CXXXV. Ein rede behalten den iu[n]gen vn[d] den alten.

21171 Künic Salomôn sîne boten sande
21172 Mit schiffen ze einem fremden lande
21173 Nâch pfâwen, helfenheine und affen:
21174 Sîlte ich daz leien unde pfaffen
21175 Wol ûz legen, daz würde ze lanc:
21176 Guot wille hât ouch vor gote danc.
21177 Frâgens wirt man ofte wîse:
21178 Des menschen sin ich als wol prîse
21179 Der wîslîchen frâgen kan,
21180 Als der wîslîchen antwürtet sân.
21181 Swer künste, guotes oder êren ûf erden
21182 Sich überhebet, wil der niht werden
21183 Ein vihe als Nabuchodonosor,
21184 Der sol unsern herren biten vor,
21185 Daz werltlich êre und bœse gewinne
21186 Im iht verkêren sîne sinne:
21187 Wenne wir sehen unde hœren
21188 Manige liute sich selber tœren,
21189 Die guotes und êren sich dunkent wert
21190 Und hiure sint tummer denne vert.
21191 Waz süln die friunde, daz guot, diu kunst,
21192 Bî den ich belîbe âne gotes gunst?
21193 Waz sol daz lop, diu schœne, diu êre,
21194 Mit den ich mîne sünde gemêre?
21195 Swer unserm herren dienen wil,
21196 Der sol bekümern sich niht vil
21197 Mit werltlichen dingen ûf erden:
21198 Sô mac er deste ê bezzer werden.
21199 Pech wird schiere geslagen an,
21200 Ez kumt aber niht sô schiere hin dan.
21201 Swer williclich sich sünden nœtet,
21202 Sîn leben er kürzet, sîn sêle er tœtet.
21203 Manic dinc ist vor hie gerüert,
21204 Daz aber wirt her în gefüert,
21205 Swâ man sîn bedürfen muoz.
21206 Wem wart ie grôzes hungers buoz
21207 Von zwein bizzen oder von drîn?
21208 Ziuhet man die gîtikeit ofte her în
21209 Mit irem gesinde, wem ist daz swêre
21210 Denne dem daz herze ist tugende lêre?
21211 Daz ist aber der gîtigêr,
21212 Der allen engeln ist unmêr.
21213 Himel und erde sol wâfen schrîen
21214 Mit gotes muoter sant Marîen,
21215 Mit allen heiligen in himelrîche,
21216 Daz kristen liute sô jêmerlîche
21217 Wil verdamnen gîtikeit
21218 Und ir gespil ver glîchsenheit!
21219 Sperwer, hebiche mit den pfawen
21220 Hât diu gîtikeit under ir klâwen
21221 Sô gar gezogen und ouch die sparn,
21222 Daz meide und knehte lernent sparn
21223 Und schier an hebent in der jugent
21224 Uud gar ûz lebent ân alle tugent.
21225 Swelch pfaffe daz rehte wîlte bedenken,
21226 Daz schâf und rinder mit wehsel benken
21227 Unser herre hiez von dem tempel sundern
21228 Und tûben, den mac des nu wundern,
21229 Daz simonîe und glîchsenheit
21230 Und ouch diu grimme gîtikeit,
21231 Die bî den vieren bezeichent sint,
21232 Sô gar die werlt nu machent blint.
21233 Ich horte ein rede von einem man,
21234 Der ich gedâht sît ofte hân,
21235 Der sprach, er wîlte daz er genuoc hête
21236 Und daz kein leit im nieman tête
21237 Die wîle er lebte, und daz im gram
21238 Wêre alliu diu werlt: nu merket wie lam
21239 Sîn herze wêre, der des begert,
21240 Daz er niht weste wie lange ez wert.
21241 Die rede bewêrte er mit einem eide
21242 Und sprach, er wîlte alsô verscheide
21243 Daz er genuoc hête âne gunst, ân êre:
21244 Waz sol ich iu schrîben mêre?
21245 Dirre verzwîfelte werlt affe
21246 Was leider ein junger, gîtiger pfaffe.
21247 Ein tummer mensche ist tummer vil
21248 Denne kein tier, der ez merken wil.
21249 Mîhte man kunst mit tugenden geerben,
21250 Manic kint sînen vater mîhte verderben,
21251 Wenne ofte gar nâhe gesippez bluot
21252 Vergozzen wirt üm irdisch guot.
21253 Zuht, triuwe, schimpf, guot und kunst
21254 Vil selten nu der liute gunst
21255 Erwerbent, die nâch guote strebent
21256 Und in hertem muote lebent.
21257 Wol hât uns bescheiden des
21258 Der wîse man Empedocles,
21259 Der wunders vil geschriben hât,
21260 Und sprichet alsô an einer stat.
21261 "Swer werltliches guotes lützel ahtet
21262 Und nâch êwigen sêlden trahtet
21263 Und hât wol einen erliuhten muot,
21264 Diu driu dinc sint besunder guot:
21265 Vor dem êrsten ist niht êrlîcher,
21266 Vor dem andern ist niht nüzlîcher,
21267 Niht volbrengelîcher vor dem dritten
21268 Daz disiu zwei besliuzet mitten."
21269 Âne zwîfel, ez sint vil armer liute,
21270 Die sich irs schatzes trœstent hiute
21271 Mêre denne unsers herren milte,
21272 Den gebens gein uns nie bevilte.
21273 Swer bî lôsem gewinne ist frô,
21274 Der tuot als er sül sprechen alsô:
21275 "Wir wîllen ûf erden immer leben:
21276 Und wil unser herre uns nimmer geben.
21277 Dennoch wîlle wir haben guot!
21278 Wer gesach ie tiufel oder helle gluot?"
21279 Wizzet ez sint vil wîse liute,
21280 Die der hiute schônent hiute
21281 Und sich selber niht verderbent
21282 Und ir guot irn friunden erbent.
21283 Si sîn leien oder pfaffen!
21284 Die zwelf boten wâren affen,
21285 Die sich liezen slahen, hâhen
21286 Durch heimlich guot, des si niht sâhen!
21287 Bereitschaft ist vor allen dingen:
21288 Diu kan vil manic dinc zuo bringen,
21289 Daz unser herre durch lange bete
21290 Dennoch vil lîhte ungerne tête.
21291 Nu zieren helde, gehabt iuch wol!
21292 An gote nieman verzagen sol!
21293 Wir süln mit fröuden ûf erden leben!
21294 Swer arm ist, der sol sich begeben!
21295 Sît als mêre selber ûf erden gîte
21296 Als ir iuch jêmerlîchen tœte
21297 Liezet üm guot, daz nieman siht:
21298 Von disem guote iu guot geschiht!
21299 Zwâr wêr helle oder himelrîche,
21300 Die liute strebten ûf ertrîche
21301 Sô swinde nâch guote niht und nâch êren!
21302 Wer mac gar gîtige liute bekêren?
21303 Ir maniger rüemet sich grôzer dinge
21304 Daz er künne und müge volbringe,
21305 Und hât mit schalle grôz geschrei,
21306 Der lützel goldes üm ein ei
21307 Doch ieman gêbe, swie arm er wêr:
21308 Waz sol sôgetân valsch gesner?
21309 Sô manic man hât kreftic guot
21310 Und dâ bî grimmen herten muot.
21311 Hôchfart ist leider nu sô vil:
21312 Swer mit gemache belîben wil,
21313 Der muoz vil dinges über sehen
21314 Und tuon als ez nie si geschehen.
21315 Hôchfart wider hôchfart
21316 Hât manic lant niht wol bewart,
21317 Hôchfart wider hôchfart
21318 Machet manigen liuten grâwen bart,
21319 Hôchfart wider hôchfart
21320 Wendet maniger sêle ir himelvart,
21321 Hôchfart wider hôchfart
21322 Hât selten missetât gespart,
21323 Hôchfart wider hôchfart
21324 Ist der tiufel menegart:
21325 Daz Lucifer ein tiufel wart,
21326 Daz kom von sîner hôchfart.
21327 Hôchfertige liute sint ungemeine:
21328 Alle gram vogel fliegent gerne aleine,
21329 Kleiniu vogellîn selten kriegent,
21330 Diu schareht mit einander fliegent.
21331 Ob herren niht angest vor gifte hêten,
21332 Si kînden doch vor valschen rêten
21333 Unsanft immer sich behüeten.
21334 Wer sprichet nu, daz si niht wüeten,
21335 Die nâch grôzen êren streben
21336 Und mit grôzen sorgen leben?
21337 Natern zungen meldent gift.
21338 Kraft, rîchtuom, friunde und meister schrift
21339 Muoz entwîchen valschen zungen,
21340 Von den manigen ist übel gelungen:
21341 Si schadent den alten mit den jungen,
21342 Lant und liute hânt si betwungen:
21343 Mîhten herren die vermîden,
21344 Si endîrfte niht manic sorge snîden
21345 Ir herze beide naht und tac.
21346 Vil wirs man sich behüeten mac
21347 Vor valschen zungen denne vor giften,
21348 Wenne si künnen wunder stiften.
21349 Wizzet daz ofte den liuten grûwet,
21350 Der herze im selber niht getruwet
21351 Daz ez getriuwe müge gesîn,
21352 Wenne si habent manigerleie pîn.
21353 Milte herzen sint niht gîtic,
21354 niht valschaft, niht widerstritic;
21355 Milte herze machet frôen wirt:
21356 Bî karkeit frô selten ieman wirt;
21357 Milte herzen sint lasters frî,
21358 Den rehtiu bescheidenheit wont bî;
21359 Milte herzen sint frô ûf erden,
21360 Daz si frô in himel süln werden
21361 Bî unserm herren êwicliche:
21362 Des fröuwent si sich ûf ertrîche
21363 Und senent sich doch vil innecliche
21364 Nâch unserm herren tugentliche.
21365 Sô sint die gîtigen grimme ûf erden,
21366 Welch rât der sêle beginne werden:
21367 Und mîhten si des wazzers fluz,
21368 Der wolken guz, des luftes duz,
21369 Der sterne glast, der sunnen schîn
21370 Enthaben und vor uns sperren în,
21371 Si têtenz gerne. Wê den liuten,
21372 Die tiufel sint in menschen hiuten!
21373 Der kristenheit heilikeit
21374 Wirt vil bedecket mit glîchsenheit,

CXXXVI. Von der gleichsenheit vn[d] von der geitikeit.

