CXXX Von der birn auf dem grase.

20347 Frî urloup bôt mir sînen stap,
20348 Dô ich der lazheit urloup gap,
20349 Und hiez mich springen swar ich wölte
20350 Und doch als ich ze rehte sölte,
20351 Und swenne ich hin und her gemêze,
20352 Daz ich der birn niht vergêze
20353 Die ûf dem grase sîn gelegen,
20354 Daz die iht belîben underwegen.
20355 Der birn ein teil viel ûf daz gras,
20356 Die lâgen wol, swie vil der was:
20357 Die birn sül wir gelîchen
20358 Beidiu armen unde rîchen,
20359 Den jungen mit den alten,
20360 Die gotes gebot behalten
20361 Und die mit ganzen triuwen
20362 Ir sünde beginnen riuwen:
20363 Si vallent ûf daz schœne gras,
20364 Dâ fröude ist immer und ie was,
20365 Daz ist in himelrîche.
20366 Nu wol her alle gelîche,
20367 Die gerne schiere komen dar!
20368 Nemt einer kurzen leitern war,
20369 Diu hât drî sprüzzel und ouch zwên
20370 Leiterboume, die müezen stên
20371 Gar vaste, si beginnent anders wenken
20372 Und irn stîger abe swenken,
20373 Der noch ist vor sünden kranc,
20374 Daz er muoz vallen âne sînen danc!
20375 Swer dise leitern stîgen sol,
20376 Der bedarf ze dem êrsten wol,
20377 Sol er vallen niht her abe,
20378 Daz er wol gebîhtet habe
20379 Und an die êrsten sprüzzel trete
20380 Mit vasten, an die andern mit gebete,
20381 Mit almuosen an die dritten,
20382 Und daz er stê dâ mitten
20383 Und mit vlîze goume
20384 Daz die leiterboume
20385 Iht von ein ander wîchen:
20386 Seht, die sül wir gelîchen
20387 Der liebe, der wir schuldic gote
20388 Sîn und ouch nâch sînem gebote
20389 Unserm ebenkristen.
20390 Swer sîn bîhte wil fristen
20391 Und sîn buoze, der entuot niht wol:
20392 Nieman diu zwei ûf schieben sol.
20393 Swer betet, vastet, almuosen gît
20394 Und die zwuo liebe hât alle zît,
20395 Der stîget ûf gein himelrîche
20396 Mit manigen tugenden ordenlîche
20397 Und mac diu genâde ouch im geschehen,
20398 Daz er die leitern beginnet sehen,
20399 Die her Jacob wîlent sach
20400 Slâfende: hœrt wie daz geschach!
20401 Dô her Jacob den segen enpfienc
20402 Sîns vater und gein Syrie gienc
20403 Und von sînes bruoder zorne lief,
20404 Des âbendes an einer stat er slief,
20405 Dar was er kumen altersein.
20406 Sîn houbet küsse was ein stein.
20407 Nu sach er in dem troume stên
20408 Vor im ein leitern und sach ûf gên
20409 Der leitern hœhe an daz himelrîch
20410 Und gotes engel wunneclîch
20411 Dâr an stigen ûf und abe
20412 Und unsern herren sich oben habe
20413 An der leitern, der vil frô
20414 Sîn herze machte und sprach alsô:
20415 "Ich wil dir geben diz ertrîch,
20416 Dîn geslehte breiten und machen rîch
20417 Als wît als disiu werlt ist,
20418 Und wil dîn hüeten swâ du bist!"
20419 Dô rihte her Jacob ûf den stein,
20420 Ûf dem er was gelegen alein.
20421 Sîn andâht was gein gote grôz.
20422 Ûf den stein er boumöl gôz
20423 Und sprach diu wort, der wirdikeit
20424 Noch üebet und êret diu kristenheit,
20425 Swâ kirwîhe ist und swâ man noch
20426 Alter wîhet. Nu merket ie doch:
20427 Swem disiu genâde sol wider varn,
20428 Der muoz sich vor gar wol bewarn
20429 Mit süezer andâht, diu gein himel
20430 Ûf stîge, und fliehe der werlde schimel.
