L. Von den wu[o]che[er]ren.

7551 Wêrn alle sünde mit einer tür
7552 Beslozzen, doch brêche diu her vür,
7553 Diu dâ genant ist gîtikeit
7554 Und aller sünden banier treit.
7555 Juden und heiden hât wîbes minne
7556 Ofte beroubet hie vor der sinne,
7557 Daz si durch minne giengen in den tôt
7558 Oder liden manig ander grôze nôt;
7559 Dar nâch entzündet diu gotes minne
7560 Sîn diener sô gar ûzen und inne,
7561 Daz si vil grœzer marter lîden
7562 Und helle und vegefiur gar vermîden:
7563 Nu hât gesuoch und ander gewinne
7564 Die werlt sô gar beroubet der sinne,
7565 Daz weder helle noch vegefiur
7566 Noch tiufel si dunket ungehiur,
7567 Und daz si hânt vür grôze wîsheit
7568 Swer aller meist guotes ze samen treit.
7569 Bezzer ist ein arm guot liumunt
7570 Denne bœses gewinnes tûsent pfunt.
7571 Fürkouf mit simonîen,
7572 Hœrt ieman über si wâfen schrîen?
7573 Wenne si zwuo sint gespilen
7574 Und ziehent ouch in des tiufels silen.
7575 Satzunge, santrocke und gesuoch
7576 Schuohent sich in einen schuoch:
7577 Ob der stumpf oder spitzic sî,
7578 Daz merket der tiufel und stêt dâ bî.
7579 Swer swinde trahtet ûf grôzen gewin
7580 Und gêt alsô des lebens hin,
7581 Sô lebt er hie mit swindem muote
7582 Und belîbet sîn sêle in grimmer huote:
7583 Wenne sô der selbe guot gewinnet
7584 Und swinde minnen daz beginnet,
7585 Zehant wandelnt sich sîn sinne
7586 Ûf grôze êre und ûf gewinne.