21375 Under valscher triuwe deckelachen
21376 Wirt jâres vorkoufet
21377 Sôgetân lachen und süeziu wort
21378 Habent manic einveltic herze durchbort,
21379 Daz ez der dinge ûf triuwe verjach
21380 Von den im sît vil wê geschach.
21381 Glîchsenheit ist bî gîtikeit
21382 Und gîtikeit bî glîchsenheit:
21383 Die zwuo sint leider zwuo gespiln
21384 Ze vorderst an des tiufels siln,
21385 Mit den er vert durch dise werlt,
21386 Diu mit vil valsches ist geberlt:
21387 Wenne glîchsenheit und gîtikeit
21388 Velschent sêre die kristenheit,
21389 Glîchsenheit und gîtikeit
21390 Tuont selten liep und ofte leit,
21391 Glîchsenheit und gîtikeit
21392 Verwandelnt sich in manic kleit,
21393 Glîchsenheit mit gîtikeit
21394 Aller sünden krapfen treit,
21395 Glîchsenheit mit gîtikeit
21396 Ze manigen untriuwen ist bereit,
21397 Glîchsenheit mit gîtikeit
21398 Schemlicher worte vil vertreit,
21399 Glîchsenheit mit gîtikeit
21400 Kein untugent nie vermeit,
21401 Gîtikeit mit glîchsenheit
21402 Verslinden kan smal unde breit,
21403 Kurz und lanc, grôz und klein,
21404 Sûr und süeze, fleisch und bein,
21405 Golt und silber, holz und stein,
21406 Krump und sleht, rein und unrein:
21407 Ir kropf wirt leider nimmer vol,
21408 Swie vil er slindet, doch ist er hol.
21409 Gewan der tiufel ie marterer
21410 Ûf erden, daz sint gîtiger,
21411 Des endekristes samener,
21412 Des helle fürsten kamerer,
21413 Die ander liute machent frô
21414 Nâch irem tôde und als ein strô
21415 Dorret ir grüenez herze ûf erden:
21416 Wenne sol irs leides ein ende werden?
21417 Mînes lebens ir manigen hie verdriuzet,
21418 Der doch mînes tôdes niht vil geniuzet
21419 Und der vil lîhte mîn leben wîlte
21420 Her wider wünschen ob er sîlte.
21421 Swer halp mir gêbe die wîle ich lebe,
21422 Daz man nâch tôde mir gerne gêbe
21423 Den worten daz ich leben sîlte,
21424 Von kumer mir der helfen wîlte:
21425 Des entuot man leider niht.
21426 Sô man der friunde nimmer siht
21427 Ê denne man ander habe erkorn,
21428 Sô merket man waz man habe verlorn.
21429 Got müeze mir ein sêlic ende geben,
21430 Wenne ich sô lange niht wolte leben
21431 Ûf erden als ich gelebet hân,
21432 Sît ich sô wênic vinden kan
21433 Getriuwer, slehter, einveltiger liute
21434 In dirre valschen werlde hiute:
21435 Wenne triuwe hât manic lant gerûmet,
21436 Untriuwe hât aber sich nicht versumet:
21437 Diu hât gesindes noch sô vil,
21438 Daz sîn nieman weiz ein zil.
21439 Dô mêre der milten denne der kargen,
21440 Der guoten mêre was denne der argen,
21441 Dô milte und güete stuonden in werden,
21442 Seht dô lebte ich gern ûf erden:
21443 Sît unser herre verhenget hât
21444 Um unser grôze missetât,
21445 Daz der, der nie kein guot getet,
21446 Mit sînem valsche nu ümme gêt
21447 Und karc und arc zesamen hât gehen:
21448 War zuo wîlte ich nu lenger leben,