20431 Der mensche hât lîp, sêle und guot,
20432 Mit den ez ofte missetuot:
20433 Der missetête sol ez wider streben
20434 Mit vasten, beten, almuosen geben.
20435 Daz gebete zemt uns wilden muot,
20436 Vasten dem lîbe unsanfte tuot,
20437 Almuosen pînt uns an dem guote:
20438 Sus belîbet diu sêle in guoter huote.
20439 Rouch, übel wîp, dürkel dach
20440 Füegent manic ungemach:
20441 Diz schrîbet der wise Salomôn:
20442 Sêlic ist, der sich ziuhet dâ von!
20443 Diu troufe ist bœsiu gewonheit,
20444 Der rouch ist unverstandenheit,
20445 Unser schedelich fleisch bediutet daz wîp:
20446 Disiu driu verderbent sêle und lîp.
20447 Bœse gedanke, werc und wort
20448 Besliezent allen legerhort:
20449 Reine vasten bœse gedanke leschet,
20450 Unser bœse wort gebet abweschet,
20451 Unser bœse werc almuosen swendet:
20452 Sus wirt der tiufel von uns geschendet.
20453 Semey sîner bœsen worte engalt,
20454 Do er künic Davîd ân schulde beschalt,
20455 Daz er dâr üm verlôs sîn leben:
20456 Dô künic Salomôn im het geben
20457 Zil und frist, die er brach beide,
20458 Dô wart sîn schelten im ze leide:
20459 Diz vindet man in der künige buochen,
20460 Swer ez mit vlîze dâ wil suochen.
20461 Adonias bœse gedanke hete,
20462 Dô er erwerben wolte mit bete
20463 Sîns vater zuoslâfen Abysaac,
20464 Diu durch wermunge bî im lac:
20465 Des verlôs er ouch sîn leben
20466 Daz sîn gedanke niht stuonden eben,
20467 Wenne er mit bœser kündikeit
20468 Wolte kumen an küniges wirdikeit.
20469 Joab mit werken sich verworhte,
20470 Dô er künic Davîd niht envorhte
20471 Und hôher fürsten zwêne erstach:
20472 Swaz dâ der künic an im niht rach,
20473 Daz rach hin nâch her Salomôn,
20474 Dô er in ziehen hiez unschôn
20475 Von dem alter, an dem er hienc:
20476 Sînes mordens er wirdigen lôn enpfienc,
20477 Dô Bananias in ersluoc,
20478 Der jenen zwein ouch niht vertruoc
20479 Die niulich iu sint vor genant.
20480 Si sluoc alle drî sîn eines hant
20481 Von künic Salomôns gebote.
20482 Swer sich rihten wil ze gote
20483 Und ouch von sîner lêre niht wanken,
20484 An worten, an werken und an gedanken
20485 Sol er sich zemen als verre er mac:
20486 Wenne êwige fröude und êwigen slac
20487 Mac man mit den drîn erwerben;
20488 Wê dem der gerne wil verderben!
20489 Mac iendert fiur ûf erden sîn
20490 Gar âne hitze und âne schin,
20491 Sô sint gehôrsam und dêmuot
20492 Ân gotes minne ein heiziu gluot.

CXXXI. Von beichte vn[d] vo[n] sele gerete vn[d] vo[n] den getrewen handen.

20493 Übel gedanke, werc und wort
20494 Erbent ûf uns des tiufels hort:
20495 Sô machent werc, herze und munt
20496 Die sêle gesunt, diu vor was wunt:
20497 Der munt mit bîhte und mit gebete,
20498 Daz werc mit manigerleie guotête,
20499 Daz herze mit riuwe und süezer andâht:
20500 Alsus wirt gotes dienst volbrâht.
20501 Mit siben dingen büezet man
20502 Des lîbes siuche, swer ez kan:
20503 Vasten, undöuwen unde sweiz,
20504 Latwerge, pulver kalt und heiz,
20505 Âderlâzen und getranc
20506 Machent den gesunt, der ê was kranc.
20507 Bekentnüsse, riuwe, smerze und bîhte
20508 Machent manic herze von sünden lîhte;
20509 Vasten, almuosen unde gebete
20510 Heilent die sêle, diu an ir hete
20511 Des tôdes mâl und sêre was wunt,
20512 Daz si mit genâden wirt gesunt.
20513 Driu dinc sol man niht ûf sparn:
20514 Siechen bîhte und ir bewarn,
20515 Kindelîn toufen und sêlegerête:
20516 Vil sêlic wêr er, der diz tête.
20517 Sêl pfleger sint genant sêl liute:
20518 Daz die getriuwe wêren hiute
20519 Und immer, âne zwîfel des wêr nôt,
20520 Wenne si vil lîhte ouch der tôt
20521 Nâch iren fröuden hinnen ziuhet:
20522 Wanne sîn gewalt nieman schiuhet.
20523 Ein dinc doch vil übel zimt:
20524 Ob einer eines tôten guot în nimt
20525 Und daz niht sân zehant vergiltet:
20526 Wenne des sîn selbes sêle engiltet.
20527 Getriuwer maner wêre uns nôt,
20528 Ze vorderst aber swenne der tôt
20529 An uns beginnet drucken nider
20530 Wort und sinne, kraft und gelider:
20531 Swer denne wol mante, des wêre zît,
20532 Sô lîp und sêle in zwîfel lît.
20533 Swenne wir vernemen daz einer stirbet
20534 Oder an êren, an guote verdirbet,
20535 So gedenke wir sân: der was veige;
20536 Swenne aber daz ungelücke uns neige
20537 Oder swenne der tôt uns zücke daz leben:
20538 Dar an gedenke wir selten eben.
20539 Sô maniger hât eins andern guot
20540 Lenger denne sîner sêle ist guot
20541 Und sîn friunde daz heizet wider
20542 Geben, swenne er lît dernider:
20543 Die tuont vil lîhte, als ob si sölten
20544 Sprechen heimlich swâ si wölten:
20545 "Hâstu gesprungen, lîch uns den stap,
20546 Swenne wir dich bringen in dîn grap:
20547 Wir tuon dir rehte, als du hâst dem
20548 Getân, des guot du vor in nêm"!
20549 Alsô bringet ein sal einen andern sal
20550 Und bringet ein val einen andern val,
20551 Biz daz si vallent über al
20552 In des swarzen rihters stal.
20553 Manic leben wandelt sînen orden:
20554 Sêl liute sint sal liute worden,
20555 Als manige liute, die der sal
20556 Der fürsten ziuhet, der triuwe ist smal.
20557 Ir sült ouch wizzen daz sal liute
20558 Etswâ wol sint genant zal liute,
20559 Wenne si kurz, lanc, breit und smal
20560 Frîlich teilent bî der zal.
20561 Sô sî des tôten guot berechent
20562 Und alsus zuo einander sprechent:
20563 "Lâ daz mir und habe daz dir",
20564 Sô sprichet diu sêle: "Wer hilfet mir
20565 Ûz den nœten, in den ich bin?