7587 Swer guot gewinnet gîticlich,
7588 Der zert ez selten milticlich:
7589 Kumt aber in daz herze sîn
7590 Ein mager, âmehtic fröudelîn,
7591 Sô machet er gern den liuten schimpf,
7592 Hête er die genâde und den gelimpf.
7593 Als ein bruothenne ob eiern sitzet,
7594 Hungeric, durstic und durchhitzet,
7595 Alsô sitzet der bœse bî sînem gnote
7596 Und lebt selten in frôem muote:
7597 Wenne swindiu sorge in drücket nider.
7598 Daz er sich selten ûf rihtet wider.
7599 Er hât etswenne ein fröudelîn
7600 Als in dem winter ein sunnen schîn,
7601 Nâch dem diu erde und ouch der snê
7602 Des nahtes kelter wirt denne ê:
7603 Alsô wirt sîn herze des nahtes kalt
7604 Von swinden sorgen manicfalt.
7605 Wer sprichet daz die liute niht wüeten,
7606 Die man mit grôzem flîze siht hüeten
7607 Silbers und kupfers denne sêle und lîbes,
7608 Vater oder muoter, kindes oder wîbes?
7609 Pfi iu armen grasmucken,
7610 Daz ir iuch ofte müezet smucken,
7611 Swenne ir des schimeligen schatzes hiietet
7612 Und fremden göuchen ir eier brüetet,
7613 Die frô hin nâch sint und gemeit!
7614 Von iurre bittern arbeit
7615 Verlürt ir iuwer sêle aleine;
7616 Swie ot iuwer pîn dort sî niht kleine,
7617 Doch wêr si minner, ob iuwer guot
7618 Niht manigen hin nâch verkêrte den muot,
7619 Die dâ mit unrehte ouch leben
7620 Und williclich gein helle streben.
7621 Ir manigem wêr diu helle unkunt,
7622 Hêt er ir niht den fullemunt
7623 Unrehtes guotes geleit ûf erden.
7624 Sus müezet ir zwirunt unsêlic werden!
7625 Ein dinc schrîbe ich iu niht aleine,
7626 Ich schrîbe ez uns allen in der gemeine:
7627 Legte wir den flîz gein himelrîche
7628 Halp den wir legen ûf ertrîche,
7629 Wir würden alle sêlden rîche
7630 Und gelebten nîmmer jêmerlîche.
7631 Wenne unser herre güzze dar zuo
7632 Sîn genâde, sîn milte spât und fruo,
7633 Daz daz halbe würde ganz
7634 Und daz der êwigen fröuden kranz
7635 Ze lône uns würde nâch disem lîbe;
7636 Wer weiz sus, wâ sîn sêle belibe?
7637 Geloubt wir daz wir sêle hêten,
7638 Manîc übel dinc wir niht entêten.
7639 Der gîtige hât ander fröuden niht
7640 Denne daz er zelt, wigt und siht
7641 Sînen schaz, sîn vihe und sîn getreide.
7642 Daz unreht guot von gote in scheide,
7643 An den gelouben kumt er niht.
7644 Swaz er grîfet oder siht,
7645 Mit dem kan er sich betragen;
7646 Swaz ouch alle pfaffen sagen:
7647 Daz er bereitschaft gebe durch got,
7648 Daz möhte wol sîn der werlde spot.
7649 Guot setzet manigen man sô werde,
7650 Swelch rât der armen sêle ouch werde.
7651 Swie vil wir tihten, lesen, schrîben,
7652 Die gîtikeit wir doch niht vertrîben.
7653 Wenne si leider hât ein her,
7654 Des alle tage ie mêre ie mêr
7655 Ûf erden wirt, daz ist mîn klage.
7656 Alein ich nimmer sô manige tage
7657 Gelebe als ich gelebet hân,
