CXLI. Ein rede gewere niema[n]t swere.

22121 Mir ist als einem, der über mer
22122 Vert mit einem grôzen her,
22123 Und swenne er kumt gein Jerusalem,
22124 Daz in denne begrîfet ein lem
22125 Daz er niht vürbaz kumen mac:
22126 Der hât gelebt im leiden tac,
22127 Daz er die wunneclichen stat,
22128 Diu vil bezeichenunge an ir hât,
22129 niht sol beschouwen und durch gên.
22130 Seht als muoz ich nu leider stên
22131 Lam vor der heiligen schrifte stat,
22132 Diu manic wunder in ir hât,
22133 Daz lustic und gar nütze wêr!
22134 Wenne ich bin müede kumen her
22135 Mit einem gar wîten gesamten her
22136 Durch der wilden werlde mer
22137 Und klage, daz sich nu nieman gar
22138 An den andern gelâzen tar.
22139 Des wirt manic wort verdrücket
22140 Und in dem munde wider zücket,
22141 Daz man vil gerne brêhte ze velde,
22142 Vörhte man niht unkust und melde.
22143 Râtliute, schrîber und bîhtigêre
22144 Wizzen vil mêre niuwer mêre
22145 Denne ander liute und fürsten boten:
22146 Dâ von ist nôt daz si dri knoten
22147 Strickent vür des mundes tür,
22148 Daz die heimlîche ieman spür,
22149 Von der schade müge ûf erstên.
22150 Swar si rîten oder gên,
22151 Sô süln si sich hüeten baz
22152 Denne ander liute, wol zimt in daz!
22153 Vogel, tier und slangen zemt
22154 Ein mensche, den sîn zunge lemt,
22155 Ob er si niht gezemen kan:
22156 Dâ von sprach der sêlige man:
22157 "Swaz übels und guotes wir hân vernumen,
22158 Des ist ein teil von zungen kumen:
22159 Diu zunge manigen schendet,
22160 Si stümmelt unde blendet;
22161 Diu zunge triuwe leidet,
22162 Daz liep von liebe scheidet;
22163 Vür schande wart nie bezzer list
22164 Denne der der zungen meister ist;
22165 Swâ diu zunge reht tuot,
22166 Dâ ist kein gelit sô guot."
22167 Der besten gâbe einiu, die got hât
22168 Dem menschen geben an aller stat
22169 Nâch lîbe und sêle, daz sint wort,
22170 Diu wegent vür schœne, kraft, friunde und hort.
22171 Swer si kan ze rehte wegen,
22172 Triuwen und witze mit zühten pflegen,
22173 Des lêre ist als ein meien regen,
22174 Dem got hât geben sînen segen:
22175 Swer aber der êren sich erwiget
22176 Und tegelicher unzühte pfliget,
22177 Des wort, des werc sint ungenême,
22178 Got und den sînen widerzême.
22179 Manic man sîn wort besliuzet
22180 Sô sêre, daz redens in verdriuzet.
22181 Mit worten maniger über fliuzet,
22182 Des rede wênic ieman geniuzet.
22183 Bœsiu wort und bœsiu werc
22184 Habent die von Lasterberc,
22185 Süeziu wort und süeziu werc
22186 Habent die von Sêldenberc,
22187 Guotiu wort und übeliu werc
22188 Habent die von Trügenberc.