20566 Ich hân verlust und ir gewin!
20567 Doch sült ir hüeten, daz iuwer untriuwe
20568 Iuch iht bringe in êwige riuwe!
20569 Ich bevalch iu lîp, sêle und guot:
20570 Nu seht, daz ir gein mir sô tuot,
20571 Daz iuwer sêle iht pfandes stê
20572 Vür mîn sêle, der nu ist wê!
20573 Wenne swer nâch tôde triuwe hât,
20574 Diu triuwe vür alle triuwe gât.
20575 Waz mac mir der vor dem rihtêr
20576 Gefrumen, dem als nôt genâden wêr
20577 Als mir, kumt er vür daz gerihte?
20578 Ein ieglich mensche sîn dinc verrihte,
20579 Die wîle ez müge und tüge ûf erden;
20580 Ûf wîden mac niht vîgen werden.
20581 Vil lieben, erbarmet iuch über mich!
20582 Gedenket der triuwen an mir, daz ich
20583 Ûz aller der werlde iuch hân erwelt
20584 Und helfet mir, daz ich ungequelt
20585 Vürbaz belîbe; und swâ des mînen
20586 Zerinne, dâ helfe mir mit dem sînen
20587 Iuwer ieglicher, wenne ez kumt im wider,
20588 Sô sîn lîp tôt lît ouch dernider!
20589 Manic guot vil swinde wirt erspart,
20590 Daz ofte doch vert ein ander vart
20591 Denne der mensche im hete gedâht,
20592 Der lange ez hât zesamen brâht.
20593 Hêt ich gewest daz ich nu weiz,
20594 Daz mir sô kalt und ouch sô heiz
20595 Sölte lange sîn âne underlâz,
20596 Ich hête mich vür gesehen baz
20597 Und hête mîn guot gemacht sô smal,
20598 Daz kurz nu wêre sal und zal:
20599 Leider daz hân ich versûmet!
20600 Nu seht, swenne ir der werlde gerûmet,
20601 Daz unser herre got mîn vürspreche
20602 Gein iuch iht werde und mich gereche!
20603 Sêlic wêr der, der sîn sêlgerête
20604 Mit gesundem lîbe und muote hete
20605 Vor verrihtet ê denne er stürbe:
20606 Vil grœzern lôn er des erwürbe
20607 Denne ob er beitet, biz er mit leide
20608 Von friunden und von guote muoz scheide.
20609 Wê im, der daz wort erwirbet
20610 Daz man sprichet, swenne er stirbet:
20611 "Er liez grôz guot, swem daz ouch würde!"
20612 Ô sünden hûfe, ô helle bürde,
20613 Swer grôz guot mit sünden hordet
20614 Und mit sîner sêle der sêle ouch mordet,
20615 Die mit sînem guote ir sêle verliesent
20616 Und grôze untriuwe vür triuwe kiesent!
20617 Swer nâch tôde triuwe hât,
20618 Diu triuwe vür alle triuwe gât.
20619 Sölte ich nu sagen daz wêr ze lenge,
20620 Swaz genâden und sêlde bîhte brenge:
20621 Doch wizzet, daz scham und hoffenunge
20622 Vorhte und ouch verzwîfelunge
20623 Maniger liute bîhte ûf sparnt,
20624 Daz ir sêle niht wol gevarnt.
20625 Swer in der bîhte sich selher schendet,
20626 Sîn sünde er swendet, den vînt er blendet:
20627 Swer aber sich in der bîhte beschœnet,
20628 Den tiufel er krœnet, sich selher er hœnet.
20629 Diu bîhte ist niht âne wentelîn,
20630 Diu oben ein kurz mentelîn
20631 Über die sünde ziuhet
20632 Und den bîhter schiuhet,
20633 Der die sünde kan durch gründen
20634 Und die rehten wârheit künden.
20635 Rehtiu bîhte hât sibenzehen stücke,
20636 Diu ich durch kurzen under zücke:
20637 Swer diu ze rehte ûz legen wölte,
20638 Wol man im des danken sölte:
20639 Daz zimt pfaffen und münchen wol,
20640 Ein leie niht tiefe predigen sol.
20641 Waz vasten genâde bringe und gebete,
20642 Daz wizzen die wol, die got liep hete,
20643 Die grôziu wunder ûf erden tâten,
20644 Swenne si got mit flîze bâten:
20645 Moyses, Daniêl und Hêlias,
20646 Judith, Hester und Ezechias
20647 Und manic man ûz der alten ê.
20648 Wem sölte wir nu des volgen ê
20649 Denne unserm herren, der beten hiez
20650 Sîn jungern und ouch in des liez
20651 Ûf ertrîch sîner lêre ein teil,
20652 Diu sêlde noch bringet unde heil?
20653 Ein künic hiez Senacherip,
20654 Des triuwe was dürkel als ein sip
20655 (Der ist noch vil, dâ vür ichz hân).