7658 Den gîtigen ich doch übel gan,
7659 Daz si mit sorgen leben ûf erden
7660 Und dort unsêlic müezen werden.
7661 Der arme wêr gerne des rîchen geselle
7662 An êren, an guote: des wirt diu helle
7663 Vil sêre gefüllet, sô dirre und der
7664 Mit bœsem gewinne würde gern ahpêr.
7665 Swer denne grôz guot und êre erwischet,
7666 Den dunket er habe gar wol gevischet
7667 Ûf erden: ich wölte ê daz er weste,
7668 Daz rîche liute vil seltsên geste
7669 Sint vor got in sînem rîche,
7670 Des er uns selber ûf ertrîche
7671 Lêre und bilde hât vor getragen.
7672 Waz sölte ich dâ von lenger sagen?
7673 Getriuwer, senfter, einveltiger liute
7674 Ist leider ûf erden wênic hiute;
7675 Lindiu herzen sint leider tôt,
7676 Swindiu mit leide noch ezzent brôt.
7677 Swâ wir noch snochen unser alten,
7678 Die man sach triuwen und êren walten.
7679 Dâ vinde wir valsche liute und arge,
7680 Hôchfertige, nîdische und karge.
7681 Joab, Semei und Nabal
7682 Hânt erben noch in bergen, in tal,
7683 Kâin, Achytofel und Jûdas
7684 Nemroth, Achor und Elymas
7685 Hânt noch geverten vil ûf erden,
7686 Der leider ê mêre denne minner wil werden.
7687 Sô man den prediget gotes wort,
7688 So gedenkent si: möhte unser hort
7689 Den münchen werden und den pfaffen,
7690 Si liezen uns leben als ander affen.
7691 Sô si des vil und vil geklaffent,
7692 Irs frumen si doch dâ mit lützel schaffent
7693 Wenne daz si zornic sich selber machent
7694 Und manige naht vor grimme wachent
7695 Und können sich doch selber niht bewarn,
7696 Swie grimme si sîn, swie swinde si sparn,
7697 Ez enwerde den pfaffen ie ein teil
7698 Und ouch den münchen an ir seil:
7699 Wöllen si ez güetlich in niht geben,
7700 Sô wirt ez in nâch irem leben.
7701 [Ein wîp ze geben niht betrâget,
7702 Dâr üm ir man sîn leben wâget].
7703 Sölte in des guotes ein teil niht werden?
7704 Nu legent si man und wîp in die erden
7705 Und werfent in erden in den munt:
7706 Die haben in denne vür tûsent pfunt!
7707 Swer nu dar an gedenken wölte
7708 Daz er ze erden werden sölte,
7709 Der têt als her Zachêus tete,
7710 Der liebe zuo unserm herren hete
7711 Und allez sîn guot gap halp den armen,
7712 Und daz unser herre sich wölte erbarmen
7713 Über in, dô galt er vierspelticlîche
7714 Swaz er gewunnen het velschlîche:
7715 Und hêten die rîchen nimmer lêre
7716 Denne die selben, wes dörften si mêre,
7717 Swenne si têten als er tet ?
7718 Swem disiu rede niht în gêt,
7719 Lêt den sîn guot verlorn werden,
7720 Sô hât ez manigen betrogen ûf erden.
7721 Volge wir niht pfaffen und münche lêre,
7722 Wie sol sich denne unser heil gemêre?
7723 Swer irdisch guot gewinnen kan,
7724 Der wênt nu sîn ein wiser man,
7725 Swer aber wirbet nâch gotes minne,
7726 Der ist ein zage und hât niht sinne.

