V. Ditz ist vo[n] der hoffart weyse vn[d] war an sie leit.

463 Noch hât der hôchferte dorn
464 Manigen ast, von dem verlorn
465 Leider manic sêle wirt,
466 Diu mit valle in niht verbirt:
467 Hôchfart lît an schœne,
468 Hôchfart lît an gedœne,
469 Hôchfart lît an künste,
470 Hôchfart lît an günste,
471 Hôchfart lît an rîten,
472 Hôchfart lît an strîten,
473 Hôchfart lît an gewande,
474 Hôchfart hât manige schande,
475 Hôchfart lît an ritterschaft,
476 Hôchfart lît an meisterschaft.
477 Hôchfart lît an lôsen triten,
478 Hôchfart lît an stolzen siten,
479 Hôchfart kan die kel ûf recken,
480 Hôchfart kan dröuwen unde schrecken,
481 Hôchfart kan arme liute erstecken,
482 Hôchfart wil alliu dinc nider strecken,
483 Hôchfart wont bî küenen recken,
484 Hôchfart wont bî betel secken,
485 Hôchfart minnet lop vür got,
486 Hôchfart durch ruom gêt in den tôt,
487 Hôchfart ist an tugenden lam,
488 Hôchfart ist guoten liuten gram,
489 Hôchfart kan bœslich sehen,
490 Hôchfart kan bœslich spehen,
491 Hôchfart lûzet in maniger kappen,
492 Hôchfart wont bî reisigen knappen,
493 Hôchfart füert an irem reien
494 Müniche, pfaffen unde leien,
495 Hôchfart lît an rîchtuom,
496 Hôchfart hât den obersten ruom.
497 Dô von sprach hie vor alsus
498 Der liebe sant Gregorius:
499 "Dem verstôzen engel ist er gelîch,
500 Er sî junc, alt, arm oder rîch,
501 Swer sich über ander liute wil
502 Unrehtes gewaltes an nemen ze vil,
503 Und swer des gert daz sîn genôz
504 In fürhte, des hôchfart ist ze grôz."
505 Pfaffen, ritter und gebûre
506 Sint alle gesippe von natûre
507 Und süln gar brüederlîchen leben.
508 Swer meister oder rihter wird gegeben
509 Über sîn genôz, der sol mit güete
510 Und niht mit hôchfart si behüete
511 Und sol mit bescheidenheit
512 Ûz rihten beidiu liep und leit.
513 Nu ist gewaltes alsô vil,
514 Daz er gêt vür alliu zil:
515 Triuwe und gerehtikeit,
516 Daz ist manigen liuten leit.
517 Ein vogel den andern izzet,
518 Ein tier daz ander frizzet,
519 Ein visch den andern slindet,
520 Ein mensche daz ander schindet
521 An lîbe, an êren, an guote
522 Mit ungetriuwem muote.

[Letzte Seite]   [Nächste Seite]     oder direkt zurück zum Index
Administration: Henrike Lähnemann Zuletzt geändert am 26.02.2004