22189 Wir haben zwei ôren und einen munt
22190 Von natur, daz uns si kunt
22191 Daz wir vil mêre gehœren süln
22192 Denne ûz maln mit mundes müln.
22193 Wort weichent manigen herten zorn,
22194 Von worten werdent friunde verlorn;
22195 Wort haltent ûf die kristenheit,
22196 Wort füegent beide liep und leit;
22197 Wort sliezent ûf der herzen schrîn,
22198 Diu lange beslozzen müesten sîn;
22199 Wort tuont uns guot und übel kunt,
22200 Von worten manic mensche wirt gesunt;
22201 Starker worte reinikeit
22202 Bewêrt die siben heilikeit:
22203 Toufen, firmen, bîhten, ölunge
22204 Stênt an worten ordenunge;
22205 Wort habent der kristenheite geben
22206 Ritter, pfaffen und êlich leben:
22207 Diu wort vür alliu wunder wegent,
22208 Mit den daz brôt der priester segent
22209 Ûf dem altar und den wîn,
22210 In den zwein got selber wil sîn
22211 Wâr got, wâr mensche ân underscheiden
22212 Ân zwîfel ganz gar in in beiden,
22213 Dirre sin ist ouch dâ vor gerüert
22214 Aleine er hie sî în gefüert,
22215 Daz man in merke deste baz:
22216 'Zeimâl' vil mêre denne 'zwirnt' vergaz.
22217 Sît aller künste meisterschaft
22218 An worten lît und ouch ir kraft.
22219 Sô merket waz uns geschriben hât
22220 Aristotiles an einer stat:
22221 "Got hât die sprâche dem menschen geben.
22222 Daz ez mit ir ûz rihte sîn leben,
22223 Wenne ez vil mêr begerunge hât
22224 Denne alliu sîn ander handgetât."
22225 Sît got vergeben uns hât geben
22226 Die sprâche, sô sül wir dar nâch streben,
22227 Daz wir si jungen und alten mite
22228 Vergeben teilen nâch friundes site
22229 Und si mit guoter lêre spîsen
22230 Und gein dem himelrîche wîsen.
22231 Gotes lop sül wir gemêren
22232 Mit worten und sünder bekêren,
22233 Fride machen, predigen, beten,
22234 Der sêle unkrût mit worten ûz jeten
22235 Und mit worten alsô verswenden,
22236 Daz uns die vînde her nâch iht schenden.
22237 Swer aller sprâche kraft wil haben,
22238 Der merke mit flîze fünf buochstaben:
22239 Die sint sô wirdic und sô schœne,
22240 Daz alliu wort und allez gedœne
22241 Nâch in gestimmet müezen sîn:
22242 Des heizet man si die stimmerîn:
22243 A hebt und endet des mannes leben,
22244 E den wîbesnamen ist geben,
22245 I tratzes und ouch wunders pfliget,
22246 U von im selber niht vil wiget,
22247 O schricket, rüefet, wünschet, wundert:
22248 Dise buochstaben sint ûz gesundert
22249 Mit sô hôher wirdikeit,
22250 Daz diu rede lanc und breit
22251 Würde, sölte ich si gar durch gründen;
22252 Doch wil ich einz vür wâr iu künden:
22253 Swer tiutsche wil eben tihten,
22254 Der muoz sîn herze rihten
22255 Ûf manigerleie sprâche:
22256 Swer wênt daz die von Âche
22257 Reden als die von Franken,
22258 Dem süln die miuse danken.
22259 Ein ieglich lant hât sînen site,
22260 Der sînem lantvolke volget mite.
22261 An sprâche, an mâze und an gewande
22262 Ist underscheiden lant von lande.
22263 Der werlde dinc stêt über al
22264 An sprâche, an mâze, an wâge, an zal.
22265 Swâben ir wörter spaltent,
22266 Die Franken ein teil si valtent,
22267 Die Beier si zezerrent,
22268 Die Düringe si ûf sperrent,
22269 Die Sahsen si bezückent,
22270 Die Rînliute si verdrückent,
22271 Die Wetereiber si würgent,
22272 Die Mîsener si vol schürgent,
22273 Egerlant si swenkent,
22274 Oesterrîche si schrenkent,
22275 Stîrlant si baz lenkent,
22276 Kernde ein teil si senkent,
22277 Bêheim, Ungern und Lamparten
22278 Houwent niht mit tiutscher barten
22279 Franzois, Walhe und Engellant,
22280 Norweye, Yberne sint unbekant
22281 An ir sprâche tiutschen liuten;
22282 Nieman kan ouch wol bediuten
22283 Kriechisch, jüdisch und heidenisch
22284 Syrisch, windisch, kaldêisch:
22285 Swer daz mischet in tiutsch getihte.
22286 Diu meisterschaft ist gar ze nihte.
22287 Die lantsprâche dâ vor genant
22288 In tiutschen landen sint bekannt:
22289 Swer ûz den iht guotes nimt,
22290 Daz wol in sînem getihte zimt,
22291 Mich dünket dern habe niht missetân,
22292 Tuot erz mit künste und niht nâch wân.
22293 Wenne Westfaln und manigiu lant.
22294 Diu hie belîbent ungenant,
22295 In tiutschen landen sint bekant,
22296 Aleine si maniger zungen bant
22297 Würgen, zwicken und binden
22298 Vorn, mitten und hinden.
22299 Wenne T und N und R
22300 Sint von den Franken verre
22301 An maniges wortes ende:
22302 Wer wil dâr üm si pfende,
22303 Ob Swanfelder ir wörter lengent
22304 Und Babenberger ir sprâche brengent
22305 Von den hülsen ûf den kern?
22306 Ein ieglich mensche sprichet gern
22307 Die sprâche, bî der ez ist erzogen.
22308 Sint mîniu wort ein teil gebogen
22309 Gein Franken, nieman sî daz zorn,
22310 Wenne ich von Franken bin geborn.
22311 Ouch sol man noch besunder danken
22312 Eins sprichwortes allen frumen Franken:
22313 Man sprichet gern, swen man lobet hiute,
22314 Er sî der alt frenkischen liute:
22315 Die wâren einveltic, getriuwe, gewêre:
22316 Wölte got daz ich alsam wêre!
22317 Sîn vaterlant nieman schelten sol,
22318 Sînen wirt, sînen herren, daz zimt wol:
22319 Ist aber iht tugent in disen drîn,
22320 Schiltet man si denne, daz lâze ich sîn.
22321 Frankenlant hât êren vil:
22322 Von der rede ich kêren wil
22323 Und wil von andern sprâchen sagen:
22324 Des enlât iuch niht betrâgen!
22325 Jüdisch, kriechisch und latîn
22326 Müezen in allen messen sîn,
22327 Wenne aller sprâche lêrerîn
22328 Ist kriechisch, sô muoz jüdisch sîn
22329 Der sprâche muoter über alliu lant,
22330 Daz ist den wîsen wol bekant:
22331 Aber aller sprâche künigîn
22332 Uber alle die werlt ist latîn.
22333 Daz vellet schôn vorn ûz dem munde,
22334 Jüdisch hûchet in der kele grunde,
22335 Kriechisch stœzet ûf an den guomen:
22336 Dise drî sprâche sint rôsen bluomen
22337 Vor andern ûf der werlde heide,
22338 Die wîle man und wîp lebent beide.