21449 Dem mit den zwein nie sanfte wart?
21450 Got herre, dem. niht ist vor verspart,
21451 Du weist gedanke herze und sin,
21452 Du weist daz ich ir friunt niht bin!
21453 Wîlent sîde ist worden werc:
21454 Dô ich von êrste ze Babenberc
21455 Kam, dô vant ich milter liute
21456 Vil mêre dâ denne ich vinde hiute:
21457 Die fleisch do wâren und gebein,
21458 Die sint nu holz, erde und stein;
21459 Die güldin wâren und silberin,
21460 Die sint nu kupferin und îsenin
21461 Und anders denne ir veter wâren.
21462 Ich wânte niht daz in hundert jâren
21463 Nach mînem tôde sîlte geschehen,
21464 Daz ich gehôrt hân und gesehen.
21465 Swenne wir müezen von hinnen scheiden
21466 Von guote, von friunden, von den beiden,
21467 Sô wirt vil zwîfellich unser vart,
21468 Habe wir si vor niht wol bewart.
21469 Ich var wol, hân ich wol getân,
21470 Triuget aber mich mîn tummer wân
21471 Daz ich verlust nim vür gewin,
21472 So enweiz ich wâ ich dran bin.
21473 Wir sitzen an maniger rechenunge,
21474 Rîche und arme, alte und junge:
21475 Und der uns aller nœtest wêre,
21476 Diu rechenunge ist uns oft unmêre.
21477 Daz ein mensche würbe nâch guote
21478 Und in daz guot niht an dem muote
21479 Gein unsers herren liebe verkêrte,
21480 Swenne sich der hûfe gemêrte,
21481 Sô wêr ez guot: swer anders tuot,
21482 Der enhât die sêle niht wol behuot.
21483 Waz sol grôz guot ze krankem lîbe,
21484 Der selber niht weiz wie lange er belîbe
21485 Bî disen êren, bî disem schalle?
21486 Wan wir alle müezen valle.
21487 Wê den, die valsche tiuscher sint
21488 Und mit offen ougen blint,
21489 Die vür kunst habent ob si bejagen
21490 Mit valsche, des si sich betragen!
21491 Swem leit ist daz man in bekennet
21492 Und sîn geslehte vor im nennet,
21493 Der ist eintweder ein heilic man,
21494 Oder nimt sich valscher êren an,
21495 Oder hât vil lîhte diu dinc getân
21496 Von den er guot und êre muoz lân,
21497 Oder sîn geslehte ist sô bekant
21498 Von bœsem liumunt über lant.
21499 Manic man hât kunst, lîp und guot,
21500 Den doch sîn swinder karger muot
21501 An fröuden, an êren, an günste swachet
21502 Und unwert pfaffen und leien in machet.
21503 Waz sol man singen oder sagen?
21504 Disiu werlt wil sô gar verzagen
21505 An unserm herren, daz zuht und êre,
21506 Der heiligen tugent und ir lêre
21507 Nieman schier ûf erden gert,
21508 Wenne diu zwei worden sint unwert.
21509 Sô sûme dich niht, Endekrist,
21510 Wenne alliu diu werlt dîn eigen ist!
21511 Schuoler wîllent nimmer lerne
21512 Und wêren doch alle herren gerne,
21513 Münche ir ebte wîllent beswêren,
21514 Die selber doch gern ebte wêren;
21515 Nunnen wîllen ungehôrsam sîn,
21516 Der manigiu gerne wêr ebtissîn;
21517 Manic dierne ir frouwen wil vernihten,
21518 Diu lützel êren kînde verrihten
21519 Ob si selber frouwe wêre:
21520 Diz ist maniger frouwen swêre.