LI. Ein mere vo[n] eines gri[m]men richen wu[o]cherers tempel.

7727 Nu hœrt ein wâr geschriben mêr:
7728 Ein grimmer, rîcher wuocherer
7729 Hiez machen einen tempel lanc und wît,
7730 In dem man gote sölte alle zît
7731 Dienen vür sîn missetât.
7732 Einen heiligen bischof er dô bat,
7733 Der im gar liep was sunderbar,
7734 Daz erz wîhte. Der kam dar
7735 Eins âbendes, dô er des morgens wolte
7736 Den tempel wîhen als er solte.
7737 Nu gienc er drîn und wolte beschouwen
7738 Wie simz und venster wêrn gehouwen,
7739 Und wânde daz nieman drinne wêr.
7740 Dô sach er, daz dort hin und her
7741 Der tiufel gienc und maz die wende
7742 Von einem ende an daz ander ende.
7743 Der bischof sprach: "Ûz, bœsewiht!
7744 Man bedarf ze dirre wîhe dîn niht!"
7745 Dô sprach der tiufel "Wes schiltestu mich?
7746 Du fürhtest mich vil mêr denne ich dich!
7747 Ûf mînem eigen stên ich hie:
7748 Als wênic als ich des dînen dir ie
7749 Hân genumen, als lâz du mir
7750 Daz min, daz zimt joch gar wol dir!"
7751 Dem bischof was diu rede zorn
7752 Und sprach: "Dînen gewalt nim ich dir morn
7753 Swenne man gote hie dienen sol!"
7754 Dô sprach der tiufel: "Nu weistu wol.
7755 Swer dem andern nimt sîn guot,
7756 Daz der wider gotes willen tuot:
7757 Sol denne ein bischof erger werden
7758 Denne diebe und rouber sîn ûf erden?
7759 Daz ist wider sîn ambet gar:
7760 Dâ vor soltu dich bewar.
7761 Lâ mich daz mîn von hinnen füeren,
7762 Daz dîn wölt ich ungern rüeren!"
7763 Der bischof sprach: "Daz erloube ich dir,
7764 Und hebe dich, bœsewiht, schier von mir!"
7765 Hin fuor er. Des morgens fruo,
7766 Dô der bischof gienc hin zuo
7767 Und wolte den tempel machen reine,
7768 Dô vant er weder holz noch steine:
7769 Alein ez koste manic pfunt,
7770 Doch was des tempels fullemunt
7771 Mit wende, mit dache enwec.gefüert.
7772 Swelch herze daz grôze unbilde niht rüert
7773 Und daz sich trœstet valscher êren
7774 Mit valschem guote, wer wil daz lêren
7775 Daz ez bî zît wider kêre,
7776 Ê denne der hûfe sich gemêre?
7777 Hôchfart viel von himelrîch,
7778 Nît treip den menschen jêmerlîch
7779 Von sînem erbe, daz got im hete
7780 Verlihen in êwiger frönden stête,
7781 Dô brâhte in frâz und gitikeit
7782 Und unkiusche sît in manic leit,
7783 Daz sorge und angest und grôz arbeit
7784 Kûme in sîn êrste wirdikeit
7785 In bringet, die er schier verlôs
7786 Und durch einen valschen rât verkôs.
7787 Alein diu werlt vol sünden sî,
7788 Doch hân ich gemerket drî,
7789 Die swachent sêre die kristenheit:
7790 Frâz, hôchfart und gîtikeit,
7791 Mit den der tiufel versuochen wolte
7792 Unsern herren anders denne er solte.
7793 Dô er ûz steinen in brôt hiez maehe
7794 Und von eines hôhen tempels dache
7795 Durch hôchfart sich hiez nider lân
7796 Und ûf einen hôhen berc dô sân
7797 In fuorte und hiez in sunderlîche
7798 Beschouwen alliu künicrîche
7799 Und sprach: "Diz gib ich allez dir:
7800 "Val nider und bis gehôrsam mir!"
7801 Hie wolte er, daz irdisch guot
7802 Verkêrt hêt unsers herren muot.
7803 Dise drî sünde ziehent an sich
7804 Alle ander sünde, dunket mich.
7805 Der hôchferte dienet zorn und nît,
7806 Gein frâze hât selten herten strît
7807 Unkiusche und ir gespil lazheit,
7808 Wurzel und muoter ist gîtikeit
7809 Aller der sünden hie genant,
7810 Der gesinde iu vor ouch ist bekaut.
7811 Frâz und unkiusche zemt daz alter.
7812 Ez enwart aber nie kein man sô kalter
7813 Von vil jâren, daz gîtikeit
7814 Von im schiede: hât er geleit
7815 Sînen flîz an si, sô bringet der tôt
7816 Sîn sêle von jâmer in êwige nôt.
7817 Ein mül mit einem redelîn
7818 Bî einem kleinen dörfelîn
7819 Hete hie vor ein armer man.
7820 Sô wazzers dem redelîn zeran
7821 Und ez niht het sô vollen swanc,
7822 Mit jâmer ez ümme gienc und sanc:
7823 "Hilf herre got! hilf herre got!
