XCVII Von kinde weisheit vnd von iu[n]gen fu[e]chsen.

14895 Vil wênic wir liute ûf erden vinden,
14896 Die liebe geleben an irn kinden
14897 Und den triuwe lônt mit triuwen,
14898 Daz mac wol vater und muoter riuwen
14899 Grôz liebe, grôz kost und grôz arbeit,
14900 Diu si hânt ûf ir kint geleit,
14901 Diu in niht dankent als si sölten
14902 Ob si daz reht ansehen wölten.
14903 Kint sint nu traz und unverwizzen:
14904 Diu kintlicher spil sich wîlent flizzen,
14905 Zölle, trîbekugeln und mîzen,
14906 Diu siht man sich nu luoders flîzen,
14907 Bœser worte, lügen mit eiden
14908 Und ê der zît sîn unbescheiden,
14909 Spilerlin und slüntlin
14910 Vertrogen mûder huntlin,
14911 Diu vor unwirde diu wörter spaltent
14912 Oder si sô lange in in behaltent,
14913 Daz man si zwirunt frêgen muoz.
14914 Ich fürhte daz armen liuten ir gruoz
14915 Vil selten güetlich werde gegeben,
14916 Süln si ze langen jaren leben.
14917 Jâ smêhent ouch etswâ nu diu kint
14918 Die, von den si geborn sint.
14919 Ze keinen tugenden er sich nêhet,
14920 Swer sîn vater und muoter smêhet;
14921 Swer sêlde und êre im wil gemêren,
14922 Der sol sîn vater und muoter êren:
14923 Daz lêret uns alle und heizet uns tuon
14924 Der meide kint und gotes sun.
14925 Gewahsen liute vant man witzic
14926 Wîlent, sô sint nu gar vürspitzic
14927 Ûf argiu dinc nu kleiniu kint,
14928 Daz der alten witze sint
14929 Worden blint, wenne man ir niht
14930 Ahtet als man ofte siht.
14931 Kint kunnen vil baz denne die alten
14932 Ein rede gemerken und ouch behalten
14933 Und bezzernt sich doch lützel dâ bî,
14934 Swie drispitzic zunge und herze in sî.
14935 Ûf werltlich bôsheit hânt si witze,
14936 Gein tugenden sint si wanwitze.
14937 Diu jugent truoc aber mîn herze enbor,
14938 Daz ich gar wênic merkte hie vor
14939 Wâ mit die alten ümme giengen:
14940 Sô mîn gesellen mich enpfiengen
14941 Und mit mir sprungen, rungen, sungen.
14942 Sô dûhte mich mir wêr wol gelungen,
14943 Wenne maniges dinges ahtet ich niht
14944 Daz man nu von kinden siht.
14945 Manic kint ist an den ougen ein luhs
14946 Und in dem herzen ein kündic fuhs.
14947 Wie wirt im alter daz gestalt,
14948 Daz in der jugent sich machet alt?
14949 Wil ez sîn fröude in daz alter sparn
14950 Und denne nâch affenzegeln varn,
14951 Sô hât ez übel an geleit
14952 Sîner jugent wîsheit und arbeit.
14953 Mir grûwet, swenne gar kleiniu kint
14954 Hânt wîsiu wort und ernsthaft sint.
14955 Nu hœrt ein dinc, daz nie geschach:
14956 Ein aglaster zuo irre tohter sprach:
14957 "Kint, wiltu niht werden veige,
14958 Sô warte wâ der man sich neige
14959 Und mit der hant grîfe an die erden,
14960 Daz dînes lebens tage iht werden
14961 Kürzer, wenne sô wil er dich
14962 Werfen: des gedenke an mich
14963 Und fliuch von im!" "Daz têt ich gern
14964 Und möhtestu mich des gewern,
14965 Daz er den stein bî im iht hête
14966 Verborgen unter sîner wête".
14967 Diu aglaster sprach: "Var hin von mir,
14968 Ich kan niht mêr gerâten dir,
14969 Du hâst mêr liste denne ich hân!"
14970 Nu seht die jungen werlt an,
14971 Ob si niht vil mêr denne die alten
14972 Spitziger liste künnen behalten?
14973 Swer si nu gerne in vorhten hête
14974 Und allez daz gern gein in tête
14975 Daz man gein uns hât getân,
14976 Den hiez man einen bœsen man.
14977 Si wölten ungerne der koste leben,
14978 Die man uns hie vor hât gegeben.