22339 Mit den drîn sprâchen schrîben hiez
22340 Einen brief Pilâtus, den man stiez
22341 Oben an daz kriuze, dâ Crist an leit
22342 Die marter üm unser sêlikeit.
22343 Tiutsch hât wîte hofestat,
22344 Latîn an smalem fletze stât
22345 Als ein wol geziertiu maget,
22346 Diu jungen und alten wol behaget,
22347 Die ir mit ganzen triuwen gernt
22348 Und si mit valsche niht beswêrnt.
22349 Kriechisch gar wîte gestriuwet lît,
22350 Jüdisch hât in im selber strît
22351 Mit manigen punkten underscheiden
22352 Oben und unden vor jenen beiden.
22353 Wizzet daz der heiligen schrift
22354 Wort sint ûzen als ein wift,
22355 Diu doch vol honiges steckent innen,
22356 Süezer lêre und gotes minnen.
22357 Einveltiger wort wurden nie gehôrt
22358 Denne diu got sprach und habent den hort
22359 Aller wîsheit doch begriffen,
22360 Aleine si lützel sîn gesliffen
22361 Und geblüemet, als manic man
22362 In der werlde nu reden kan:
22363 Des wêne ich, daz die zwelf boten
22364 niht sô manigerleie knoten
22365 An iren predigen haben gemacht,
22366 Als man sider hât erdâht.
22367 Diu werlt ist leider nu sô swinde,
22368 Daz ich lützel einvelte vinde:
22369 Dâ von ist nôt, swa mit man mac
22370 Gotes dienst gefürdern naht und tac.
22371 Ouch wizzet er ist ein sêlic man,
22372 Der tiutsch und latîn eben kan
22373 Ûz gelegen mit süezem munde
22374 Und âne hôchfart ze aller stunde:
22375 Wenne hôchfart wont den künsten bî,
22376 Gotes minne ist schanden frî.
22377 Wie sölte grôziu kunst den sîn bekant,
22378 Die selten immer in ir hant
22379 Kein buoch durch künste wöllen nemen,
22380 Die sich vor gote der êren schemen
22381 Der si doch von der werlte gernt?
22382 Sô manic pfaffe kûme gelernt,
22383 Daz er driu blat sînes amptes kan:
22384 Der ensiht kein buoch mêr vürbaz an
22385 Er müeze ez denne tuon durch nôt,
22386 Daz er dâ mit verdiene sîn brôt:
22387 Dâ von wizzet daz latîn
22388 Manigem pfaffen ist ein pîn.
22389 Swer gotes schâfe wil reht pflegen,
22390 Der sol sîn wort vil eben wegen,
22391 Daz ieman geergert werde von in.
22392 Der werlde schade und ir gewin
22393 Lît an worten, ein michel teil
22394 Der sêle verlust und ouch ir heil.
22395 Swer reden kan ze rehter zît,
22396 Nu wizzet daz des rede lît
22397 Als güldîn öpfel, sprach Salomôn,
22398 In silberînen becken ligent schôn:
22399 Güldîn öpfel sint gotes wort:
22400 An den lît unser sêlden hort,
22401 Diu ruowent sanfte und silberglîzent
22402 Bî liuten, die sich tugent flîzent.
22403 Honic gêt ûz des wîsen munde,
22404 Sîn zunge ist honicseim ze aller stunde,
22405 Der wîsen lêre ist und ir sagen
22406 Als nagel ûf in die hœhe geslagen.
22407 Manic dinc nert vogel unde tier,
22408 Von dem ein mensche verdürbe schier:
22409 Wüetscherlinc ist bocken und geizen guot,
22410 Des menschen magen er schaden tuot;
22411 Waz möhte etswenne unreiner sîn,
22412 Denne daz ein huon nert und ein swîn?
22413 Und ist ir fleisch doch gar genême
22414 Und selten ieman widerzême;
22415 Stündige liute kreftet brôt,
22416 Von dem ein sûgendez kint lît tôt;
22417 Wispeln wilde vogel zemt,
22418 Hunde ez letzet unde lemt:
22419 Als kumt von worten übel und guot,