20656 Er was ein übel heidenisch man
20657 Und was den juden allen gram
20658 Und wolte den künic Ezechiam
20659 Und alle die sînen verderbet habe.
20660 Dô zôch der reine künic her abe
20661 Durch rehte dêmuot sîn schœne gewant
20662 Und leite einen sac an sich zehant
20663 Und gienc inz tempel und klagte gote,
20664 Daz Raphates sînes vîndes bote
20665 Im und den sînen het widersagt
20666 Dô er sîn angest hete geklagt
20667 In süezer andâht mit gebete,
20668 Und niht zwîfels dâr an hete
20669 Ern würde gerochen schiere dar nâch.
20670 Nu hœrt waz in der naht geschach:
20671 Fünf und ahtzic tûsent man
20672 Und hundert tûsent wurden sân
20673 Der heiden von gotes engeln erslagen:
20674 Die hôrte die juden nieman klagen.
20675 Swer Isaiam ie gelas,
20676 Der mac wol wizzen, wâ daz was:
20677 Swer ez noch gerne wîlle suoche,
20678 Der vindet ez mitten in sînem buoche,
20679 Und wie der künic Senacherip
20680 Von sînen sünen verlôs den lîp.
20681 Wazzer und fiur sint ungehiur
20682 An überkreften: sus ist ir stiur
20683 Aller der werlde nütze gar,
20684 Swer ir ze rehte nimet war:
20685 Seht als ist gotes mînnen fiur
20686 Und riuwen wazzer ungehiur
20687 Dem, der tumplich mit in wirbet,
20688 Wenne er von überkraft verdirbet.
20689 Mâze ist ze allen dingen guot:
20690 Wol im der gotes willen tuot!
20691 Nu merket doch alle, wie ein lop
20692 Der zungen hât geben sant Jacob:
20693 "Ein kleine zunge grôz dinc erhœhet,
20694 Ein kleinez ruoder ein grôz schif flœhet
20695 Von einem lande in daz ander lant,
20696 Als uns allen ist bekant."
20697 Mit der zungen lobe wir got
20698 Und fluochen den liuten biz in den tôt,
20699 Die doch nâch gote gebildet sint:
20700 Als gar sint unser sinne blint.
20701 Schelten und loben gênt von grunde
20702 Des herzen ûz ûf ze dem munde.
20703 Got hiez dâr üm uns alle beten,
20704 Ob wir ze geben niht enhêten
20705 Und ouch ze vasten niht entîhten
20706 Daz wir doch mit gebete mîhten,
20707 Im liep und heimlich werden,
20708 Die wîle wir leben ûf erden.
20709 Ein kint sîn leit mit weinen kündet,
20710 Swenne ez hunger oder siuche enzündet:
20711 Seht als durchgründet arme liute
20712 Kumer und siuche mit weinen hiute
20713 Und rüefent unsern herren an
20714 Vil mêr denne si vor hânt getân:
20715 Wenne grôz ungelücke diu ougen ûf zerret,
20716 Diu grôz gelücke zuo hât gesperret.
20717 Ninivê diu vil grôze stat
20718 Die lenge und wite drî tage hât,
20719 Durch die gienc schrîen her Jônas,
20720 Der unsers herren bote was,
20721 Und kündete jâmer grôz mit klage:
20722 Er sprach: "Noch sint niur vierzic tage
20723 Und Ninivê sol under gên!"
20724 Der stete künic sach man ûf stên
20725 Und leite einen sac an sînen lîp,
20726 In jâmer vastet man und wîp,
20727 Kint und vihe mit im drî tage:
20728 Do erhôrte unser herre irs jâmers klage
20729 Und liez sînen grôzen zorn:
20730 Denne vasten und beten, si wêren verlorn.
20731 Nu merket wol, waz gebete tuo
20732 Vor gote wunders spât und fruo:
20733 Gebete kan den himel ûf sliezen,
20734 Gebete kan ouch regen giezen
20735 Ûz den wolken und ûz den ougen,
20736 Gebete wont bî gotes tougen,
20737 Gebete kan übel lewen zemen,
20738 Gebete kan unser vînde lemen,
20739 Gebete kan uns lengen diz leben,
20740 Gebete kan ouch sünde vergeben,
20741 Gebete sant Pêters keten zebrach,
20742 Von gebete daz mer man trucken sach,
20743 Gebete gelüste fiur erleschet,
20744 Gebete die sêle von sünden weschet,
20745 Gebete aleine mit gote kôset,
20746 Gebete den tiufel gar verdôset.
20747 Daniêl, Pêter und Hêlias,
20748 Aaron und Ezechias,
20749 Jôsef und her Moyses,
20750 Josuê und her Manasses,
20751 Sant Mertîn und sant Scolasticâ
20752 Und manic heilige anderswâ
20753 Sint der vordern rede geziuge
20754 In der schrift, daz ich niht liuge:
20755 Gebete alein ist unser bote
20756 In liebe, in leide hin ze gote.
20757 Diu vaste hât vier ümmekleit:
20758 Swenne einer durch gerehtikeit
20759 Vastet und einer durch glîchsenheit,
20760 Sô vastet einer durch gîtikeit,
20761 Sô sperret einer ûf sînen munt
20762 Durch erzenîe daz er werde gesunt.
20763 Got lônet des êrsten aleine,
20764 Diu zwei sint halp unreine:
20765 Daz vierde mac underscheiden sîn,
20766 Ez büezet aber niur des lîbes pîn.
20767 Swer vasten wil, der merke vil eben
20768 Daz er sol almuosen geben,
20769 Wil er sîn vasten gar durch liuhten,
20770 Und sol mit ougen regen fiuhten
20771 Sîn flinsic herze und mit gebete:
20772 Vil sêlic wêr er, der diz tête.
20773 Ein stein betwungen gibt daz fiur,
20774 Daz âne getwanc wêr immer tiur:
20775 Des menschen fleisch reht tuot alsam:
20776 Swer ez twinget, der machet ez zam
20777 Und sleht ûz im der minnen fiur
20778 Gein gote, daz sus wêr immer tiur.
20779 Des schrîbet sant Jerônimus
20780 Von der riuwe vil schône alsus:
20781 "Der mensche rehte riuwe hât,
20782 Der alle sîne missetât
20783 Von herzen grunde beweinet
20784 Und sich des vereinet,
20785 Daz er sîn nimmer wîlle getuo:"
20786 Bîhte und buoze gehœret dar zuo.
20787 Des obersten priesters miltiu güete
20788 Müeze aller priester herze behüete,
20789 Daz si der vînt dâ iht enzünde
20790 Dâ si vernement der sünder sünde
20791 Und ouch maniger sünderinne,
20792 Die leider hânt vil tumme sinne.
20793 Ze grôz heimlîche ist ofte niht guot,
20794 Diu manigen liuten schaden tuot
20795 An lîbe, an sêle, an êren, an guote,
20796 Si stê denne in gar vestem muote:
20797 Des hât man geziuge vil,
20798 Swer ez in den buochen suochen wil.
20799 Sint diu wîp fleisch und gebein,
20800 Sô sint die man weder holz noch stein.
20801 Swâ pfaffen und geistliche liute
20802 Sint fleischlich als wir sünder hiute,
20803 Dâ stênt bî blatten und bî kappen
20804 Wol mit irn slappen reiseknappen.
20805 Heimlîche ist ein betelmûs,
20806 Heimlîche unêrt wirt und hûs,
20807 Heimlîche lestert sippe teil,
20808 Heimlîche briuwet der sêle unheil;
20809 Bœsiu heimlîche schiuhet keine untugent,
20810 Si hât geunêrt manic edel jugent;
20811 Bœsiu heimlîche tuot unbildes vil,
20812 Des ich hie nimmer schrîben wil;
20813 Got gebe, daz bîhtens heimlîche
20814 Si rein bî allen priester nu gelîche.
20815 Manic schemic mensche sîn schulde hilt,
20816 Biz im der tôt sîn leben stilt:
20817 Manic sünder tuot alsam,
20818 Der grôze sünde vor grôzer scham
20819 Sînem bîhter niht sagen wil:
20820 Diu scham bringet dar nâch schaden vil.
20821 Als hête künic Karl hie vor getân
20822 Denne sant Egidi der heilige man,
20823 Der unsern herren vür in bat
20824 Daz im ein grôziu missetât,
20825 Die er vor scham niht bîhten wolte
20826 Mit riuwen als er ze rehte solte,
20827 Wart an einen brief geschriben:
20828 Des ist sîn sêle bî gote beliben,
20829 Diu got nimmer hête gesehen,
20830 Hête er der sünde niht verjehen.
20831 Swer sant Egidien leben list,
20832 Der vindet daz sîner sêle guot ist.
20833 Der bîhte kraft lît in dem munde.
20834 Diu riuwe lît in des herzen grunde,
20835 Diu buoze lît ouch ûzen und innen.
20836 Swer nu dem vînde wîlle entrinnen
20837 Und êwige fröude bî gote gewinnen,
20838 Der sol mit allen sînen sinnen
20839 Riuwe, bîhte und buoze pflegen.
20840 Swer lange in unflâte wêre gelegen
20841 Und sich niht waschen wolte,
20842 Nieman den minnen sîlte,
20843 Wenne er gerne unrein was.
20844 Des sprach der heilige Isaias:
20845 "Waschet iuch und sît reine,
20846 Lât bœse gedanke aleine
20847 Und hüetet vor sünden iuch baz denne ê,
20848 Sô werdet ir wizer denne ein snê:
20849 Wenne nieman ist unreine
20850 Denne von sünden aleine."
20851 Reht geloube und süeze andâht
20852 Habent vil manige sêle brâht
20853 Ze der êwigen raste,
20854 Den riuwe, bîhte und vaste,
20855 Reine almuosen unde beten
20856 Hülfen ir unkrût wol ûz jeten
20857 Und schœne si machen und gehiur:
20858 Wenne als daz wazzer leschet fiur,
20859 Alsô leschet almuosen unser sünde.
