grôzen kriec ûf erden ströuwent.
7451 Des wint und des hofewart
7452 Wêrn muomen kint, denne ein vart
7453 Die si tâten nâch einem hasen:
7454 Diu schiet muomen unde basen.
7455 Des ohse und jens rindes kalp
7456 Sint geswester tiehter vaterhalp.
7457 Jener geiz und dirre boc
7458 Wêrn basen kint, denne ein stoc
7459 Über den der boc eines tages spranc,
7460 Von dem diu sippe ist worden kranc.
7461 Jens mûl und des esels sun
7462 Sint geswester kint: wer törste im tuon
7463 Kein leit, die wîle die helde lebent
7464 Die im ze hilfe sô vaste strebent?

L. Ein mere vo[n] eine[m] esel d[er] sich in eines lewen heute vneselt.

7465 Nu merket ein bîspel von den knehten,
7466 Die sich gern gar ahpêr mechten:
7467 Eins lewen hût ein esel vant,
7468 Die tet er an und kam zehant
7469 Frœlich in den walt gerant.
7470 In dûhte er wêre gar unbekant,
7471 Jedoch diu langen ôren
7472 Meldeten den tôren:
7473 Diu sach man oben ûz ragen.
7474 Diu tier begonde er alliu jagen
7475 Ûf und ab. Schier und darnâch
7476 Sîn meister in dort loufen sach
7477 In der hiute die er vant,
7478 An ein seil er in dô bant
7479 Und leite im an vil grôze pîn.
7480 Er sprach: "Du muost mîn esel sîn!
7481 Du maht wol tumme liute
7482 Betriegen in fremder hiute.
7483 Swer aber dich erkennet,
7484 Esel er dich nennet!"
7485 Swer sich noch des nimet an
7486 Des er niht wol bewêren kan,
7487 Begrîfet den ein wiser man,
7488 So gelinget im, dâ vür ichz hân,
7489 Als dem esel hie gelanc
7490 Der in des lewen hiute spranc,
7491 Swenne im der balc wirt abgezogen
7492 In dem er manigen hât betrogen.
7493 Lügen und eide habent pfliht
7494 Mit dieben und roubern, wenne man siht.
7495 Daz maniger ûf ein lougen nimt
7496 Daz sêle und êren übel zimt.
7497 Swer meineide, ban und êhte
7498 Behielte nâch irem rehte,
7499 Sô stüende ez in dem lande wol
7500 Und würde wir alle fröuden vol.
7501 Swer hundert meineide hât gesworn,
7502 Der wil sîn êre niht hân verlorn;
7503 Swer im ouch verdient den ban,
7504 Der ist ze der werlde ein frumer man.
7505 Swer in die êhte kumen ist,
7506 Des lip gewinnet lenger frist
7507 Denne er vor het gehabt:
7508 Unvorhtlich er ze velde drabt.
7509 Swaz einer geroubet oder gestilt,
7510 Niht ze lange er daz verhilt
7511 Ern wuocher sân zehant dâ mite
7512 Nâch dem bœsen landes site.
7513 Sünde ist antlâz worden,
7514 Sît wir der sünden orden
7515 Alle besunder halten,
7516 Die jungen mit den alten.
7517 Wir müezen ein ander vil vertragen,
7518 Wölle wir niht nît und haz bejagen:
7519 "Schône du mîn, sô schône ich dîn,
7520 Sît wir beide schuldic sîn":
7521 Diz ist der werlde schîbe.
7522 Swaz ich tihte oder schrîbe,
7523 Sô hât diu gîtikeit allen schimpf
7524 Verdruct, kurzwîle und gelimpf,
7525 Des junge und alte wîlent pflâgen,
7526 Dô si dennoch mit flîze niht wâgen
7527 Den alten helbelinc gein dem niuwen.
7528 Gîtikeit kan vil schanden briuwen.
7529 Daz gîtikeit nimmer werde sat
7530 Biz daz der gîtige ein ende hât,
7531 Daz bewêrt der gîtige Krassus wol,
7532 Dem heizes goldes sîn munt wart vol
7533 Gegozzen und im flôz durch den nac
7534 Ûf die erden dâ er lac:
7535 Des sint Karthâgô und Rôme geziuge
7536 Der wârheit, daz ich niht enliuge.
7537 Swer gîtic ist und übel besunder,
7538 Der geloubt vil lützel an diu wunder
7539 Diu gotes heiligen hânt getân:
7540 Wenne sîn herze ist leider wan
7541 Slehter einvelte und rehter güete,
7542 Mit den heiliger liute gemüete
7543 In gote beklibet ân zwîfels wanc.
7544 Dâ von sprach her Frîdanc
7545 Einen spruch, den ich dâ vor ouch hân
7546 Gesetzet, den merke wîp und man:
7547 "Swer gîtic ist und erge hât,
7548 Daz ist wurzel aller missetât."
7549 Nu sül wir aber vürbaz rennen
7550 Und unsern herren baz erkennen.

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 12.11.2004