CI. Von dem neide vn[d] sein[er] gespiln.

15549 Die rede lâze ich dâ bestên
15550 Und wil aber vürbaz gên
15551 Gein des nîdes ingesinde
15552 Und sîner gespiln, swâ ich die vinde:
15553 Swelhe mir dâ vorne sint entrunnen
15554 Bî dem dorne und bî dem brunnen,
15555 Die muoz ich suochen bî der lachen.
15556 Deste lenger muoz ich machen
15557 Diz büechelîn: swen des verdrieze,
15558 Der gê ze velde ûz und schieze
15559 Üm ein ort gein einem zil:
15560 Wir haben dennoch sîn hie ze vil.
15561 In gotes namen hebe ich an
15562 Die rede als ich si gelâzen hân.
15563 Nît und sîn muoter gîtikeit,
15564 Die rîchen und armen ofte tuont leit,
15565 Sint niht getriuwe einander gar.
15566 Nu hœrt ein bîspel, daz wol wâr
15567 Ein teil mac sîn, swie ez nâch wân
15568 Uns schribe meister Aviân:
15569 Ein bote wîlent wart gesant
15570 Von einem künige in diu lant,
15571 Daz er der liute gemüete sölte
15572 Mit listen ervarn swie er wölte.
15573 Dô kâmen zwêne man vür in,
15574 Die heten beide ungelîchen sin,
15575 Wenne einer was gîtic alle zît,
15576 Den andern twanc haz unde nît.
15577 Dô sprach der bote: "Mich hât gesant
15578 Ein rîcher künic ûz in diu lant,
15579 Daz ich einer bete sol gewer
15580 Ob ieman ihtes von mir ger:
15581 Und swer von êrste sich kan enthaben,
15582 Der sol der selben gâbe zwuo haben."
15583 Dô sprach der gîtige nâch sînem site
15584 Ze dem nîdischen: "Wiltu bite"?
15585 Der nîdische sprach: "Nu bite du ê,
15586 Swie ez mir hin nâch ergê!"
15587 "Bite du vor, sô bite ich nâch!"
15588 Sprach der gîtige. Dô daz gesach
15589 Der nîdische daz im was sô gâch,
15590 Ze dem boten er dô sprach:
15591 "Herre, kumt iurre worte niht wider!
15592 Seht, ich lege mich vor iu nider
15593 Und bite iuch, daz ir brechet mir
15594 Ein ouge ûz, des ich gern enbir!"
15595 Er sprach: "Wâr üm wiltu daz tuon?
15596 Bite eins andern, lieber sun!"
15597 "Ir sült nâch frumes mannes site
15598 Mich gewern des ich bite,
15599 Des enwil ich niht enbern!"
15600 Er sprach: "Sô wil ich dichs gewern!"
15601 Und brach ein ouge im ûz zehant.
15602 Dô sprach er: "Herre, nu sît gemant
15603 Daz mîn geselle der gâbe zwuo
15604 Empfâhe, daz gehœrt dar zuo!"
15605 Do wart der gîtige geworfen nider
15606 Gesehende und stuont ûf blint wider.
15607 Zehant dar nâch dô diz geschach,
15608 Der bote zuo in beiden sprach:
15609 "Iuwer beider ungemach ist mir leit:
15610 Dîn nît und sîn gîtikeit
15611 Hât driu ougen iu zwein verlorn:
15612 Der kriec wêr bezzer vor verborn!"
15613 Ich fürhte des, man vinde noch hiute
15614 In der werlde als übel liute,
15615 Die gern in liezen ein ouge ûz brechen
15616 Dâr üm, daz si sich möhten gerechen,
15617 Als der nîdische wart gerochen
15618 An jeme, dem zwei wurden ûz gebrochen.
15619 Ein buoch heizet Paralipomenon,
15620 In dem vinde wir geschriben schôn
15621 Von hern Adâm die zal der tage,
15622 Manic hundert jâr fröude und klage
15623 Der liute, die dâ lebende wâren
15624 Und ouch sturben von jâren ze jâren:
15625 Wie vil der kinde und dirre hête,
15626 Waz wunders der und dirre tête,
15627 Von dis und jenes geslehte,
15628 Mit welhem rehte und ouch unrehte
15629 Einer den andern habe vertriben,
15630 Welhe an gote sîn bekliben
15631 Und welhe ouch von im sîn gescheiden
15632 Zwischen juden unde heiden.
15633 Swie vil des dâ geschriben sî,
15634 Doch wart diu werlt nie krieges frî
15635 Sît Kâîn sînen bruoder sluoc.
15636 Nît, valsch sint noch des tiufels pfluoc,
15637 Mit den er hiute ze acker gêt
15638 Und immer, die wîle diu werlt stêt.
15639 Wol im, er ist ein sêlic man,
15640 Der den zwein wol entrinnen kan,
15641 Er sî begeben oder frî!
15642 Wen vinde wir, der âne sünde si?
15643 Wenne manic mensche wont aleine,
15644 Des berze doch niht ist gar reine.
15645 Ze guotête gibt der tiufel ouch rête,
15646 Daz vasten, wachen und lanc gebete
15647 Der liute gedanke sô swinde krenkent,
15648 Daz si sich henkent oder ertrenkent
15649 Oder in in selber sô gar verderbent,
15650 Daz si kein lôn üm got erwerbent.
15651 Ich weiz ein klôster, in dem ich hân
15652 Einen sun, mit dem sich ein junc man
15653 Begap, der lebte fünf jâr alsô,
15654 Daz sîn herze nie wart frô
15655 Und nie kein mensche in sach erlachen:
15656 An vasten, an beten und an wachen
15657 Het er wol den besten teil.
15658 Dem riet der tiufel, daz er ein seil
15659 Nam und in einen stadel gienc
15660 Und sich an einen balken hienc.
15661 Und dô er zwirbelt hin und her,
15662 Dô brach daz seil, zehant lief er
15663 In einen wier und ertranc:
15664 Daz sîn guotête sô kleinen danc
15665 Üm got verdiente, des jâmert mich!
15666 Gotes tougen sint ungründelich:
15667 Wer weiz in welhem sinne er was?
15668 Ob er lîhte an der sêle genas,
15669 Und daz uns dunket ungehiur,
15670 Daz leit er vür sîn vegefiur?
15671 Nieman den andern urteiln sol,
15672 Got weiz unser aller herzen wol.
15673 Dirre jêmerliche marterer
15674 Was leider ein episteler,
15675 Den ich ofte hân gesehen
15676 Und hôrte im heiliges lebens jehen. -
15677 Tegelich senen krenket sinne
15678 Und schadet dem menschen ûzen und inne:
15679 Sô des der tiufel wirt gewar,
15680 Mit sînem gerête kumt er dar
15681 Und senket daz herze sô swinde nider
15682 Mit trûren, daz ez vil kûme sich wider
15683 Ûf rihtet in rehte verstandenheit.
15684 Diz senen machet ofte herzenleit:
15685 Ez füeget daz manige tumme liute
15686 Sich jêmerlich selber tœtent hiute
15687 Und lîp und sêle von gote scheident,
15688 Wenne si in selber diz lehen leident.
15689 Swer bœsen gedanken volget nâch,
15690 Dem tuot der tiufel ofte schâch
15691 Und mattet sîner sêlden spil,
15692 Swenne er sich selber niht hüeten wil.
15693 Von einem münche ich wîlent las,
15694 Der lîbes und muotes heilic was.
15695 Daz er zeimâl enzündet wêre
15696 Mit bœsem geluste. Daz was im swêre
15697 Und gienc dâ er vant ein gluot
15698 Und tete daz nu kein münich tuot:
15699 Er stiez sînen vinger in die koln.
15700 Des begonde er sôgetânen smerzen doln
15701 Daz aller sîn gelust verswant.
15702 Ze sînem klôster wart gesant
15703 Ein behefter mensche in kurzer frist,
15704 Daz manz beswüer, als site noch ist.
15705 Dô des der abt wart gewar,
15706 Sîne besten müniche sande er dar.
15707 Dô die begonden den vient beswern,
15708 Do begonde er sich mit worten wern
15709 Und hete sîn gespötte ûz in
15710 Und sprach: "Ir küttener, wol hin!
15711 Der fiur mit fiure geleschet hât,
15712 Der sol mich trîben von dirre stat!"
15713 Dô der abet daz vernam,
15714 Er gebôt bî der gehôrsam:
15715 Swer fiur mit fiure geleschet hête,
15716 Daz sich der meldet und vür in trête.
15717 Diz vernam der guote man,
15718 Der daz wunder het getân,
15719 Und zeigte dem abte sîne hant
15720 Und sagte im wie er hêt gebrant
15721 Sînen vinger: "Sol daz ein wunder sîn?"
15722 Sprach er, "daz ist ein kleiniu pîn!"
15723 Der abt zehant in mit im fuorte,
15724 Daz er den beheften menschen ruorte
15725 In süezer andâht mit der hant.
15726 An der die vinger wâren gebrant.
15727 Dô schrei der tiufel: "Wê daz ich dich
15728 Niht ê vertriben hân denne du mich!
15729 Mîn zunge und mîn valscher rât
15730 Trîbent mich von dirre stat!"
15731 Nâch der rede der tiufel verswant,
15732 Der mensche wart sinnic sân zehant.
15733 Ô kiusche, ô rehte einveltikeit!