20860 Nu hœret alle, waz ich iu künde:
20861 Der barmherzige Tobias
20862 Sagte sînem sun, der im liep was:
20863 "Sun, lâz alle armen dich erbarmen
20864 Und wende dîn antlütze von keinem armen:
20865 Hâstu vil, sô gip frœlîchen
20866 Dîn almuosen und ouch volliclîchen,
20867 Hâstu wênic, daz selbe teile
20868 Durch got den armen: daz kumt ze heile
20869 Dir an der sêle und ouch an lîbe."
20870 Nu merket ein anderz, daz ich schrîbe:
20871 Swer gein armen liuten ist karc,
20872 Gibt der durch hôchfart tûsent marc,
20873 Er hât deste mêre verlorn.
20874 Swer wolle senften gotes zorn
20875 Und von sünden werden blôz,
20876 Der berge sîn almuosen in der schôz
20877 Des armen durch got tougenlich
20878 In rehter dêmuot liuterlich.
20879 Ein vogel an sînem munde spart,
20880 Dâ mit er sîn junge bewart:
20881 Alsô sül wir sparn an unserm munde
20882 Und helfen der sêle ze aller stunde.
20883 Des menschen vinger sint gespalten,
20884 Daz er sol geben und niht behalten
20885 Wider den, der im hât geben
20886 Guot und êre, friunde und leben.
20887 Swes herze ist guotes willen vol,
20888 Des hant ist gâbe selten hol.
20889 Got ist manic dinc genême,
20890 Daz uns wêre vil widerzême:
20891 Wenne die brosem sint im wert
20892 Der ob dem tische nieman gert:
20893 Er lêt üm daz vil arme liute
20894 Leben, daz die rîchen hiute
20895 An den verdienen daz himelrîch
20896 Und bî in belîben êwiclîch
20897 In fröuden, die gedulticlîch
20898 Ir armuot tragent williclîch.
20899 Der bât aleine rehte armuot,
20900 Dem weder friunde, êre noch guot
20901 Gebent trôst, die wîle er lebet,
20902 Denne daz sîn sêle gein himel strebet.
20903 Sehs werc der barmherzikeit
20904 Daz rehte almuosen in im treit:
20905 Ez sol den spîsen, der hungeric ist,
20906 Den durstigen trenken ze aller frist,
20907 Herbergen den armen, den nackenden kleide,
20908 Siechen und gevangen trœsten in leide:
20909 Disiu sehs werc sicherlîche
20910 Bringent manige sêle ze himelrîche.
20911 Dâ füeget barmherzikeit,
20912 Daz die ahte sêlikeit,
20913 Die got sînen jüngern hât vür geleit,
20914 Bestênt in êwiger stêtikeit:
20915 Er sprach: "Ir sült sîn ze aller frist
20916 Barmherzic als iuwer vater ist!"
20917 Wol im dem got die genâde gît!
20918 Ouch sprichet der heilige künic Davîd:
20919 "Gotes barmherzikeit
20920 Ist vol disiu werlt breit,
20921 Und wêre des niht, wer mîhte genesen?
20922 Des sül ouch wir barmherzic wesen!"
20923 Almuosen, vasten und gebete
20924 Sint gote genême in aller wête
20925 Und ist daz herze aleine
20926 In slehter einvelte reine:
20927 Wenne swer ein reinez herze hât,
20928 Dem schadet keiner slahte wât.
20929 Alle kappen sint enwiht,
20930 Wont gotes minne dâr inne niht:
20931 Dâ von sprach der sêlige man,
20932 Des namen ich ofte genennet hân:
20933 "Fünde ich veile solhe wat,
20934 In der der sêle würde rât,
20935 Der müeste ein ellen gar tiure sîn
20936 Ir müeste ein âschrôt wesen mîn."
20937 Swelch mensche ein reinez ümmekleit
20938 Der siben tugende an im treit,
20939 Der vindet mitten und oben drinne
20940 Daz fiur der wâren gotes minne.
20941 Von disen tugenden ist vil geschriben
20942 Von den, die si von in niht triben,
20943 In der herzen si bekliben
20944 In gote wâren alle siben.
20945 Hêt ich nu sô tiefe sinne,
20946 Daz ich die tugent und ouch die minne
20947 Mîhte getihten als ich wîlte
20948 Und als ich ze rehte sîlte,
20949 Sô wêr ich wîser denne mîn genanne
20950 Meister Hûc, des herzen wanne
20951 Sô gar durchswungen hât diu minne
20952 Mit süezen worten, ûzen und inne,
20953 Daz alle die meister im müezen entwîchen,
20954 Die nu lebent in allen rîchen:
20955 Wenne meister Hûc von Sant Victor
20956 Füert gotes minne sô hôhe enbor
20957 Mit lobe und rennet sô verre vor,
20958 Daz wênic ieman ûf sîn spor
20959 Mit swacher künste kumen getar:
20960 Des kum ouch ich vil selten dar:
20961 Ich stên vil verre und nim ir war