14979 Ob man die wârheit sprechen sol,
14980 Sô wöllen kint nu stecken vol
14981 Und selten immer werden wan:
14982 Wê dem der niht gesparen kan!
14983 Der kinde leben ich selten prîse,
14984 Diu ê der zît sich dunken wise
14985 Und alter liute spotter sint:
14986 Manic mensche mit offen ougen ist blint.
14987 Gehôrsam, schemic und verswigen
14988 Wâren wîlent kint, sît man nu diu ligen
14989 Siht in luoder und in spil.
14990 Vîl wênic ieman nu wesen wil
14991 Gehôrsam als der junger was,
14992 Den wîlent der heilige man Helyas
14993 Sibenstunt nâch ein ander sante
14994 Ze dem mer, biz er erkante
14995 Daz ein wölkelîn ûf gienc
14996 An dem himel, von dem gevienc
14997 Diu hungerige werlt fröude grôz:
14998 Wenne wazzer schier von himel flôz,
14999 Des vihe und liute über al genôz,
15000 Wenne ez beide berge und tal begôz,
15001 Ûf die sehs mânen und driu jâr
15002 Nie zaher was kumen, daz ist wâr.
15003 Welch kneht, dierne oder kint,
15004 Die leider nu alle trazmüetic sint,
15005 Begönde des weges niht verdrieze,
15006 Ob ir meisterschaft si hieze
15007 Sibenstunt nâch einander gên
15008 Über siben schrite und stille stên
15009 Sô lange, biz daz in würde bekant
15010 Dâr üm man si hête ûz gesant?
15011 Wâ ist nu der münche iht vil
15012 Als der von dem ich sagen wil,
15013 Der sînem abte was alsô
15014 Gehôrsam, daz er niht ein ô
15015 Volschriben wolte dô er in hiez
15016 Nâch im gên den maniger liez
15017 Gên als er gienc und schier niht wolte
15018 Kumen als er ze rehte sote?
15019 Swem der alten veter leben
15020 Wol ist kunt, der weiz diz eben.
15021 Gehôrsam, swîgen unde scham
15022 Sint leider an beiden beinen lam.
15023 Wil man schuoler nâch êren ziehen,
15024 Sô wöllen si von der schuole fliehen:
15025 Lêt man in aber iren willen,
15026 Sô kan irn traz nieman gestillen.
15027 Manic mensche verdirbet von krankem muote
15028 An lîbe, an sêle, an êren, an guote.
15029 Schœn antlütze und wol schrîbendiu hant,
15030 Guotiu stimme bûwent ofte fremdiu lant:
15031 Schœn antlütze junge meide betriuget,
15032 Wol schrîbendiu hant irem meister liuget,
15033 Wol singendiu kele vil manigem schuoler
15034 Machet ê der zît die schuole unmêr
15035 Manic vogellîn singet von herzen wol
15036 Und muoz sîn spîse gar wîten hol:
15037 So belîbet ein esel in sînem stalle,
15038 Der selten lebt in hôhem schalle
15039 Und hât doch sîn gewisse spîse,
15040 Alein er sî weder schœne noch wîse.
15041 Man siht vil schuoler irre loufen,
15042 Daz si ir dienste ze tiure verkoufen
15043 Wöllen und ir arme kunst.
15044 Swer nu wil hân der frumen gunst,
15045 Der muoz getriuwe und diensthaft sîn
15046 Und under wîlen lîden pîn.
15047 Swer niht wil lernen die wîl er mac,
15048 Der gelebt im manigen leiden tac:
15049 Sô man die gelêrten vor im êrt
15050 Und mit unwirden den nac im kêrt,
15051 Sô riuwet in denne daz er niht baz
15052 Lernte, dô er müezie saz.
15053 Bœse bilde verderbet ouch kinde vil,
15054 Von den ich nimmer schrîben wil.
15055 Uns lêrt aber ein Philosophus
15056 In einem sînem buoche alsus:
15057 "Man sol grœzerre zühte walten
15058 Vor jungen kinden denne vor alten
15059 Liuten, wenne die wizzen wol
15060 Wie man lebt und leben sol:
15061 Sô weiz ein kindelîn anders niht
15062 Denne als ez hœrt und vor im siht."

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 01.06.2004