LV. Von bo[e]sen richtern vn[d] vo[n] bo[e]se[n] schepphen an gerichte.

8275 Den gîtigen sül wir urloup geben
8276 Und grîfen an der rihter leben,
8277 Die etswâ rihten niht gar eben;
8278 Und ir schepfen ouch dâ neben,
8279 Der maniger dienet der gîtikeit
8280 Und gênt verholn in irm geleit,
8281 Biz daz si vallen in den brunnen
8282 Dem lützel sünder ist entrunnen.
8283 Nît, vorhte, liebe und irdisch guot
8284 Verkêrent maniges rihters muot.
8285 Man würget einen armen üm ein huon:
8286 Der rîche kan des niht getuon
8287 Daz ieman rihten wölle über in:
8288 Sîn guot verkêrt der rihter sin
8289 Und machent reht gerihte kranc.
8290 Dâ von sprach her Frîdanc:
8291 "Ob der tiufel wêre
8292 Der werlde rihtêre,
8293 Er rihtet baz, dâ vür ichz hân,
8294 Denne noch manic rihter habe getân."
8295 Kouf und urteil werdent blint,
8296 Swâ gîtige liute rihter sint.
8297 Swer koufen und verkoufen wil,
8298 Der went sich lügen und eide vil,
8299 Mit den er sînen kouf bewêre.
8300 Manic koufman ist triuwen lêre
8301 Ofte gein sînem ebenkristen,
8302 Swenne er in mit bœsen listen
8303 An sînem koufe ze schaden brenget.
8304 Der tiufel uns allen vil verhenget,
8305 Daz er hin nâch uns trenket în
8306 Sô wir gar sicher wöllen sîn.
8307 Manige liute legent ir sinne
8308 Ûf anders niht denne ûf gewinne:
8309 Und ob die kument ze verlüste
8310 Etswenne von manigerleie unküste
8311 Die si hânt, wer sol daz klagen?
8312 Wer hiez an gote si verzagen,
8313 Daz si guotes gewinnen wölten
8314 Mêr denne si ze rehte sölten?
8315 Hêt wir angest daz wir stürben,
8316 Nâch grôzem guote wir selten würben:
8317 Sô siht man uns nâch guote streben
8318 Als got uns nimmê habe ze geben.
8319 Tuont daz leien. daz ist niht guot:
8320 Swâ geistlich liute und pfaffen muot
8321 Valsch an sînem koufe hête,
8322 Gein gote er swinde missetête.
8323 Weiz ieman wâ die liute leben,
8324 Die rehten kouf ûf erden geben?
8325 Die rîchen haltent naht und tac,
8326 Die wîl und ez geligen mac,
8327 Getreide, fleisch, tuoch und wîn:
8328 Twünge arme liute niht kummers pîn,
8329 Si têten ouch vil lîhte alsam:
8330 Wederm sol ich nu wesen gram?
8331 Si tuont als ich vil lîhte ouch tête,
8332 Swenne ich niht grôzer gülte enhête.
8333 Doch sint die rîchen vil mêr schuldic,
8334 Die kummer niht machte ungeduldic
8335 Wölte si begnüegen des si hêten:
8336 Wenne si nieman nihtes bêten,
8337 Als arme liute müezen tuo
8338 Mit manigen smerzen spât und fruo.
8339 Ein reht rihter hât êre ûf erden
8340 Und mac sîn sêle ouch heilic werden,
8341 Tuot er daz got geboten hât
8342 Der in hie setzet an sîner stat.
8343 Ein rihter sol in sîner hant
8344 Ein wâge hân, daz im bekant
8345 Sîn alle sache wie er die wêge,
8346 Daz er rehtes gerihtes pflêge.
8347 Unrehten kouf wir selten hêten,
8348 Swâ die rihter reht têten.
8349 Man hât von in geschriben vil,
8350 Des ich niht mêr hie rüeren wil.
8351 Swâ man vürsprechen unde schepfen
8352 Hœrt anderswâ ir urteil schepfen
8353 Denne ûz des êwigen lebens brunnen,
8354 Dâ ist der wîsheit in zerunnen:
8355 Wenne unser herre tuot uns kunt
8356 Und sprichet durch künic Davides munt:
8357 "Rihtet rehte, menschen süne!