20962 Als dâ der morgensterne klâr
20963 Schînet durch einen dicken nebel,
20964 Durch vinster wolken ûf mînen gebel:
20965 Wenne mîner sünden überlast
20966 Lêt mich niht sehen der minnen glast.
20967 Wizzet swelch tier niht lungen hât,
20968 Daz ist âne stimme an aller stat:
20969 Swelch mensche niht gotes minne hât,
20970 Daz ist ein stumme wâ ez gât:
20971 Aleine sîn munt si worte vol,
20972 Doch ist sîn herze gein gote hol,
20973 Als ich wol bewêren kan:
20974 Wenne ez sprach ein sêlic man:
20975 "Swelch kristen kristes niht bekennet,
20976 Unbillich er sich kristen nennet."
20977 Ein zamer vogel oder ein tier
20978 Vernimt des menschen wort vil schier,
20979 Mit den ez vor ist zuo gewent:
20980 Daz denne der mensche sich niht sent
20981 Nâch sînes obersten vaters namen,
20982 Des mac er sich immer schamen.
20983 Uns schrîbet meister Ovidius
20984 In sînem Minne buoche alsus:
20985 "Ich enweiz von welher süezen triuwe
20986 Des menschen vaterlant ist niuwe
20987 In sînem herzen, swâ ez ist
20988 Ze kurzer oder ze langer frist,
20989 Daz ez sîn vergizzet niht,
20990 Swie wê oder swie wol im geschiht":
20991 Daz wir denne unser vaterlant,
20992 Daz uns noch leider ist unbekant,
20993 Mit flîze niht suochen alle tage,
20994 Des wirt vil grôz denne unser klage,
20995 Ob wir mit leide müezen scheiden
20996 Von disen vaterlanden beiden.
20997 Dâ von sprach sant Augustîn
20998 Ein lobelich wort, daz nemet în:
20999 "Ô werlt, ô unreiniu werlt,
21000 Mit manigem valschen lîbe geberlt!
21001 Sît du fliehende mich so vaste
21002 Habest, wâ fünde ich denne raste?
21003 Hête dîn wesen stêtikeit!
21004 Dîn glanz sô valsche triuwe treit!"
21005 Von schœne, von krefte und von guote,
21006 Von friunden und ouch von wîsem muote
21007 Hât manic mensche sich überhaben,
21008 Daz sît mit jâmer wart begraben.
21009 Nu hœrt waz uns an einer stat
21010 Sant Augustin geschriben hât:
21011 "Bistu sô wîse als Salomôn
21012 Und ouch sô starc als her Sampsôn,
21013 Sô gar schœne als Absolôn
21014 Und dar zuo küene als Gêdeôn,
21015 Geringe ze loufen unde snel
21016 Als der snelle man Asahel,
21017 Gewaltic als Octâviân,
21018 Rîch als Krêsus der rîche man,
21019 Lanclebic als Matûsalam
21020 Und Ênoch, den got selber nam,
21021 Und ouch künic Alexander gelîch,
21022 Unüberwunden und êren rîch:
21023 Alliu dîn glôrie ist enwiht,
21024 Hâstu der wâren minne niht."
21025 Wizzet daz niur vierleie liute
21026 Ze dem himel kumen hiute:
21027 Eine daz himelrîche stelent
21028 Die ir tugent ûf erden helent;
21029 Eine die nement ez mit gewalt,
21030 Der marter hie was manicvalt;
21031 Eine die werdent dar getriben,
21032 Die siech oder arm sint hie beliben,
21033 Und die dar nâch gote danken
21034 Sô si hin und her gewanken,
21035 Eine die habent ez gekouft,
21036 Die williclich sich habent bestrouft
21037 Grôzes guotes, friunde und êren
21038 Und nâch volgten Cristes lêren.
21039 Wenne drîerleie marterêr
21040 Hât unser herre: swer gerne wêr
21041 Milte und niht ze geben hât;
21042 Und swer hât ûzen schœne wât
21043 Und innen treit ein herîn hemde,
21044 Dem guot lîpnar ist ouch fremde
21045 Bî grôzem vollen durch sîn tugent;
21046 Und swer kiusche ist in sîner jugent:
21047 Sô sint des tiufels marterêr,
21048 Der er vil ungern ouch enbêr,
21049 Hôchfertiger und gîtigêr
21050 Und in dem alter unkiuschêr.
21051 Swer merket daz ein pfluoges schar
21052 Als lûter silber wirt gevar,
21053 Swenne ez in grôzer arbeit ist,
21054 Und ertvar wirt als ander mist
21055 Von roste, swenne ez müezic lît:
21056 Der sol bedenken alle zît
21057 Daz er sîn leben alsô slîze
21058 In gotes dienste, daz er glîze
21059 Und niht von sünden rostic sî,
21060 Die müezigen liuten wonent bî.
21061 Man schrîet in vesten und in bürgen,
21062 Daz die geste die wirte iht würgen:
21063 "Wartâ zuo dir! wartâ zuo dir!"
21064 Den alten rüefe ich allen zuo mir:
21065 "Wartâ zuo dir, alter man!"