21521 Unmenschliche liute sint leider hiute,
21522 Die wülfîn herze in menschen hiute
21523 Habent verborgen und selten immer
21524 Werdent frô, wenne leider ie grimmer
21525 Ir herze werdent die wîle si lebent.
21526 Wê den, die gein der helle strebent!
21527 Und wêr diu werlt niht sô wît,
21528 Sô hête getiusche vor maniger zît
21529 Die werlt mêre denne halp verkêrt.
21530 Wol im, der niht valsches lêrt
21531 Und der den volget, die wîser sint
21532 Denne er: wenne swer ist selber blint,
21533 Der sol mich selten über engen stec
21534 Füeren und bringen an engen wec!
21535 Wê dir priester oben hin,
21536 Der weder wort hât, werc noch sin
21537 Diu rehte gehœrent ze priester leben,
21538 Der vor im, hinder im oder neben
21539 Selten merket wer sîn goume
21540 Und gelebt der werlde als in einem troume!
21541 Wê dir ouch, priester glîchsenêr,
21542 Daz dîn sêle sô gar unmêr
21543 Dir worden ist, daz du si wigest
21544 Gein krankem getiusche, des du pfligest
21545 Eintweder durch unsinnige minne
21546 Oder durch werltliches guotes gewinne,
21547 Die beide gar unlange werent
21548 Und an dem ende dich ervêrent!
21549 Waz sol man schrîben oder tihten,
21550 Sît gîtikeît allez daz wil vernihten
21551 Daz lustic oder liep ie wart ûf erden?
21552 Swer nîmmer sêlic wîlle werden,
21553 Der trahte alle zît nâch grôzem guote
21554 Und werfe gotes liebe ûz sînem muote.
21555 Ein gît ob aller gîtikeit,
21556 Der mir von herzen ie was leit,
21557 Ist swâ priester gîtic sint
21558 Und ander gewîhtiu gotes kint,
21559 Die bilde und lêre uns sîlten geben:
21560 Ob man die siht nâch guote streben
21561 Mêre denne nâch gote, daz ist niht guot:
21562 Bœse bilde vil übels ûf erden tuot.
21563 Swen benüeget des in benüegen sol,
21564 Dem ist mit sîner habe wol:
21565 Aleine des vil geschriben sî,
21566 Doch bezzert sich wênic ieman dâ bî.
21567 Swer guot wider got gewinnen wil
21568 Und fürhtet armuot, der ahtet niht vil
21569 Urteilns, êhtens oder benne.
21570 Nu schrîbet uns meister Avicenne,
21571 Daz einer die ûzsaz vorhte sô hart
21572 Daz er vor vorhten ûzsetzic wart:
21573 Alsô fürhtet noch manic man armuot
21574 So sêre, daz sîn fleisch und sîn bluot
21575 Von gîtikeit mîhte unrein werden,
21576 Sîlte er iht lange leben ûf erden.
21577 Des lernet maniger in sîner jugent
21578 Bî gîtigen liuten manige untugent
21579 Und bî ander bœsen unfuor,
21580 Die noch diu werlt nie verswuor.
21581 Wenne manic ribalt ein herre wirt,
21582 Des herze ofte in im selber swirt,
21583 Swenne er daz üeben niht getar
21584 Des er gewont hât manic jâr:
21585 Ist dem mit gotes dienste sanfte,
21586 Sô wart keinem gebure mit brôtes ranfte
21587 Nie wol, swenne in grôz hunger twanc.
21588 Sôgetân herren habent noch danc,
21589 Daz si bî gotes dienste stênt,
21590 Des wort in doch gar wênic in gênt:
21591 Und fîrhten si niht werlde schande,
21592 Nâch gotes dienste wêr in niht ande.
21593 Sol unser herre dâr üm uns geben
21594 Sêligiu jâr, daz unser leben
21595 Ie bœser wirt von tage ze tage,
21596 Wie lange sol er uns daz vertrage
21597 Biz wir selber wider kêren
21598 Und von herzen grunde in êren?
21599 Daz tuo wir leider selten:
21600 Liez er uns des engelten,
21601 Sô wüehse vil selten ûz der erden
21602 Des wir getrœstet sîlten werden.
21603 Wenne valschiu êre und irdisch guot
21604 Grôz unbilde ûf erden tuot:

CXXXVIII. Ein rede vo[n] valscher ere.

21605 Valschiu êre hât ûzen goldes schîn
21606 Und ist doch innen kupferîn;
21607 Valschiu êre ist als ein rîtelwî,
21608 Swie er doch gelîch dem valken sî;
21609 Valschiu êre gewinnet mit valsche guot,
21610 Des einveltigiu êre niht entuot;
21611 Valschiu êre gelobt grôz und gît klein,
21612 Valschiu êre dunket schœne und ist unrein;
21613 Valschiu êre lêt sich ungerne bekennen,
21614 Einveltigiu êre getar sich nennen;
21615 Valschiu êre nâch grôzen dingen trahtet,
21616 Der einveltigiu êre gar lützel ahtet;
21617 Valschiu êre treit manigen hôhe enbor,
21618 Den einveltigiu êre wirfet in ein hor;
21619 Valschiu êre hât manic dinc erworben,
21620 Bî dem einveltigiu êre wêre verdorben;
21621 Valschiu êre nâch lobe, nâch ruome strebet,
21622 Einveltigiu êre gar sanfte lebet;
21623 Valschiu êre mit lobe sich selber uf tüemet,
21624 Einveltigiu êre sich selten rüemet,
21625 Manigem man gêt vil mêre în
21626 Ein valschiu êre oder ein lobelîn
21627 Denne aller der heiligen schrifte lêre,
21628 Der man trôst hât, frumen und êre.
21629 Swaz got getân hât grôzer wunder
21630 Mit sînen heiligen hie vor besunder
21631 Und ouch in der alten ê
21632 Mit heiligen juden und wie nu stê
21633 Diu werlt: swer daz geschriben hête
21634 Allez, vor im selten ieman bête
21635 Daz erz singen oder sagen wîlte,
21636 Als ob ez nieman hœren sîlte.
21637 Vil manigem sint aber baz bekant
21638 Hie und über manic lant
21639 Diu buoch, diu ich vor hân genant:
21640 Parcifâl und Tristrant,
21641 Wigolais und Enêas,
21642 Êrec, Iwân und swer ouch was
21643 Ze der tafelrunne in Karidôl.
21644 Doch sint diu buoch gar lügen vol,
21645 Der hân ich mich genietet wol:
21646 Sît aber ein ieglich mensche sol
21647 Mit herzen und mit munde
21648 Den êren ze aller stunde,
21649 Von dem ez lîp und sêle hât,
21650 Sô dunket mich ein missetât,
21651 Swer iht des schrîbet oder list
21652 Dâr an unsers herren lop niht ist.
21653 Als ich mich versinnen kan,
21654 Sô hât verlorn manigem man
21655 Sôgetâner tiutschen buoche lêre
21656 Lîp und sêle, guot und êre.
21657 Wenne maniger wênt er wêr enwiht,
21658 Würde er ein sôgetân degen niht
21659 Als die helde vor genant.
21660 Wirt dem des tôdes sper gesant
21661 Ê denne er sôgetân lop bejage.