7824 Dir ist aleine bekant mîn nôt!"
7825 Nu was dâ bi ein dorf vil grôz,
7826 Bî dem ein kreftic wazzer flôz,
7827 Daz treip zwei reder volliclich,
7828 Diu slapperten mit einander gelich:
7829 "Hilf oder lâz! hilf oder lâz!
7830 Diu erde sî trucken oder naz,
7831 Sô habe wir doch gnuoc tac und naht:
7832 Uns wirt sô manic sac her brâht!"
7833 Dise müln mügen uns wol bediute
7834 Ûf erden rîche und arme liute:
7835 Unsern herren ruofent die armen an,
7836 Sô kasten und biutel in ist wan,
7837 Die rîchen dunket si genesen wol,
7838 Sô kasten und kisten in ist vol.
7839 Grôz rîchtuom und grôz armuot
7840 Verkêrent maniger liute muot.
7841 Dem blinden ist mit tröumen wol,
7842 Wachende ist er leides vol:
7843 Alsô wöllen manige liute ûf erden
7844 Gewaltic, rîch und ahpêr werden.
7845 Den troumt daz irdisch guot und êre
7846 Des menschen herze niht verkêre ;
7847 Und die nu gar rîlich schallent,
7848 Die wizzen niht wie schier si vallent
7849 In siechtagen oder in armuot ;
7850 Wol im, der gotes willen tuot!
7851 Getriuwe und ungetriuwe liute
7852 Sint ie gewest und sint ouch hiute,
7853 Ze guote und ze übel gedenket man ir:
7854 Swaz aber uns wirret, daz klage wir.
7855 Swâ ich einer untriuwe wirde gewar,
7856 Arcwân hân ich immer dar:
7857 War sol ich denne ûf erden var,
7858 Daz ich vor valsche mich bewar?
7859 Swer niht weiz wie lange er lebt
7860 Und mit allem flîze strebt
7861 Nâch valschen êren, der ist tump:
7862 Der wec gein himel ist niht krump.
7863 Die wîse gein dirre werlde sint,
7864 Die sint gein gotes liebe bliut:
7865 Mit sant Paule ich daz beziuge
7866 In sînen briefen, daz ich niht liuge.
7867 Hêt unser herre des wazzers fluz,
7868 Des luftes kraft, der sunnen schuz
7869 Sô volliclich uns armen ûf erden
7870 Niht geben, welch rât sölte unser werden?
7871 Waz sölte wir tuon? War sölte wir loufen?
7872 Möhten die gîtigen liute verkoufen
7873 Des wazzers fluz, der sunnen schîn,
7874 Des luftes kraft als korn und wîn,
7875 Sô lebte der tûsent mensche niht,
7876 Die man von gotes genâden siht
7877 Leben ûf erden ân irn danc,
7878 Der herze nâch gîtikeit ie ranc.
7879 Trüege wîn und korn berc und tal,
7880 Walt und ouwe immer iiber al,
7881 Des gîtigen herze mac dennoch niht
7882 Gesehen ob ieman iht guot geschiht.
7883 Wêr ir niht sô vil ûf erden,
7884 Sô möhte wir alle frœlich werden.
7885 Alle gîtiger sint beteler:
7886 Alein der biutel in sî swêr,
7887 Doch sint ir herze tugende lêr:
7888 Dâ von sint si gote unmêr,
7889 Wenne si getrûwent nieman ûf erden.
7890 Möhte allez daz ir eigen werden
7891 Daz der himel bedecket hât,
7892 Dennoch wêre ir herze niht sat.
7893 Swer den gîtigen bitet sins guotes,
7894 Der rêmet sînes fleisches und sîns bluotes
7895 Und derret sîn marc und sîn gebein
7896 Und machet sîn herze sô gar unrein,
7897 Daz er des lebens dem vergan
7898 Des bete er niht entrinnen kan,
7899 Er sî geistlich oder werltlîch
7900 Edel oder unedel, arm oder rîch.
7901 Nu hœrt waz dennoch mêre geschiht:
7902 Swer in bitet, dem gibt er niht
7903 Und wirt im dar zuo nimmer holt,
7904 Und möhte er sîns liumuntes golt
7905 Ze kupfer sinder mit nides zungen
7906 Verwandeln, sô wêr im gelungen.
7907 Swer gîtiger wil ze friunde behalten,
7908 Der lâze si ir untugende walten
7909 Und bite si niht und strâfe si niht:
7910 Sô dunket manigen bœsewiht
7911 Er sî gar ein frumer man,
7912 Der tugent und êre doch nie gewan.
7913 Gîtikeit, hôchfart und nît
7914 Füegent ûf erden manigen strît.
7915 Vor allen sünden die drî sünde
7916 Könde ich ze rehte nie durch gründe:
7917 Der hât der tiufel einen pfluoc,
7918 Der leider im sêle gewinnet genuoc.
7919 An swelhem menschen die drî sint,
7920 Des sêle wêr bezzer daz er blint
7921 Wêre, denne daz er ofte siht
7922 Dâ von sînem herzen wê geschiht.
7923 Vil ofte betrüebet der kargen muot
7924 Ob ieman frümeclîchen tuot:
7925 Wenne Karc und Arc sint nu sô starc.
7926 Daz maniges menschen bluot und marc
7927 Dorret vor grimmer gîtikeit
7928 Und ouch vor grimmer freidikeit:
7929 Wenne manigem ist sîn guot sô liep,
7930 Daz er sîn selbes sêle diep
7931 Wirt dâ mit, swenne erz beheltet
7932 Daz sîn mit sêlden ieman weltet:
7933 Wie sol des lop vor gote werden,
7934 Swenne sich sîns guotes nîeman ûf erden
7935 Hât gebezzert, und verswindet
7936 Daz nieman denne der tiufel ez vindet?
7937 Des sprichet maniger, dem irdisch guot
7938 Von gote wendet sînen muot:
7939 "Waz ist schande, waz ist êre?