22420 Als denne ir meister ist gemuot.
22421 Swer tumme und wîse verrihten kan
22422 Mit lêre, der ist ein sinnic man,
22423 Wenne ein tôr des lützel ahtet,
22424 Nâch dem der wîse gar swinde trahtet.
22425 Als ezzich in lûter salz verborgen
22426 Sint bitter herzen: swer den ir sorgen
22427 Wil benemen mit süezen lêren,
22428 Der wil ir bitterkeit gemêren.
22429 Der mensche sêlic ist geborn,
22430 Der alle zît fürhtet gotes zorn:
22431 Swer aber hertes muotes ist,
22432 Der vellet in übel ze aller frist.
22433 Als vil uns got vertreit hie lenger,
22434 Als vil wirt dort sîn zorn ie strenger.
22435 Diz ist aller heiligen lêre,
22436 Daz man got liep habe und in êre.
22437 Swer sol denne schrîben oder tihten,
22438 Swenne man die selber ez hœrt vernihten,
22439 Die anders niht ûf erden haben
22440 Denne daz si von der künste sich laben,
22441 Die tihten und schrîben von den alten
22442 An uns habent brâht, daz wir ir walten?
22443 Adâm und Êvâ und Âbraham,
22444 Ênoch, Nôê, Matûsalam,
22445 Künic Davîd und her Salomôn
22446 Und der gar schœne Absolôn,
22447 Manic tûsent frouwen unde man
22448 Und swaz die wunders haben getân,
22449 Manic vogel, tier, krût, wazzer und lant
22450 Wêren uns noch vil unbekant,
22451 Hêten ez die meister niht geschriben
22452 Und mit der schrift an uns getriben.
22453 Wâ wêr manic tiefiu wîsheit beliben,
22454 Diu in der schrift noch ist bekliben?
22455 Von der schrift lêre daz gêt
22456 Daz kristen geloube hiute stêt,
22457 Von der schrift lêre daz gât
22458 Swaz frumen und êren diu werlt hât.
22459 Ein mensche hât mêre denne ander hundert
22460 Guotes und êren: swen denne des wundert,
22461 Ob ein wol gelêrter man
22462 Mêr denne ander hundert kan,
22463 Der mac wol sîn ein vihe âne horn;
22464 Doch hât diu werlt vil mere tôrn
22465 Denne wîser liute, des ist diu schrift
22466 Tummer liute herzen gift.
22467 Dâ von schrîbet sant Paulus
22468 In einem sînem briefe alsus:
22469 "Noch kumt diu zît, daz guote lêre
22470 Nieman wil lîden und daz vil mêre
22471 Diu werlt beginnet zesamen schübeln
22472 Meister, die diu ôren grübeln
22473 Und von der wârheit wenden ir ôren,
22474 Als gerne ie tâten werlttôren;
22475 Nâch speln und nâch unnützen dingen
22476 Beginnent si mit einander ringen."
22477 Diz wil nu leider werden wâr,
22478 Sît die wârheit nieman gar
22479 Gepredigen tar noch predigen wil.
22480 Dâ setze wir der rede ein zil.
22481 Der alten lêre ist uns ein troum,
22482 Wenne diu werlt hât den zoum
22483 Aller untugent erwischet.
22484 Swer âne wazzer vischet
22485 Mit netzen, riusen und mit angeln,
22486 Der mac wol vische mangeln:
22487 Swer dâ tugent suochen wil,
22488 Dâ mêr untugent ist denne ze vil,
22489 Der mac wol vischen âne gelüppe
22490 Als der ûf vêhet der sunnen stüppe.
22491 Zwei dinc mac man niht verliesen:
22492 Seht iuch vür, welhez wöllet ir kiesen?
22493 Der helle pîn und daz himelrîche:
22494 Disiu wal geteilt lît gar ungelîche:
22495 Sô sint zwei dinc, swer diu verliuset,
22496 Ir gelîchen er nimmer mêr erkiuset:
22497 Daz ist der magetuom und diu zît:
22498 Disiu rede ist wâr âne widerstrit.