21066 Die jungen triuget ofte ir wân.
21067 Ich hân gemerket und ist ouch wâr:
21068 Swenne ein mensche vierzic jâr
21069 Gelebet, daz ez sich denne senket:
21070 Swenne ez hin und her gedenket
21071 Wie sanfte in sîner jugent im wêre,
21072 Sô wirt sîn gemüete im ofte swêre,
21073 Swenne er versinnen sich beginnet
21074 Und der jugent ein teil entrinnet.
21075 Swer weder die werlt fürhtet noch got,
21076 Weder den tiufel noch den tôt,
21077 Dem muoz ân zwîfel hie sanfte sîn:
21078 Diz tuont kleiniu kindelîn
21079 Und alte tôren, dâ vür ichz hân.
21080 Dâ von sprach ein wîser man:
21081 "Trahtet ein rîch man üm guot
21082 Und hât ein armer tratzen muot
21083 Und hât ein alt man tumme site:
21084 Dâ wont lützel sêlden mite."
21085 Wîlent wâren kint von siben jâren,
21086 Diu man gar kintlich sach gebâren:
21087 Sô sint nu kint von sibenzic jâren
21088 Mit tiefen runzeln, mit grâwen hâren,
21089 Diu noch ir affenzegel tragent
21090 Veile und niht anders klagent,
21091 Denne daz si nimmer gesünden mügen
21092 Und der werlde nimmer tügen.
21093 Von herzen grunde mich daz beswêrt,
21094 Daz der tôt uns alle ervêrt
21095 Und als ein diep kumt in geslungen
21096 Ze dem alten und ze dem jungen,
21097 Ze dem rîchen und ze dem armen.
21098 Wen sîlte von herzen niht erbarmen,
21099 Daz der tôt uns zücket von hinnen,
21100 " wir versinnen uns beginnen
21101 Waz êwigiu pîn oder fröude sî?
21102 Got herre, mache unser sêle frî,
21103 Swenne si scheiden von disen lîben,
21104 Daz si bî dir an ende belîben!
21105 Swer an sîne sünde niht gedenket
21106 Und doch sîn herze in trûren senket,
21107 Der hât hie jâmer und ouch dort
21108 Und gewinnet êwiger unsêlden hort.
21109 Truren tuot nâch fröuden wê,
21110 Nâch meien touwe kalter snê.
21111 Swer sich sent, der fliehe einœte,
21112 Daz er vor leide sich selber iht tœte:
21113 Einœte beide guot und übel lêrt,
21114 Einœte hât manige magt entêrt,
21115 Einœte betrüebet frîen muot,
21116 Einœte ist heiligen liuten guot,
21117 Einœte brennet, roubet, stilt,
21118 Einœte beide guot und übel hilt.
21119 Wol im, der selher sich wol bekennet,
21120 Und swâ man gotes namen nennet,
21121 Daz des süeze sîn herze tunget
21122 Und lîp und sêle in gote junget!
21123 Swer aber sich sent nâch tummer jugent
21124 Und in sînem alter hazzet tugent,
21125 Der dunket mich ein tummer man
21126 Als verre ich mich versinnen kan.
21127 Kein wîser man der fröuden gert,
21128 Diu valsch ist und unlange wert.
21129 Swer hête gelebt gein fünfzic jâren,
21130 Der sîlte sô reden und sô gebâren
21131 Daz er wêre ein frumer man;
21132 Und ob er tumplich hête getân
21133 Ofte vil lîhte in sîner jugent,
21134 Des sîlte in nu sînes alters tugent
21135 In gotes liebe sô gar entwenen,
21136 Daz er sich niht mêr dîrfte senen
21137 Nâch frouwen liebe, nâch spil, nâch tanze
21138 Und nâch der werlde valschem glanze.
21139 Swer aber drîzic jâr ist ein affe,
21140 Rîch oder arm, leie oder pfaffe,
21141 Der ist denne ein zîtic narre:
21142 Daz erbe oder eigen, pfrüende oder pfarre
21143 In wîse machent, daz siht man selten:
21144 Swer drabens gewont, den müet zelten.
21145 Wizzet daz bœse gewonheit
21146 Aller sünden banier treit.
21147 Der heilige prophête Zacharias
21148 Sprichet von den selben, als ich las:
21149 Si wendeten ir ahseln und giengen hin,
21150 Si verschuben ir ôren daz kein guot sin
21151 Durch diu gienge, ir herze ouch was
21152 Noch herter denne ein adamas.
21153 Des sprichet der tugenthafte man,
21154 Des sprüche ich vil gerüeret hân:
21155 "Altes mannes minne hât
21156 Drî riuwe, swie ez im ergât:
21157 In riuwet daz er koufen muoz,
21158 In riuwet wîbes unwerder gruoz,
21159 In riuwet swenne er sich verstât
21160 Daz er die sêle versündet hât.
21161 Durch sünde, schade und schande lât
21162 Manic mensche grôze missetât:
21163 Und wêr der drîer vorhte niht,
21164 So geschêhe manic grôz ungeschiht:
21165 Wenne unrehter minne
21166 Und unrehter gewinne
21167 Und untriuwen ist sô vil,
21168 Daz sich ir nieman schemen wil."
21169 Nu sül wir aber vürbaz rennen
21170 Und unsern herren baz bekennen.

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 12.11.2004