8358 Ein trâm ist grœzer denne ein büne,
8359 Ein berc ist grœzer denne ein hûs,
8360 Ein helfant ist grœzer denne ein mûs";
8361 Disiu wort lege ich dar zuo:
8362 "Merke ein rihter, wie er tuo"!
8363 Daz ander merket ir selber wol:
8364 Wîse liute man niht vil strâfen sol.
8365 Lîp, sêle, guot, êre, lop und heil
8366 Nimt schepfen und vürsprechen valsch urteil.
8367 Selten wir gesehen haben
8368 Swarze swanen und wîze raben:
8369 Noch seltseiner diuhte mieh ein rihtêre,
8370 Der gereht an allen sachen wêre.
8371 Nu merket mîniu wort vil eben:
8372 Ich wölte gern ûf erden leben,
8373 Daz mir die wîle kein leit geschêhe
8374 Biz mich ein rehter rihter sêhe -
8375 Âne got aleine -, daz mich der hienge
8376 Und sînen gewalt an mir begienge,
8377 Er wêre arm oder rîch,
8378 Geistlich oder werltlîch:
8379 Wenne man minnet schaz nu mêre
8380 Denne got und lîp, sêle und êre.

LV. Von Juristen vn[d] Judisten wie die an gerichte tu[o]nt.

8381 Susanna und Daniêl lêrent uns wol
8382 Wie man reht rihten sol,
8383 Und der wîse Salomôn,
8384 Der zwuo hübsche frouwen schôn
8385 Schiet von herten iren kriegen
8386 Üm zwei kindelîn in der wiegen.
8387 Alein nu aller untriuwen walten
8388 Unser jungen mit den alten,

LVI. Von vngetrewen Judisten.