7940 Der mensche sol sîn guot gemêre
7941 Mit rehte, mit unrehte, swie er kan,
7942 Sehe der rîchen schœnheit an
7943 Und sî der werlde guot geselle!
7944 Wer gesach ie tiufel oder helle ?
7945 Man mac uns vil dâ von sagen,
7946 Doch sol ein frumman niht verzagen.
7947 Swer hie genuoc hât, der hât ouch dort
7948 Grœzer pîn oder fröuden hort!"
7949 Nu merket, wie ein zuoversiht!
7950 Swer diz wil vor bedenken niht.
7951 In welhem sinne lebet der,
7952 Sô gotes liebe im wirt unmêr?
7953 Gîtikeit ist ein mittelschôz,
7954 Daz ganzer triuwe und liebe sloz
7955 Sich nimmer lêt zesamen sliezen:
7956 Wenne swes man nu niht mac geniezen,
7957 Dem kan weder sippe, zuht noch kunst
7958 Erwerben gîtiger liute gunst.
7959 Sîn êre, sîn marc, sîn fleisch, sîn bluot
7960 Gibt der gîtige üm irdisch guot
7961 Und lebt mit grimme swinde ûf erden,
7962 Swelch rât der sêle beginne ouch werden
7963 Als ein höuschrecke er ûf springet,
7964 Sô an sînem unkoufe im gelinge
7965 Er vellet aber als ein snecke nider
7966 Dar nâch an die erde wider
7967 Und negt und grebt die liehten sât
7968 Rehte als ein milwe die liehten wât:
7969 Alsô wirt sîn herze nimmer sat,
7970 Die wîle ieman ûf erden iht hât
7971 Guotes und êren mêr denne er.
7972 Swie vil er hât, doch ist er lêr.
7973 Swenne er sich smücket und nider drücket
7974 Und vor bôsheit wider zücket,
7975 Sô sol er gar dêmüetic sîn.
7976 Got herre, wie manîgerleie pîn
7977 Der gîtiigen herzen haben ûf erden,
7978 Wie diz und daz ir eigen müge werden!
7979 Sô swinde sorge si betoubent,
7980 Daz si der schrift niht geloubent,
7981 Diu gotes grôziu wunder kündet
7982 Und süezer kristen herze enzündet!
7983 Ein vogel den andern zerret,
7984 Ein tier daz ander querret,
7985 Ein krût dem andern wirret,
7986 Ein boum den andern irret
7987 Daz er sich niht gebreiten mac:
7988 Swer denne in sorgen naht und tac
7989 Gevangen lît, wie sanfte ist dem,
7990 Der friunden und vînden ist widerzêm?
7991 Wê dir, verfluochtiu gîtikeit,
7992 Wâ ziuhestu hin die kristenheit,
7993 Sît pfaffen und leien und klôsterliute
7994 Vil mêre dir leider volgent hiute
7995 Denne gotes lêre, die er enboten
7996 Hât uns allen bi sînen boten
7997 Und die er predigte ze maniger stunde
7998 Mit sîn selbes süezen munde!
7999 Himel und erde schrîet wâfen
8000 Über gîtige liute, die nieman strâfen
8001 Getar nâch rehte noch enwil,
8002 Wenne ir ist leider nu ze vil!
8003 Nieman den getrûwen sol,
8004 Die got niht wöllen getrûwen wol.
8005 Der mensche getrûwet gote niht,
8006 Den man mit allem flîze siht
8007 Tac und naht nâch guote werben
8008 Als ob er nimmer sül ersterben:
8009 Got, der ûf erden im gap daz leben,
8010 Der wolte im ouch sîn nôtdurft geben
8011 Und êwige fröude, wölte er erbîten:
8012 Sus wil er wider sîn sêlde strîten,
8013 Wenne im tuot vil baz daz pfenning klingen
8014 Denne aller pfaffen predigen und singen
8015 Und allez daz diu kristenheit
8016 An gotes dienst mit flîze leit.
8017 Wê dir gevangenz gîtigez herze!
8018 Wie manic angst, wie manic smerze
8019 Dich grimmet, twinget tac und naht
8020 Den du niht wol entrinnen maht!
8021 Wenne du gêst nâch dînen sinnen,
8022 Wie du mügest guot gewinnen
8023 Ûf erden und niht in himelrîch!
8024 Wê dir immer und êwiclîch!
8025 Wê dir, gîtiger, wê dir, wê!
8026 Wenne sol dîn êwic wê zergê,
8027 Daz hie hebt an und immer wert,
8028 Des hinre vil mêr ist denne vert?
8029 Wê dir verfluochtin creâtûre,
8030 Du sist ritter, pfaffe oder gebûre!
8031 Wê dir, daz dich diu erde treit!
8032 Wê, daz dir got sô vil vertreit!
8033 Wê dir, daz du ie würde geborn!
8034 Wirt lip und sêle hin nâch verlorn,
8035 Waz sol dîn leben dir ûf erden
8036 Des nieman bezzer konde werden?
8037 Du wêre der werlde ein schiuhelinc
8038 Und bist nâch tôde ein griuwelinc,
8039 Dîner sêle nieman gehelfen mac!
8040 Wenne unser herre kêrt dir den nac.
8041 Wie sol unser armen werden rât,
8042 Sît got niht mêr ze geben hât
8043 Der ie was milte und genâden rîch?
8044 Schrîet, armen, alle gein himelrîch!
8045 Got herre von himel, bistu tôt,
8046 Sît gîtige liute sô grôze nôt
8047 Lîdent üm dîn irdisch guot,
8048 Und ouch üm daz du hâst dîn bluot
8049 Vergozzen, daz man daz besliuzet
8050 Vor uns und nieman des geniuzet?
8051 Wir fürhten daz guotes uns zerinne:
8052 Wenne aber diu sêle dem lîbe entrinn.e,
8053 Dâ hân wir lützel sorgen zuo.
8054 Ich wên niht daz ein esel tuo
8055 Als tumplich als der mensche ûf erden,
8056 Der gern schier wil ahpêr werden.

LIII. Ein mere vo[n] kargen leuten vnd von knechten.

8057 Nu muoz ich ziehen dâ her în
8058 Ûf karge liute ein kurz mêrlîn:
8059 Ein herre het wîlent zwêne knehte,
8060 Die mit zorn und mit gebrehte
8061 Alle zît gein einander strebten
8062 Und selten ân bœse kriege lebten.
8063 Nu wolte ir einer den andern stechen.
8064 Nu wolte dirre jenem diu ougen ûz brechen,
8065 Und dô den herren des verdrôz,
8066 In ein stuben er si beslôz
8067 Und gap zwei mezzer in in die hende
8068 Und stuont er ûzen bî der wende.
8069 Dô sprach der eine: ,,Nu hebt an!
8070 Wurdet ir ie ein bider man,
8071 Sô gerechet iuch an mir!"
8072 "Nein", sprach er, "nu stechet ir,
8073 Wenne ich wölte von iu gerne
8074 Mannes frümikeit nu lerne!"
8075 Dô sprach jener: "Ir müezet stechen,
8076 Wöllet ir iuch an mir gerechen!"
8077 Dô hiez der herre sîn ander gesinde
8078 Mit zwein steben si vil swinde
8079 Slahen biz an den grimmen tôt
8080 Und sprach: Ê denne ich dise nôt
8081 Alle tage von iu wölte haben,
8082 Mir wêre ê lieber ir wêrt begraben!"
8083 Dise knehte bediutent pfaffen und leien,
8084 Die an der gîtikeit reien
8085 Sint vor geschriben und varnt hin nâch.
8086 Wem ze gîtikeitist sô gâch
8087 Daz er ûf sêle, ûf êre niht ahtet,
8088 Der hât vil übel sich betrahtet,
8089 Swenne er wîn, tuoch und getreide
8090 Bî im werden lêt ze leide
8091 Ê denne er ez armen liuten borge
8092 Ûf bürgen oder pfant: twünge in diu sorge
8093 Diu ofte twinget arme liute,
8094 Er geloubte vil lîhte baz in hiute.
8095 Kumt aber ein hungerjâr uns armen,
8096 Wer wil sich denne über uns erbarmen?
8097 Spricht der pfaffe: "Nu hebt an,
8098 Her leie, nu sît ein frumer man
8099 Und gebt den armen rehten kouf!"
8100 "Nu lât mich sehen iuwern louf,"
8101 Spricht der leie, "swie ir mir vor
8102 Gêt, als trit ich in iuwer spor!
8103 Hebt an und werdet ein frumer man!"
8104 "Ich fürhte mîn kasten werden wan,
8105 Wes sol denne mîn gesinde leben?"
8106 Spricht der pfaffe. "Wöllet ir niht geben
8107 Guot bilde uns leien und sît gelêrt,
8108 Wie werdent die juden denne bekêrt?"
8109 Spricht der leie - "ich fürhte uns werde
8110 Ein gesinde verrihten nâch unserm werde,
8111 Als wir denne sîn beide wert,
8112 Die hiure sint swinder denne vert."
8113 Diz schrîbe ich niht von allen pfaffen,
8114 Ich schrîbe ez von den gîtigen affen,
8115 Die selten trœstent arme liute
8116 Und selber guotes genuoc habent hiute.
8117 Swer nu guot hât, der hât êre:
8118 Aber willig armuot hât vil mêre
8119 Lôns und êren in himelrîche
8120 Vor unserm herren êwiclîche.
8121 Nu merket, daz ich manic jâr
8122 Gemerket hân und ist ouch wâr:
8123 Swer in der werlde sich verzwicket
8124 Und in der gîtikeit ersticket,
8125 Alle sünde er an sich stricket
8126 Alsô daz er niht sêre erschricket.
8127 Swie vil ieman ûf in gebicket:
8128 Wenne er hât sîn dinc geschicket
8129 Daz er loben und schelten gelîche wiget,
8130 Biz daz der tôt im an gesiget.
8131 Swer nâch der werlde glanze trahtet
8132 Und gotes liebe lützel ahtet,
8133 Des muot, des guot, des werc, des wort
8134 Sint geneiget ûf ein ort,
8135 Daz gein der linken hant sich lenket
8136 Und lîp und sêle gein helle senket.
8137 Mit grôzen unsêlden sich der nert,
8138 Der daz guot mit sünden zert
8139 Daz er mit sünden hât bejaget.
8140 Swer armer liute kummer klaget,
8141 Der sol vil mêr dise armen klage,
8142 Die leider sich von tage ze tage
8143 Mit roube, diube, gesuoche nerent,
8144 Die liegent, triegent unde swerent
8145 Üm irdisch guot und ân gewizzen
8146 Bœser rede sich hânt geflizzen.
8147 Wen sol ir leben niht erbarmen?
8148 Wenne si sint arm vor allen armen
8149 Und wöllen doch wîse und ahpêr wesen.
8150 Vil dinges hân ich von in gelesen
8151 Und selber gesehen und ervarn,
8152 Daz ich durch vorhte, durch liebe muoz sparn
8153 Ich sach und hôrte einen guoten man
8154 Des sêle heilic ist, dâ vür ichz hân:
8155 Der sprach, er hêt wol vierzic jâr
8156 Geprediget und törste die wârheit gar
8157 Nie gepredigen als er sölte
8158 Und als er gern von herzen wölte.
8159 Gîtikeit, zorn, nît und haz
8160 Hânt Rôme gerücket her nâher baz
8161 Vil maniger mîle denne ez vor lac,
8162 Die wîle diu werlt einvelte pflac:
8163 Wenne altiu wîp und kleiniu kint
8164 Sô gar getürstic worden sint,
8165 Daz si gein Rôme oder über mer
8166 Getürren sich heben üm drî erper.
8167 Man sendet gein Flandern oder gein Gent
8168 Ein kint nâch koufe, dem siben ente
8169 Ungern bevolhen hête sîn amme;
8170 Welch obez smecket niht nâch sînem stamme?
8171 Manic koufman wâget über mer
8172 Sîn leben daz er sîn guot gemêr,
8173 Und sezte man im daz vür sîn sünde,
8174 Er fürhtet den wint und des meres ünde:
8175 Sol er den kouf niht tiure geben,
8176 Üm den er wâget sô verre sîn leben?