21662 Wem wil der sîn wunden klage?
21663 Harnasch manigen jungelinc drücket,
21664 Daz im sîn sêle ê wirt entzücket
21665 Denne sîn stolzer lîp gedâhte,
21666 Dô in sîn frîer muot uf brâhte.
21667 Werltlich lop, wîn und wîp
21668 Verderbent manigen jungen lîp,
21669 Der manic jâr lebte wol mit êren,
21670 Wîlte er sich selber niht verkêren
21671 Mit manigerleie unmêzikeit,
21672 Diu lîbe und sêle ofte tuot leit.
21673 Swenne einer vellet, daz leber und lunge
21674 Klappernt von sînes rosses sprunge,
21675 Der muoz ûf springen als im niht werre:
21676 Wêr aber sîn muoter im niht ze verre
21677 Er klagete ir waz im wêre geschehen:
21678 Sus getar er sîn niht jehen
21679 Und muoz gar resche und frœlich sîn,
21680 Daz sîn husfrouwe oder sîn friundîn
21681 Iht sprechen er sî mit lammes vellen
21682 Ûz gerant gein ritters vellen.
21683 Wirt aber ein jungelinc gestochen,
21684 Daz ez im wê tuot vierzic wochen:
21685 Wem sîlte diu kurzewîle wol gevallen,
21686 Ob er wênt er sî gevallen
21687 Mit fröuden in sîner juncfrouwen schôz?
21688 Dise arbeit, der in nie verdrôz,
21689 Sül wir ouch geringe wegen;
21690 Bî tôrn sint ofte helde und degen.
21691 Wie her Dietrich vaht mit Ecken
21692 Und wie hie vor die alten recken
21693 Durch frouwen minne sint verhouwen,
21694 Daz hœrt man noch vil manige frouwen
21695 Mêre klagen und weinen ze manigen stunden
21696 Denne unsers herren heilige wunden.
21697 Man machet mit lobe, daz manic man
21698 Vil grôzer dinge sich nimet an,
21699 Denne er erziugen müge mit künste,
21700 Mit guote, mit kreften oder mit günste.
21701 Lop lêrt tanzen, reien, springen,
21702 Lop kan videln, harpfen, singen,
21703 Lop meide und jungiu wîp betriuget,
21704 Lop werlde tôren ofte liuget,
21705 Durch lop zwên ûf einander stechent
21706 Und künnen niht wizzen waz si rechent,
21707 Lop hœhet tummer liute muot,
21708 Lop füeget übel unde guot;
21709 Lop machet daz manic man durch wîp
21710 Verliuset guot, sêle, êre und lîp;
21711 Lop machet daz manic tummer man
21712 Sich selber niht bekennen kan;
21713 Lop hât manigen hôhe erhaben,
21714 Des lîp ân êre sît wart begraben;
21715 Lop machet ofte manigen affen
21716 Beide ûz münchen und ûz pfaffen,
21717 Daz si wênent si sîn die,
21718 Die si niht sint und wurden nie.
21719 Ist einer süezer worte vol,
21720 Sô singet der ander alsô wol,
21721 Daz engel tanzende süllen werden
21722 Von sîner stimme süeze ûf erden.
21723 Sueziu stimme mit süezer andâht
21724 Hât ofte fröude von himel brâht,
21725 Fröude ûf gein himel und fröude her abe
21726 Kan süezer herzen trûren labe:
21727 Swer alsô singet, daz ist guot,
21728 Werltlich loben schaden tuot.
21729 Vil grôzer untugent sîn herze pfliget,
21730 Swer schelten und loben gelîch wiget.
21731 Lop gehœrt unsern herren an,
21732 Den tiufel man niht vol schelten kan.
21733 Swer einem andern daz verkêrt
21734 Swâ mit er gotes lop gemêrt,
21735 Wizzet vürwâr, der tuot niht wol:
21736 Unsers herren lop nieman irren sol.
21737 Swen werltlich lop hie treit enbor,
21738 Der hüete sich daz er uf daz spor
21739 Iht kume, dâ Lucifer uns hât
21740 Gebent des êwigen valles pfat.
21741 Manic klein dinc nidert hôhen muot,
21742 Manic grôz dinc lützel schaden tuot:
21743 Der helfant fliuhet eine mûs,
21744 Der selber grôz ist als ein hûs
21745 Und ûf im treit wol vierzic man
21746 Mit wâpen, als ich gelesen hân.
21747 Ouch machet ein kleinez würmelîn
21748 Einem grôzen rosse grôze pîn.
21749 Der lewe ist künic über alliu tier,
21750 Doch schrecket ein wîzer han in schier:
21751 Swenne er den siht, sô fürhtet er sich:
21752 Und ist daz niht gar wunderlich,
21753 Daz den erschrecken sol ein han
21754 Der angst ûf erden nie gewan
21755 Vor tieren, vogeln, mannen, wiben?
21756 Als muoz ein dinc daz ander vertrîben.
21757 Unser herre hât uns allen geben,
21758 Daz wir mit sorgen ûf erden leben.
21759 Swer frô wil belîben êwicliche,
21760 Der si bî im in himelrîche.
21761 Daz mac er ûf erden wol erwerben,
21762 Er wîlle denne williclich verderben.
21763 Mâze, gedult, zuht, kiusche und êre
21764 Und manic tugenthaftiu lêre
21765 Fünde man geschriben in manigen buochen,
21766 Swer si mit flîze wîlte suochen:
21767 Nu machet der werlde bœse bilde
21768 Schuoler, pfaffen und münche sô wilde,
21769 Daz si der buoche lützel ahtent
21770 Und niur des lîbes lust betrahtent.
21771 Sît wir von erden sîn bekumen.
21772 Des wîllent die bœsen mit den frumen
21773 Mit allem geluste ir muoter haben
21774 Liep biz daz si sîn begraben:
21775 Sô hât ir muoter si wider enpfangen,
21776 Swie ez der sêle ouch sî ergangen.
21777 Wie wil über sehzic jâr der gebârn,
21778 Der in sîner jugent bî drîzic jârn
21779 Nie wart frô ûf ein halp jâr?
21780 Der hân ich bekant vürwâr
21781 Mêre denne vier bî mînen tagen.
21782 Unserm herren sül wir ez immer klagen,
21783 Ob sôgetân trûren ist niht guot
21784 Und ob manz hât üm irdisch guot.
21785 Mit zühten frœlich in der jugent
21786 Hât selten geirret alters tugent.
21787 Swer sehzic jâr trûric ist ûf erden,
21788 Der sol vil selten frœlich werden,
21789 Er habe denne gote gedienet dâ mite.
21790 Valsch trûren ist ein bœser site,
21791 Wenne valsche kristen sint vil erger.
21792 Grimmer, swinder und vil kerger
21793 Denne juden, tatan oder heiden,
21794 Als ich iu nu wil bescheiden:
21795 Man bekêrte jene ê von irm unrehte
21796 Denne dise, die wênent sîn gotes knehte
21797 Und gotes wort und sîn dienst schiuhent
21798 Und gein der heiligen schrift sich riuhent
21799 Als ein hunt, der bîzen wil:
21800 Der ist leider nu sô vil,
21801 Daz nieman weiz an wen er sich
21802 Mac lâzen, sît sô wîten strich
21803 Hôchfart, nît und gîtikeit
21804 Hânt leider in aller der kristenheit:
21805 Der sol ê mêre denne minner werden.
21806 Man beginnet noch mêr liute vinden ûf erden
21807 In sôgetâner erge und hertikeit,
21808 Daz meilic freidic, liep wirt leit,
21809 Kiusche getiusche, zuht sêle suht,
21810 Wort und werc untugende fruht.
21811 Wâ vinde wir nu den friunt ûf erden
21812 Bî den armen oder bî den werden,
21813 Der gein sînem friunde gar ûz gieze
21814 sîn herze als wazzer und niht beslieze
21815 Etwaz in sînes herzen grunde,
21816 Daz oben niht ûz gê ze dem munde?
21817 Des siht man leider iezunt selten
21818 Ganze triuwe mit triuwen gelten.
21819 Nu sül wir aber vürbaz rennen
21820 Und unsern herren baz bekennen.

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 12.11.2004