8389 Besunder ich doch triuwen lützel vinde
8390 An jüden, an vögten, an hofgesinde,
8391 An bœsen erzten, an bœsen kristen
8392 Die dâ geheizen sint judisten,
8393 Die sich rehtes under nement
8394 Und sich slehter wârheit schement,
8395 Die manic dinc wol möhten slihten
8396 Und mit kurzen worten ûz rihten
8397 Und schiebent ez ûf durch irn geniez.
8398 Swer vor in sprichet, sant si griez
8399 Und sprichet hin wider, griez si sant,
8400 Der hât verlorn sâ zehant;
8401 Spricht aber einer, vinger si dûme,
8402 Des sache wirt verrihtet kûme;
8403 Sprichet er aber, dûme ist vinger,
8404 Sô wirt sîn sache vol geringer,
8405 Ob sîn friunde dar zuo dringent
8406 Die in den ôren süeze klingent.
8407 Si ziehent daz reht üm bî der nasen.
8408 Wöllen si, sô sint mîn muomen basen,
8409 Wöllen si, sô sint mîn basen muomen
8410 Si grîfent den rihtern in den guomen
8411 Und verkêrent in den sin,
8412 Daz si nâch in müezen gin.
8413 Swenne si teilent den gewin,
8414 Sô wirt in silber, dem rihter zin,
8415 Der selber niht ist wol gelêrt:
8416 Dem wirt daz hinder her vür gekêrt
8417 An manigen grôzen sachen.
8418 Des siht man ofte si wachen
8419 Die langen naht biz hin gein dem tage,
8420 Wie jener des sache, dirre jens klage
8421 Sô lange verziehen, biz daz sîn habe
8422 Kume von dem rosse zuo dem stabe.
8423 Swer mich wil wîsen an daz reht
8424 Und selber ist gern nnrehtes kneht,
8425 Der lêret mich mîn sêle behalten
8426 Und lêt den tiufel sîner walten.
8427 Wer vant ûf erden ie grœzer triuwe
8428 Denne daz ein mensche in êwige riuwe
8429 Sich selber stieze und in helle pîn
8430 Und mir füegte êwiger fröuden schîn,
8431 Ob ich nâch siner lêre tête
8432 Und ez gewalt ir beider hête?
8433 Âne zwifel, ich sölte im immer danke.n
8434 Swer ê selber wölte wanken
8435 Von dem rehten, denne er mich lêrte
8436 Dâ mit mîn sêle ir pîn gemêrte.
8437 Wer sölte denne getriuwe juristen
8438 Niht haben vür guote ebenkristen,
8439 Die uns gein himelrîche wîsent
8440 Und si der werlde wollust prîsent?
8441 Ir zungen sint nütze und unnütze
8442 Als pfile und strâlen, mit den ein schütze
8443 Frume und schaden füegen kan,
8444 Als er den linten denne gan. -
8445 Swelch kunst sich ze der heiligen schrift
8446 Niht rehte mischet, diu ist ein gift.
8447 Juden lêre und wîser heiden
8448 Hânt uns dinge vil bescheiden,
8449 Diu gar nütze und guot uns sint:
8450 An maniger stat sint si doch blint,
8451 Die si gar tiefe hânt gesuochet
8452 Und der nu wênic ieman geruochet:
8453 Plato und Aristotiles,
8454 Seneca und Socrates,
8455 Demostenes und Dyogenes,
8456 Tullius, Empedocles
8457 Und ander alter meister vil,
8458 Der ich hie niht nennen wil.
8459 Swer der buochen volget nâch
8460 Ze sêre, der merke wie geschach
8461 Sant Jeronimo dem heiligen man,
8462 Dô er die heiligen schrift hin dan
8463 Leite und gerne diu buoch las,
8464 An den unsers herren lop niht was:
8465 Des wart er slâfende alsô geslagen,
8466 Daz erz wachende muoste klagen:
8467 Daz vindet man von im geschriben.
8468 Wol si, die ir zît vertriben
8469 Hânt mit gotes lêre ûf erden!
8470 Die süln himel bürger werden.
8471 Swer des wibels volger ist,
8472 Der wirt gefüert in rosse mist:
8473 Swer heiliger schrift volger ist
8474 Der wirt dir liep, herre Jhesu Crist!
8475 Swer niht wil volgen der heiligen schrift,
8476 Des wîsheit nimt vür honic gift.
8477 Swer rehtbuoch lernet durch gerehtikeit,
8478 Des arbeit ist wol angeleit:
8479 Swer aber si lernet durch gîtikeit,
8480 Des sêle wirt ez hin nâch vil leit.
8481 Ez machent ofte bœse kristen,
8482 Die leien sint mit swinden listen,
8483 Daz vil wol gelêrte juristen