15734 Wie hôchgelobte wirdikeit
15735 Iuwer name in klœstern hête,
15736 Swâ ir belibet in süezer stête!
15737 Vil manic guot klôsterman verdirbet
15738 Daz man unklœsterlich gein im wirbet,
15739 Der in sîner einvelte niht verdürbe
15740 Der gein im brüederlichen würbe.
15741 Fremde schadet unde frumt,
15742 Den bœsen si ze staten knmt.
15743 Swer ofte bî den liuten wêre,
15744 Der hœrte manigerleie mêre
15745 Und vergêze ouch ofte sîner swêre:
15746 Des herze ist ouch selten sorgen lêre.
15747 Guotiu geselleschaft bringet frumen,
15748 Von bœser siht man schaden kumen.
15749 Swer sich gesellet ze tummen liuten,
15750 Der machet im selber ein vingerdiuten:
15751 Swer aber den wîsen bî gestêt,
15752 Den êrt man mit in swâ er gêt.
15753 Nît und haz. frâz und zorn
15754 Vil manige sêle habent verlorn;
15755 Hôchfart, unkiusche und gîtikeit
15756 Tuont noch der werlde manic leit;
15757 Trazmuot von himel wart verstôzen:
15758 Dâ sol dêmuot mit irn genôzen
15759 Bî gote belîben êwiclîche,
15760 Daz merke der arme und der rîche
15761 Adâm und Êvâ wêren wîse
15762 Beliben in dem paradîse,
15763 Hête bœser rât si niht verleit,
15764 Hôchfart, frâz und gîtikeit.
15765 Künic Davîdes sun her Absalôn
15766 Vant sîns muotwillen bœsen lôn,
15767 Der hôchfertic, gîtic, unkiusche was,
15768 Alein sîn lîp ein spiegelglas
15769 Wêr allen mannen unde frouwen,
15770 Die sunder wunder wolten schouwen
15771 Daz got hête an in geleit.
15772 Über allen sînen lîp was niht sô breit
15773 Als ein linse, daz wandel hête.
15774 Swer schœnen lîp hête und rehte tête,
15775 Der stüende in lobes prîse gar.
15776 Dirre jungelinc hete sô schœn hâr,
15777 An dem ouch sôgetân wunder lac
15778 Daz manz mit golde wider wac:
15779 Swenne erz zeimâl des jârs abesneit,
15780 Ûf borten in sîden wart ez geleit:
15781 Sô zieret ez mêre und baz denne golt.
15782 Sîn vater was im von herzen holt,
15783 Dem er doch tet manic herzenleit.
15784 Diz werte unz daz er zeimâl streit
15785 Mit sînen liuten, dô beidiu her
15786 Zweinzic tûsent und dennoch mêr
15787 Liute verlurn und er behienc
15788 An einer eichen, der ast ümmevienc
15789 Sîn hâr: dô Jôab in ersach,
15790 Driu sper er durch sîn herze stach.
15791 Er wart zehouwen und begraben
15792 Dâ bî in einem vil tiefen graben,
15793 Vil steine wurden ûf in geleit.
15794 Hôchfart, unkiusche und gîtikeit
15795 Brâhten in ze dirre nôt,
15796 Daz er nam lesterlichen tôt,
15797 Den sît sîn vater veterlich
15798 Beweinte von herzen inneclich.
15799 Ane sache daz ouch niht ergienc,
15800 Daz sîn lîp an einer eichen behienc:
15801 Geschrunden ûzen und mitten weich
15802 Und gar herte innen ist diu eich:
15803 Hôchfart, unkiusche und gîtikeit
15804 Sint bî den drîn uns ûz geleit:
15805 Hôchfart bezeichent uns diu rinde,
15806 Unkiusche ist gelîch dem weichen spinde,
15807 Dem herten kern diu gîtikeit:
15808 Die drî sünde brâhten in êwic leit
15809 Absalôn den minneclîchen:
15810 Diu driu sper, diu im jêmerlichen
15811 Durch sîn herze wurden gestochen,
15812 Habent manic herzeleit gerochen
15813 Daz sînem vater von im geschach,
15814 Der manigen zaher weinte hin nâch.
15815 Daz unmenschlich missetât
15816 Vil jâmers füege und grôze unflât,
15817 Daz bewêr ich bî der frouwen,
15818 Der lîp in zwelf stücke wart gehouwen
15819 Und gesant in zwelf lant,
15820 Die got hiez rechen sân zehant.
15821 Des wurden in vil kurzen tagen
15822 Wol niunzic tûsent man erslagen,
15823 Âne wîp und âne kint,
15824 Diu niht mit zal begriffen sint;
15825 Und âne roup und âne brant,
15826 Der stete, dörfer unde lant
15827 Sô gar verdarbte daz nieman daz
15828 Vol sagen könde: swer diz wil baz
15829 Vernemen an der rihter buoche,
15830 Der sol an dem ende des buoches suoche.
15831 Hôchfart, unkiusche und müezikeit
15832 Und volliu koste brâhten in leit
15833 Fünf stete, diu eine hiez Sodomâ
15834 Und hiez diu ander Gomorrâ,
15835 Die drî lâze ich ungenant,
15836 Die wurden mit disen zwein verbrant
15837 Von peche, von swebel, dô der frume man
15838 Her Loth mit sînem gesinde entran,
15839 Des hûsfrouwe ûf dem wege aleine
15840 Bestuont und wart ze einem salzsteine.
15841 Hôchfart und ander missetât
15842 Jerusalem die heiligen stat
15843 Dicke leider habent zestôrt,
15844 Als wir an predigen hân gehôrt
15845 Und in der heiligen schrift ouch stêt.
15846 Swer ze dem heiligen grabe noch gêt,
15847 Der wirt wol inne wie manic jâr
15848 Die heiden der stete gewaltic gar
15849 Sint gewesen und dennoch hiute,
15850 Die vil billicher kristenliute
15851 Sölten haben in reiner huote,
15852 Die got dâ lôste mit sînem bluote.
15853 Rôme hât ouch nœte vil erliden
15854 Von manigerleie untugende smiden:
15855 Ir name unverre wêr bekant
15856 Denne rouben, morden unde brant,
15857 Mit den si wîlent vür ist kumen:
15858 Wer hât ir noch sô grôzen frumen?
15859 Karthâgô manic nôt erleit
15860 Von Rômer grôzer gîtikeit,
15861 Sô neget nu Rôme die kristenheit,
15862 Daz pfaffen und leien ist ofte leit.
15863 Wir haben ouch ofte wol gehôrt
15864 Wie Troye mit fiure wart zestôrt,
15865 Vor der die Kriechen, daz ist wâr,
15866 Gelegen wâren zehen jâr:
15867 Daz kam von einer êbrecherinne,
15868 Von hôchferte und unrehter minne,
15869 Des Priamus und Elenâ.
15870 Paris, Hectôr und Menelâ
15871 Sint geziuge und Achilles,
15872 Patroclus und Diomêdes,
15873 Ulixes und her Enêas
15874 (Dem Venus half daz er genas),
15875 Manic fürste, ritter unde degen,
15876 Der maniger tôt dâ was gelegen
15877 Ê denne diu stat gar würde enzündet,
15878 Als meister Dares schôn uns kündet.
15879 Der alten nôt sül wir gedagen
15880 Und süln von niuwem jâmer sagen,
15881 Daz geschehen ist bî unsern tagen:
15882 Wenne alliu diu kristenheit muoz klagen
15883 Wie frâz, unkiusche und grôz hôchfart
15884 Die stat Ackers haben bewart,
15885 An der der kristenheite trôst
15886 Lac nâch dem, der si erlôst
15887 Hât an dem kriuze mit sînem bluote:
15888 Hête man die stat in bezzerr huote
15889 Gehabt, sô wêr si baz bewart:
15890 Die hât verlorn diu hôchfart
15891 Und ir unkiusche, als hôrte ich sagen,
15892 Die uns guot bilde vor sölten tragen.
15893 Hôchfart, unkiusche und gîtikeit
15894 Zestœrent noch die kristenheit
15895 Mêr denne ander missetête,
15896 Wenne von in kument valsche rête,
15897 Von in kumt luoder unde frâz,
15898 Spil, arcwân, nît, zorn und haz
15899 Und manic ander houbthaftiu sünde,
15900 Der ich niht könde noch wölte durchgründe.

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 07.07.2004