8177 Einer der swinde nâch guote trahtet
8178 Und einer der ûf guot lützel ahtet
8179 Sint beide gar ungelîch gemuot
8180 Wenne ir dewedern dunket guot
8181 Des andern leben und sîn sin:
8182 Der erste wênt daz grôz gewin
8183 Wîsheit bringe und sêlikeit:
8184 Sô ist der ander des gemeit,
8185 Daz in benüeget des er bât
8186 Und daz er frô ist swie ez gât:
8187 Daz hât er ouch vür sêlikeit:
8188 Doch twinget jenen grœzer leit,
8189 Der alle tage in sorgen lebet
8190 Und hin und her nâch guote strebet.
8191 Grôz guot hât ouch ofte manic man
8192 Die wîle im got gelückes gan,
8193 Mit dem er lop und êre erwirbet.
8194 Lêt er vil erben swenne er stirbet,
8195 Wie süln die kumen an sîn stat,
8196 Swenne einez das vierteil niht enhât
8197 Des guotes daz sîn vater hête?
8198 Swie gern daz als sin vater tête,
8199 Alein ez sî des selben muotes,
8200 Sô gebristet im doch ofte des guotes.
8201 Manic man wêr lange ein frumer man.,
8202 Gesigte im niht der kummer an,
8203 Der doch ein frumman ist des muotes
8204 Alein er arm sî des guotes.
8205 Swer an dem guote ze sêre verdirbet,
8206 Selten er werltlich êre erwirbet:
8207 Des stênt maniges menschen sinne
8208 Vil mêre wie ez guot gewinne,
8209 Denne wie ez got von herzen minne
8210 Daz ez dem êwigen smerzen entrinne.
8211 Ein heidenisch meister wîlent sprach,
8212 Dô er der gîtigen leben an sach:
8213 "Ein gitic mensche tuot nimmer wol
8214 Denne swenne ez stirbet und sterben sol,
8215 Daz ez der werlde denne rûmet
8216 Und an eim kratzen sich versûmet."
8217 Sîn sêle, sîn êre, sîn fleisch, sîn bluot
8218 Wâgt ê der gîtige denne sîn guot.
8219 Dem kargen ist manic mensche gram,
8220 Üm daz sîn hant an milte ist lam:
8221 Sô minnet den milten manic man,
8222 Dem er kein liep nie hât getân.
8223 Âne zwîvel, ez ist ein grôziu tugent
8224 Swer milte went sîn herze von jugent,
8225 Wenne er ist gote von himel genême
8226 Und ist der werlde niht widerzême:
8227 Ich meine der rehte milte hât:
8228 Unrehtiu milte ist missetât.
8229 Wizzet er ist ein sêlic man,
8230 Der rehte halten und geben kan.
8231 In der Wîsheit buoche stât
8232 Geschriben ein wort, daz lobes vil hât:
8233 "Der man ist sêlic ze aller frist,
8234 Der âne flecken funden ist
8235 Und der sîne hoffenunge niht enleit
8236 An golt, an schatzes wirdikeit."
8237 Loben sül wir disen man,
8238 Wenne er wunder hât getân:
8239 Er mohte und wolte niht übertreten,
8240 Als gîtige liute vil gerne têten;
8241 Ern hât ouch übels niht getân,
8242 Als gerne tête manic übel man,
8243 Swar man die rede wende oder kêre,
8244 Sô hêt wir alle gerne guot und êre
8245 Und senfte leben ûf ertrîche
8246 Und êwige fröude in himelrîche.
8247 Möhte daz gesîn, daz wêr mir liep:
8248 Sô wiirde niht sô manic diep,
8249 Schâcher unde rouber,
8250 Verrâter unde wuocherer,
8251 Die man leider daz êwige leben
8252 Üm irdisch guot und êre siht geben.
8253 [Selten er verre mit êren vert
8254 Swer vil geliuget und geswert.
8255 Swer sich wil mit eiden fristen,
8256 Der wil mich leider überlisten].
8257 Doch sint maniger leie liute
8258 Die erger sint denne rouber hiute,
8259 Die guoter liute leben verkêrent
8260 Mit bœsem bilde und die si lêrent
8261 Daz irn sêlen ist niht guot,
8262 Als leider manic mensche tuot.
8263 Meide und nunnen trügener,
8264 Ketzer, velscher, glîchsener,
8265 Verrâter, rihter und vürsprechen
8266 Die man den liuten siht âbrechen
8267 Ir guot mit valscher urteil:
8268 Des habe wir alle ein michel teil
8269 In steten, in dörfern, in bürgen, in gazzen,
8270 Die wir durch daz doch lützel hazzen,
8271 Und ist ir leben vil erger doch
8272 Denne jener, die manic mensche flôch.
8273 Nu sül wir aber vürbaz rennen
8274 Und unsern herren baz erkennen.

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 01.06.2004