8484 Niht wol mügen vor in gefristen.
8485 Ô list gein listen, ô mist gein misten,
8486 Wes trœstestu dich voller kisten?
8487 Wir sîn alle gemacht von erden
8488 Und müezen wider ze erden werden
8489 Und wizzen niht wie lange wir leben:
8490 Waz sol diz kriegen und diz streben
8491 Sô kurzer zît, sô kranker habe?
8492 Wir îlen mit willen zuo dem grabe.
8493 Ein dinc vor gote gar übel zimt:
8494 Swelch mensche guot dâr üm nimt,
8495 Daz ez einem andern hilfet rehtes.
8496 Unser herre gert anders niht denne slehtes
8497 Und ganzer triuwen von uns allen:
8498 Sol unser leben im wol gevallen,
8499 Sô muoz daz herze ze aller stunt
8500 Wârhaft sîn und ouch der munt.
8501 Man redet ofte anders mit dem munde
8502 Denne man vindet ins herzen grunde:
8503 Dâ von sprach der wîse man,
8504 Des sprüche ich genuoc behalten hân:
8505 "Swer ein übel zungen hât,
8506 Der füeget manige missetât:
8507 Diu zunge reizet manigen zorn,
8508 Dâ lîp und sêle wirt von verlorn;
8509 Diu zunge manigen êret,
8510 Diu zunge ouch reht verkêret.
8511 Von übeln zungen daz ergienc
8512 Daz Crist an dem kriuze hienc.
8513 Diu bœse zunge ist ein vergift:
8514 Als sprichet David in sîner schrift:
8515 'Manic zunge müeste kürzer sîn
8516 Und stüende ez an dem willen mîn.
8517 Ein übel zunge scheiden kan
8518 Liebez wîp und lieben man,
8519 Daz merke wir hie und anderswâ:
8520 Dâ von sprach meister Senecâ:
8521 "Diu zunge ist slipferic, wenne si hât
8522 Ein gar fiuhte leger stat;
8523 Si vellet gein übel ê denne gein gnote,
8524 Man habe si denne in grôzer huote."
8525 Des dunket mich, daz einz juristen
8526 Wol mügen sîn und einz judisten:
8527 Juristen stênt dem rehten bî,
8528 Judisten sint niht valsches frî,
8529 Juristen sint gerehte liute,
8530 Judisten tuont vil übels hiute.
8531 Jûdas teilt judisten mite
8532 Sîns namen ein teil nach friundes site.
8533 Ouch sint die jüden ir genôz,
8534 Wenne ir gîtikeitist sô grôz
8535 Daz si nement vil grœzern gesuoch
8536 Denne jüden und ouch grœzern fluoch.
8537 Si habent entsetzet manigen man
8538 Guotes und êren und wöllen dâr an
8539 Aller schulde wesen frî,
8540 Doch wont der tiufel ir manigem bî.
8541 Juristen mac man niht enpern,
8542 Judisten siht man ofte ungern;
8543 Juristen gotes reht bekennent,
8544 Judisten reht und ê zetrennent;
8545 Juristen sich bœser dinge schement,
8546 Judisten guot âne êre în nement;
8547 Juristen stênt nâch gotes minne,
8548 Judisten gênt nâch bœsem gewinne;
8549 Juristen an ir sêle gedenkent,
8550 Judisten von der wârheit wenkent;
8551 Juristen volgent der heiligen schrift,
8552 Judisten kluocheit ist ein gift;
8553 Juristen tuont.niemanne leide,
8554 Judisten brechent triuwe und eide
8555 Und sint nâchgriffic als ein ar,
8556 Wâ in iht sache wider var
8557 Der si geniezen, si sî reht
8558 Oder ein wênic krumpeleht.
8559 Gerehte liute sint juristen,
8560 Judisten abgöte sint ir kisten.
8561 Judisten în ziehens nie bevilte,
8562 Man siht aber ir keinen selten milte:
8563 Si wöllen ie daz ir kunst in frume,
8564 Swem ouch si ze schaden kume.
8565 Wen sölte der künste niht verdriezen
8566 Die lenge, der er niht möhte genîezen?
8567 Swer reht buoch lernt durch reht gerihte,
8568 Der kêrt sich niht an valsch getihte.
8569 Juristen werdent herren ûf erden,
8570 Judisten süln niht tiurre werden.
8571 Hôchfart und gîtikeit
8572 Ofte sint bî den judisten,
8573 Die grôz guot hânt în geleit
8574 Und gewunnen mit valschen listen.
8575 Geloben ist judisten pfluoc,
8576 Der guotes im gewinnet genuoc,
8577 Ê denne diu werc sich zuo den worten
8578 Füegen vor der sibenden pforten.
8579 Ir süeziu wort, ir schœn gebâren