22499 Got gap den grôzer genâden segen,
22500 Die des jâres zît hânt gewegen
22501 Und durch suochet sô gar ze grunde,
22502 Daz kleiniu stückelîn einer stunde
22503 Dem schaltjâr füegent sînen sprunc.
22504 Wir sîn rîch, arm, alt oder junc,
22505 Sô müeze wir nâch der zît uns rihten.
22506 Waz könde wir tôren nu getihten,
22507 Hêten ez die alten niht erdâht
22508 Und mit tiefem sinne volbrâht?
22509 Swer der lêre nâch volgen wölte,
22510 Der tête und lieze swaz er sölte.
22511 Wir vinden geschriben ouch vür wâr,
22512 Daz sant Augustîn niun jâr
22513 Trûric wêr üm daz er hête
22514 Einer spinnen gewartet, wie si tête
22515 Dô si ir webbe zesamen brâhte,
22516 Daz er dô niht an gote gedâhte
22517 Und die zît verlôs sô gar,
22518 Die wîle er nam der spinnen war.
22519 Sît wir antwürte müezen geben
22520 Üm unser zît und wie wir leben,
22521 Stüende ez denne an dem willen mîn,
22522 Der vîretage müeste minner sîn:
22523 Wenne bier und mete und starker wîn,
22524 Tanz, spil und tummiu frouwelîn
22525 Und vîretegelich müezikeit
22526 Tuont vil mêre übels denne guot arbeit.
22527 Swer würket, der leit sînen sin
22528 Ûf sîn arbeit durch gewin,
22529 Sô legent die müezigen irn gelust
22530 Ofte ûf lîbes und sêle verlust:
22531 Des ist vil bezzer guot arbeit
22532 Denne schedelichiu müezikeit.
22533 Wir dienen unserm herren oben hin:
22534 Welch sêlic mensche hât nu den sin,
22535 Der sich ze gote und in got senke
22536 Und inbrünstlich an in gedenke?
22537 Schrîber und mâler gotes wunder
22538 Vinde wir genuoc, swer ez merken wil:
22539 Minnen quâler, die sîn zunder
22540 Gar habe enzündet, der enist niht vil.
22541 Disiu werlt ist als ein goukeltabel,
22542 Wenne si hât als ein schâchzabel
22543 Künige und dar zuo künigîn,
22544 Roch, ritter, alten, vendelîn:
22545 Des hât got wol sîn goukel spil
22546 Mit uns, der ez rehte merken wil.
22547 Der goukeler sprichet: "Wider in die taschen",
22548 Sô sprichet unser herre: "Wider in die aschen,
22549 Von der ir alle sît bekumen,
22550 Rîche und arme, bœse mit den frumen!"
22551 Sô sîn gewalt mit uns gespilt,
22552 Daz manigen hie der zît bevilt.
22553 Wenne angest, siuche und armuot
22554 Nidernt manigen hôhen muot;
22555 Siuche und sorge und ouch diu jâr
22556 Swendent manic antlütze klâr;
22557 Lilien, viol und rôsen
22558 Siht man von dem alter bôsen;
22559 Vogel, tier, loup und gras
22560 Und swaz ûf erden ie schœne was,
22561 Daz swindet bî uns von tage ze tage.
22562 Swen herzeleit twinget, der muoz klage:
22563 Swen weder siuche noch armuot rüert,
22564 Dem ist als einem den man füert
22565 Durch schœne garten, wisen und ouwe,
22566 Daz er der werlte wunne schouwe
22567 Und mit fröuden durch si gâhe
22568 Gein dem galgen, daz man in hâhe.
22569 Mit siuche, mit armuot got versuochet
22570 Den, des er hin nâch geruochet.
22571 Gar unsanfte im der selber lebt,
22572 Der dar nâch ze allen stunden strebt,
22573 Daz man in baz habe denne er ist:
22574 Waz sî wir alle denne ein mist?
22575 Swaz man uns lobes und êren an leit,
22576 Daz kumt von der wirdikeit
22577 Die got der werden sêle hât geben:
22578 Waz sol âne tugent des menschen leben?