8580 Künnen einveltiger liute vâren
8581 Als ein gemâlter stellio,
8582 Des heimlîche ieman selten wirt frô.
8583 Swer nu sî ein frumer man,
8584 Der neme sich keines getiusches an
8585 Und lâze ouch bœse gewinne varn,
8586 Wil er sîn sêle bî gote bewarn.
8587 Swem êre ist lieber denne guot,
8588 Selten er immer missetuot;
8589 Swer ân êre gewinnet guot,
8590 Der hât sîn sêle niht wol behuot ;
8591 Guot ân êre wirt nimmer guot,
8592 Guot mit êren wunder tnot;
8593 Swem êre ist lieber denne guot,
8594 Der treit mit êren hôhen muot:
8595 Swem guot ist lieber denne sîn êre,
8596 Der wil hie nît, dort leit gemêre;
8597 Swer êre bî grôzem guote hête,
8598 Des fröude wêr nu und immer stête.
8599 Wer kan ân sünde grôz guot gewinne?
8600 Grôz guot gewunnen wandelt sinne.
8601 Manic sêle verliuset grôz guot,
8602 Grôz armuot daz selbe tuot:
8603 Wol si, die des mitteln walten
8604 Und lîp und sêle in got behalten!
8605 Swer sînem leben ein guot ende
8606 Wil geben, der sol diz ellende
8607 Durch unsers herren liebe smêhen,
8608 Wil er sîn antlütze immer sehen.
8609 Manic mensche ist süezer worte vol,
8610 Des herze doch innen ist triuwen hol.
8611 Daz ist der liute friunt nâch wân.
8612 Swelch glocke niht sleht beidenthalp an,
8613 Diu entouc in dirre werlde niht:
8614 Getriuwen liuten alsam geschiht,
8615 Die worte und werke einveltic sint:
8616 Die dunkent tôreht unde blint.
8617 Zwivalt, drivalt, sibenvalt
8618 Hânt dich vertriben, slehtiu einvalt,
8619 Daz du worden bist gar unwert
8620 Swâ man mêre guotes denne gotes gert!
8621 Maniger wênt, ez habe kraft
8622 Und sol ouch sîn ein meisterschaft,
8623 Swer schalc mit schalke vâhen kan:
8624 Sô wölte ein sleht einveltic man
8625 Ungern bekümmern sich dâ mite,
8626 Wenne ez ist ein bœser site.
8627 Dem tiufel wont valsch und schalkeit bî,
8628 Gotes diener sint ir beider frî.
8629 Swer ein meister ist der künste,
8630 Der darbet des obersten meisters günste:
8631 Wie kan daz immer werden guot,
8632 Daz an der sêle uns schaden tuot?
8633 Swer trahtet daz er grôz guot gewinne
8634 Ûf erden, der muoz sîn sinne
8635 Wenden ofte von gotes liebe.
8636 Wê dem, der selber im wirt ze diebe!
8637 Der guot wol weiz und übel tuot,
8638 Der êwige fröude üm helle gluot
8639 Wehselt, wie hât der gevarn
8640 Und sich des vor wol möhte bewarn!
8641 Der volget der pfaffen lêre niht!
8642 Ob er etswâ einen pfaffen siht
8643 Niht gên und stên vil lîhte als eben
8644 Als er ze rehte sölte leben?
8645 Ob maniger vellet in ein hor,
8646 Der andern liuten lieht treit vor,
8647 Sô hüetent si sich dester baz
8648 Daz si mit schanden iht werdent naz.
8649 Juristen lernent durch gîtikeit
8650 Vil mêre denne durch gerehtikeit:
8651 Daz ist manigen liuten leit,
8652 Die wârheit und bescheidenheit
8653 Niht künnen gefristen vor irn listen.
8654 Bœse judisten, bœse kristen
8655 Sint ûf erden in manigen landen,
8656 Die mit sünden und mit schanden
8657 Guot nement ofte mêr denne si sölten
8658 Ob si daz reht ansehen wölten.
8659 Wâr ist reht, niht krump ist sleht,
8660 Swer triuget der ist des tiufels kneht.
8661 Man fünde geschriben vil reht gerihte,
8662 Swer rihten wölte nâch rehter slihte
8663 Und niht mit bœsen listen fristen;
8664 Valsch füllet maniges judisten kisten.
8665 Rihter, die guot gewizzen haben,
8666 Sint seltseiner nu denne wîze raben.
8667 Swer rehtbuoch lernet durch gerehtikeit,
8668 Dem ist unreht gerihte leit:
8669 Swer aber si lernet durch gîtikeit,
8670 Manic valsch er gein der wârheit leit.
8671 Ê denne er sich lâze über kriegen,
8672 Sô lêt er ê sîn sêle fliegen
8673 Über triuwe und über reht:
8674 Sô macht er krump daz ê was sleht;
8675 Ê denne er ouch sîns lôns enbêr
8676 Sô ist der igel im als ein ber.
8677 Swer valsch und bœse kündikeit
8678 In rehtbuoch stœzet, daz wirt im leit
8679 Sô sîn klaffen ein ende nimt:
8680 Wenne valsch bî wârheit übel zimt.
8681 Swelch rihter gotes reht ansiht,
8682 Der bedarf unnützer klaffe niht:
8683 Swaz krump wil sîn, daz machet er sleht,
8684 Swaz valsch wil sîn, daz machet er reht.
8685 Man vant bî armen auctoristen
8686 Vor tûsent jâren bezzer kristen
8687 Denne bî sûren argumentisten
8688 Und bî gîtigen judisten,
8689 Die mit worten und mit listen
8690 Manigen gevangen ûz einer kisten
8691 In ein ander kisten brengent,
8692 Sô kriege sich vor gerihte lengent.
8693 Des endekristes kamerer
8694 Sint ûf erden gar ahpêr,
8695 Die guot in sament âne sêlde, âne êre,
8696 Mit dem er die werlt verkêre:
8697 Und kême er hiute, dâ vür ichz hân,
8698 Er fünde manigen cappellân,
8699 Der im diente und nême sîn guot!
8700 Ô Jhêsu Crist! hâstu dîn bluot
8701 Vergozzen üm silber und üm golt,
8702 Sît dîn volc in ist sô holt?
8703 Swie gereht des armen sache sî,
8704 Doch muoz sîn silber werden blî
8705 Und kupfer werden sîn rôtez golt,
8706 Ist der rihter im niht holt,
8707 Des herze mêre nâch bœsem gewinne
8708 Stêt denne nâch der wâren minne.
8709 Blî, nazzer sant wart nie sô swêr
8710 Als ein gîtic, übel rihter:
8711 Des sprach der wissage Osêê
8712 Wîlent in der alten ê:
8713 "Diu werlt unrehte rihter hât
8714 Von des volkes missetât."
8715 Unser herre siht an die einen persônen:
8716 Swer wol im dient, dem wil er lônen
8717 Mit der êwigen himel krônen.
8718 Man siht uns ofte ein ander schônen
8719 Durch vorhte, durch liebe, durch miete, durch haz,
8720 Wem loubet der oberste rihter daz?
8721 Des rîchen wort merket man ze grunde:
8722 In maniges armen mannes munde
8723 Verdirbet wort und witze vil,
8724 Sô sîn rede nieman hœren wil.
8725 Swer biuget sîn ougen ûf ein ort
8726 Sô er vür bringen sol wîsiu wort,
8727 Der rimpfet sich selber wunderlîch
8728 Und wênt er sî gar künstenrîch.
8729 Sîn kele er würget als ein wergel,
8730 Swenne im der starken künste mergel
8731 In dem hirne beginnet ûf gên.
8732 Wer möhte denne vor im bestên?
8733 Als ein witewalch er kallet,
8734 Swenne er von tiefer künste schallet,
8735 Die er wol ûz kan rihten schône
8736 Als der gouch in sînem dône.
8737 Getriuwer juristen mein ich niht,
8738 Ir ist aber lützel, als man giht:
8739 Dâr üm hân ich keinen strît,
8740 Der tiufel weiz wol wie daz lît.
8741 Ich fürhte daz Symôn und Jezî
8742 Den cardinâlen wonen bî:
8743 Ich enweiz ob si iht guotes râten
8744 Bischöfen, ebten und andern prêlâten.
8745 Gewalt tuot ouch vil selten reht.
8746 Einvalt, wârheit unde sleht
8747 Hât drivalt, lügen und krump vertriben:
8748 Die drî sint bî dem gerihte beliben,
8749 Ob daz gerihte heizen sol
8750 Daz selten wirt gerihtet wol,
8751 Dâ man die sache sô lange ziuhet ümme
8752 Biz man si bringet an die krümme
8753 Durch haz, durch vorhte und geniez
8754 Anders denne got rihten hiez:
8755 Des sint si erger vil denne heiden,
8756 Die reht und wârheit wöllen scheiden.
8757 Sît fride und barmherzikeit,
8758 Wârheit und gerehtikeit
8759 Wonent dem obersten rihter bî:
8760 Welch rihter ist unrehtes fri?
8761 Wizzet daz tegelich gegihte
8762 Und vor gerihte valsch getihte
8763 Und alle tage krût mit nihte
8764 Sint driu jêmerlich gerihte.
8765 Die liute sich übels dâ verstênt,
8766 Swâ jüden, bütel und erzte în gênt.
8767 Juristen ouch selten ieman gert,
8768 Er sî mit kriegen denne beswêrt.
8769 Swâ friuntschaft und rehtiu triuwe wêre,
8770 Dâ wêre judisten kunst unmêre.
8771 Swer kriegen wol und kriegen muoz,
8772 Der sol in nîgen üm irn gruoz,
8773 Wenne ir kunst ist niergen sô wert
8774 Leider denne dâ man krieges gert:
8775 Der möhten si manigen und sölten
8776 Schier verrihten, ob si wölten.
8777 Daz manic sache unverrihtet belîbet
8778 Und daz man hin und her si trîbet,
8779 Daz machet der krieger ungedult:
8780 Dâr an gibe ich in kein schult.
8781 Swer aber sich gern lieze verrihten,
8782 Dem sölte man sîn sache slihten
8783 Und sölte in niht ümme füeren:
8784 Manic krump holz wirt gerihtet nâch snüeren.
8785 Judisten kunst hât nu verdrungen
8786 Bî den alten und bî den jungen
8787 Schuolbuoch und aller künste muoter:
8788 Daz machet der gîtikeit fuoter.
8789 Der nie gelernet ars que pars,
8790 Der wirt getürstiger denne her Mars,
8791 Der aller vehter abgot was,
8792 Als ich von im geschriben las.
8793 In machet der gîtikeitgêze
8794 Sô küene, sô traz und ouch sô rêze,
8795 Daz er der künste sô gar vergizzet,
8796 Diu allen künsten ir pfrüende mizzet.
8797 Daz er kan, daz lobet er,
8798 Oben ist er vol und unden lêr ;
8799 Er lîdet ouch ofte durch gîtikeit
8800 Mêr nîdes denne durch gerehtikeit.

LVIII. Ein mere vo[n] eine Judisten wa[n] die sint alle vnkristen.

8801 Ich hôrte und sach daz einer wart,
8802 Der het grâ houbet und grâwen bart,
8803 Von einem worte sô gar geunêrt
8804 (Daz schuoler muoter in baz gelêrt
8805 Hête, des wêre im nôt gewest):
8806 Er stuont und gluote als ein heiz test
8807 Und sach als ein diep vor der zente:
8808 Die schande leit er in einem sente.
8809 Ân zwifel und têt in laster wê.
8810 Si erwêgen sich kleines gewinnes ê
8811 Denne daz si manige unwirde lîden
8812 Und mit scharpfen worten snîden
8813 Ûf sich liezen und ouch sich schelten.
8814 Nu siht man ofte ir einen gelten
8815 Die koste vür jenen, der vor gerihte
8816 In wolte verderben und vernihte:
8817 Sô getân gedult fünde nieman hiute
8818 An in und wêren si klôster liute.
8819 Ôwê her tiufel, daz iuwer lêre
8820 Sô vol hât krefte, daz müet mich sêre.
8821 Daz man durch iuch daz gerne lîdet
8822 Daz ofte hirn und herze snîdet!
8823 Ez wêre vil nütze daz alle prêlâten
8824 Diu rehtbuoch könden, daz si gerâten
8825 Iren undertânen dester baz
8826 Könden, wenne si sint durch daz
8827 Gemachet daz alliu kristenheit
8828 Âne kriec lebe mit bescheidenheit.