22579 Mich dunket einez gar tumme liute,
22580 Der man genuoc doch vindet hiute:
22581 Die fremder liute laster spehent
22582 Und sich selber niht an sehent.
22583 Swelch mensche grôz laster hât getân,
22584 Daz sölte die gerne mit fride lân
22585 Die sich vor laster haben behuot,
22586 Denne daz der tiufel sô tratzen muot
22587 Den sînen ûf erden nu hât geben,
22588 Daz si guoter liute leben
22589 Vil gerne wölten nider drücken
22590 Und sich mit valschem lobe ûf zücken.
22591 Si künnen ir schande wol bedecken
22592 Und ein kleine unzuht enblecken
22593 Eins andern und gar wîten ströuwen;
22594 Mit grôzen worten künnen si dröuwen
22595 Einem, der in ze wege saget;
22596 Si sint an bôsheit unverzaget,
22597 An zühten, an triuwen sint si lam
22598 Und allen gerehten liuten gram.
22599 Swer guoten liuten übel sprichet
22600 Und niht weiz waz er an in richet,
22601 Sich selber er in sîn herze stichet,
22602 Swenne er gotes gebot zebrichet.
22603 Manic wip ist alsô gemuot,
22604 Swenne si selher missetuot,
22605 Daz si deheiner frouwen wort
22606 Sprichet wol, denne lasterhort
22607 Hât der tiufel manigem man
22608 Bevolhen, als ich gemerket hân:
22609 Die selben sich mit kriege spîsent,
22610 Die si vor allen dingen prîsent.
22611 Der spinnen spîse wirt in ir gift,
22612 Der binen honic und ir wift
22613 Kument von süezer reinikeit:
22614 Wizzet daz reiniu heilikeit
22615 Selten bî den liuten wont,
22616 Der herze von maniger erge dont.
22617 Mir sagte ein priester daz beirisch wîn,
22618 Juden und junge wölfelîn
22619 Aller beste sîn in der jugent,
22620 In dem alter wehset ir untugent:
22621 Als hât noch tugent in sîner jugent
22622 Manic mensche und in sînem alter untugent.
22623 Nieman ist frumen liuten gram,
22624 Er sî denne selber an tugenden lam,
22625 Wenne ein ieglich frumer man
22626 Sînem genôzen wol guotes und êren gan;
22627 Und ob er leit im hât getân,
22628 So gedenket er selber doch dar an
22629 Daz âne sache niht geschiht:
22630 Zuht hât mit wîsen liuten pfliht.
22631 'Bekenne dich selben' ist ein wort,
22632 Daz êwiger sêlden und êren hort
22633 In im hât: sêlic ist der man,
22634 Der ez wol bedenken kan!
22635 Der vindet sîn dort lôn und hie danc.
22636 Dâ von sprach her Frîdanc:
22637 "Swer in sîn selbes herze siht,
22638 Der sprichet nieman übels niht;
22639 Swer gedenket an sîn selbes missetât,
22640 Die mînen er ungemeldet lât;
22641 Swer ühel verstên kan unde guot,
22642 Der weiz wol wenne er missetuot;
22643 Swer selber weste wer er wêre,
22644 Manic schelten er verbêre."
22645 Nu hœrt ein wâr geschriben mêre,
22646 Daz nütze ist und ouch lobebêre:
22647 Ze Rôme was ein gewonheit:
22648 Swer mit Rœmer vînden streit
22649 Und mit kreften über want
22650 Stete, bürge oder lant,
22651 Den sazte man ûf einen wagen
22652 Und tet im an mit golde durchslagen
22653 Einen roc, ouch muoste sîn
22654 Mit pfeller und mit baldekîn
22655 Der wagen schône behangen.
22656 Alsus wart er enpfangen.
22657 Vier pfert giengen an dem wagen,
22658 Wîz als ein snê. Nu lât iu sagen,
22659 Wie schône daz volc in allez enpfienc
22660 Und wie ez im dar nâch ergienc:
22661 Alle die jungelinge in der stat
22662 Riten gegen im an daz pfat,
22663 Dâ der wagen her gienc.
22664 Dô diu geselleschaft in enpfienc,
22665 Ein kneht stuont hinder im, der des pflac
22666 Daz er im einez sluoc ûf den nac,
22667 Âne haz mit zühten schôn,
22668 Und sprach: "Nothis elythôn":
22669 Daz sprichet: "Bekenne selber dich!
22670 Wizze wer du sîst und merke mich:
22671 Der grôzen êren, der du hâst,
22672 Wirdestu vil lîhte morgen ein gast!
22673 Wizze daz des gelückes rat
22674 Lützel stêter triuwen hât!
22675 Werltlich êre, lop und guft
22676 Ist als ein tou, rîf oder tuft."
22677 Der wagen aber vürbaz gienc.
22678 Ein ander schar in denne enpfienc
22679 Der alten Rômêre:
22680 Ritter, frîen und burgêre
22681 Tâten an ir guot gewant
22682 Und riten gein im. Sân zehant
22683 Sluoc aber einen slac im ûf den nac
22684 Der kneht, der sînes genickes pflac,
22685 Und sprach aber als dô vor.
22686 Swenne er denne kam ze dem bürgetor,
22687 Sô mohte man wunne schouwen
22688 Von juncfrouwen und von frouwen,
22689 Die gein im alle giengen
22690 Und frœlich in enpfiengen:
22691 Si zierten wol den liehten tac.
22692 Nu gap im den dritten slac
22693 Der kneht: daz beleip gar ungerochen.
22694 Er sprach diu wort, diu vor gesprochen
22695 Sint, dâ mite fuor er hin în.
22696 Golt, silber, pfeller, baldekîn,
22697 Edel gesteine und vingerlîn,
22698 Manec kleinôt, mete und wîn
22699 Wart im denne geschenket.
22700 Swer rehte nu bedenket
22701 Dise gewonheit lobelîch,
22702 Er sî junc, alt, arm oder rîch,
22703 Der smêhe sich selber hie ûf erden
22704 Und gedenke, daz sîn lîp muoz werden
22705 Unreiner denne ie kein ander mist,
22706 Swenne im diu sêle entrunnen ist.
22707 Mir kumt ofte in mînen sin
22708 Waz ich was und waz ich bin:
22709 Waz aber ich nu werden sol,
22710 Könde ich daz bedenken wol,
22711 Vil wol gebezzerte ich mich des.
22712 Wenne ez sprach Aristotiles:
22713 "Unnütze ist swaz der mensche tuot,
22714 Er mache denne daz ende guot":
22715 Swer aber sîn riuwe an daz ende spart,
22716 Der hât sich niht wol bewart,
22717 Sô sîn sêle vert hin die leiden vart
22718 Von dem lîbe, der ir sô zart
22719 Ist gewest sô manic jâr.
22720 Ir sült gelouben mir vürwâr,
22721 Daz den lîp sô grôziu nôt
22722 Begrîfet, ê denne der grimme tôt
22723 Im an gesige, daz selten ieman
22724 Dô rehte riuwe gehaben kan.
22725 Der sünder an der stat wirt geslagen,
22726 Dem got vor gar vil hât vertragen,
22727 Daz er sîn selbes muoz vergezzen
22728 Swenne er mit engsten ist besezzen,
22729 Der vor nie gotes gedenken wolte
22730 Ûf erden als er ze rehte solte.
22731 Wir sölten haben ze aller stunde
22732 Driu dinc: gotes lop in dem munde,
22733 An dem lîbe sîner marter smerzen,
22734 Sîner süezen minne fiur in dem herzen;
22735 Und daz uns wol erloubet wêre,
22736 Daz sölte durch got uns sîn unmêre:
22737 Als künic Davîd, dô in vil sêre
22738 Dürstet und er durch gotes êre
22739 Daz wazzer ûf die erden gôz,
22740 Des weder er noch sîn volc genôz:
22741 Swer der künige buoch ie gelas,
22742 Der mac wol wizzen wâ daz was.

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 12.11.2004