8829 Swelch meister des grôze arbeit hât,
8830 Daz er dem gêbe getriuwen rât
8831 Der im getrûwet ze sînen sachen,
8832 Sölte der vil schrîben und vil wachen,
8833 Des lônte man im ze rehte wol:
8834 Nieman dem selben gelîchen sol
8835 Unnütze nager, die vürsprechen,
8836 Die man den liuten abe siht brechen
8837 Ir guot mit untriuwen und mit klaffen,
8838 Si sîn leien oder pfaffen.
8839 Swer în nimt und niht ûz wil geben,
8840 Der wil unlange mit êren leben.
8841 Selten er grôzer êren pfliget
8842 Swer bœsen gewin vür êre wiget.
8843 Wem ist der liep in himelrîch,
8844 Dem nieman holt was ûf ertrîch?
8845 Getriuwer juristen hilfe und rât
8846 Vil manigen kriec gescheiden hât,
8847 Swelhe aber gênt ûf gîtikeit,
8848 Den ist suone und fride leit:
8849 Ir kunst wêr nütze, und wêr ir muot
8850 Nütze als diu kunst ist, daz wêr guot.
8851 Doch wizzet, swer swarze kündikeit
8852 Ze wîzer und sleht.er wârheit leit,
8853 Daz der vil bœsen lôn enpfêhet
8854 Swenne er dem swarzen rihter nêhet.
8855 Bœsiu kluokeit übel tücket
8856 Sô man die goukel hüete vür rücket,
8857 Die nu vil maniger lîhten sache
8858 Sint ûf gesazt ze einem obedache.
8859 Des dienstes sol man in wol lônen:
8860 Daz aber si niemannes schônen,
8861 Daz ist ir vürsaz und ir kunst.
8862 Gotes liebe und friundes gunst
8863 Sint gein gewinne gelich gewegen.
8864 Manic klage muoz belîben under wegen,
8865 Daz getriuwe und wârhafte arme liute
8866 Niht rehtes gerihtes vindent hinte.
8867 Dâ von sprach in der alten ê
8868 Ein wîssage, der hiez Osêê.
8869 "Wârheit und barmherzikeit
8870 Und gotes lêre sint hin geleit
8871 Ûf erden; fluochen. morden, liegen,
8872 Steln, êbrechen, unreht kriegen
8873 Sint überflüzzic, wenne ein sünde
8874 Die andern rüert, als ich iu küude.
8875 Der bœsen liute freidikeit
8876 Gefröuwet die künige, ouch ist niht leit
8877 Den fürsten lügen, swâ si sint:
8878 Diz machet die werlt an tugenden blint."
8879 Sô sprach der heilige Isaias,
8880 Der ouch ein hôch wîssage was:
8881 "Wê den, die dâ kreftic sîn
8882 Daz si trinken starken wîn,
8883 Die einem gerehten nemen sîn reht
8884 Und jeme, der dâ ist ungereht,
8885 Durch gâbe helfen ûz der nôt
8886 Anders denne in got gebôt!"
8887 Ouch sprach der heilige Micheas,
8888 Als ich in sînem buoche las:
8889 "Ich künde dir, mensche, waz dir guot ist
8890 Und waz got vordert ze aller frist.
8891 Daz dîn herze sî bereit
8892 Ze tuonne gerihte und gerehtikeit,
8893 Und daz du mit sorgen stêst
8894 Vor dînem gote, swar du gêst."
8895 Wenne ez sprach her Frîdanc
8896 Drî sprüche, die sint niht ze lanc:
8897 "Swer unreht wil ze rehte hân,
8898 Der muoz vor gote ze rehte stân.
8899 Vor gote wirt er geswachet,
8900 Swer reht ze unrehte machet.
8901 Vürsprechen, klaffen hât kurze frist,
8902 Swenne got selber rihter ist."
8903 Nu sül wir aber vürbaz rennen
8904 Und unsern herren baz erkennen.

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 26.02.2004